Ի ԽՈՐՈՑ ԿԱՐԴԱՄ ԱՌ ՔԵԶ

 

Հայր Անտոն Ադամեան
Պելմոնթ – Մասաչուսէց

Տէ՛ր, փորձութիւններու եւ նեղութիւններու մէջ քեզի կը բարձրացնեմ իմ աղաղակս:
Խաղաղութեամբդ ամրացուր եւ աներկիւղ պահէ զիս ամէն չարէ: Տանջալից վշտերուս, տառապանքներուս մէջ, գիշեր ցերեկ անունդ կը կանչեմ: Քեզ կըփնտռեմ: Մթութիւնը կլանած եւ մոլորեցուցած է զիս: Սիրտս վրդոված է: Հոգիս խռոված: Միտքս այլայլած:
Կորսնցուցի երբեմնի լուսառատ, անդորր, շնորհքներովդ օծուն կեանքս: Այն օրէն իսկ որ քեզմէ հեռացայ, անչափ բարիքներդ ուրացայ, ինկայ մեղքի եւ անօրէնութեան ահաւոր ճանկերուն մէջ: Ես ինծի դաւաճանեցի: Անձնատուր եղայ չարին: Մաս կազմեցի սադայէլեան փաղանգին: Այժմ որ ամբողջովին պարպուած եմ շնորհքներէդ եւ շունչէդ, ըմբռնեցի կեանքիս մէջ ներկայութեանդ անհրաժեշտութիւնը:Խորապէս համոզուեցայ թէ առանց քեզի՝ ունայնութիւններու եւ աշխարհիկ ստորնութիւններու անդունդները կը գլորիմ: Մերկացայ մարդկութիւնս: Զոհ գացի կոյր կիրքերուս:Արժանապատուութիւնս անարգեցի ու կոխկռտեցի: Արժանի չեմ մարդ կոչուելու: Անհունօրէն կը զղջամ անցեալ կեանքիս: Կ՛ուզեմ վերադառնալ նախկին վիճակիս:Վայելել քեզ:Ճամբու ընկերդ ըլլամ: Գեղեցիկ եւ երջանկարար է բարեկամութիւնդ: Սակայն ես տկար եւ անպէտ
արարած՝ ոչինչ կարող եմ ընել: Պաշարուած եմ անթիւ անհամար ոսոխներէ որոնք իմ մահս կը փնտռեն եւ կը նիւթեն: Այս անել վիճակս ողբալով՝գութիդ, երկայնամտութեանդ եւ ներումիդ կարօտ եմ: Հասիր ինծի բարեխնամ եւ մարդասէր: Նուաղած է հոգիս:
Ուժաթափ եմ:Օգնութեանդ կը սպասեմ:Երկարէ ձեռքդ: Վեր հանէ զիս մեղքերուս խոր վիրապէն, որպէսզի սթափիմ թմրութենէս: Արթննամ մահաքունէս: Ու փառքդ երգեմ:
Տէ՛ր, որքա՜ն անյիշաչար եւ ողորմած ես : Ամօթէս չեմ յանդգնիր երեսս վեր բարձրացնել եւ քեզի նայիլ: Դու համակ լոյս՝ ես մեռելային խաւար:Դու անկեղծդ եւ բարիդ՝ ես կեղծիքներու, սուտերու եւ վատութիւններու ճանապարհագնաց: Դու սրբութիւն սրբոց:
Արարչական անմատոյց լոյս: Անեղծ եւ անվախճան: Ես՝ ապականած եւ վիժած անբան եւ ապերախտ արարած: Այս բոլորը քեզի կը յայտնեմ, լիովին ընդունելով իմ ոչնչութիւնս եւ անէութիւնս: Կը խոստովանիմ քեզի իմ յանցանքներս: Սիրտս որպէս բաց մատեան քեզի կը յանձնեմ: Ըրէ ինծի ինչ որ ուզես: Լուա՛ եւ մաքրէ զայն բոլոր աղտերէն որ կը սեւցնեն ու կը տգեղցնեն զինք: Սորվեցուր ինծի ընթանալ ուղիղ, ճշմարիտ եւ դէպի կեանք առաջնորդող ուղիէն: Տուր ինծի իմաստութիւնդ Վարդապետ արդար, որպէսզի ասկէ ետք խելքով եւ արթնութեամբ շարունակեմ կեանքիս ընթացքը քեզի հետ:
Աւելցո՛ւր հաւատքս: Ամրապնդէ՛յոյսս: Ծովացո՛ւր սէրս քեզի հանդէպ: Ըրէ որ միայն քեզ ունենամ որպէս կեանքի առաջնորդ, որպէսզի դարձեալ չշեղիմ,զոհ չերթամ չարին այլ քեզմով լեցուիմ: Հրճուիմ: Ցնծամ: Մէջդ գտնեմ իմ հաճոյքսս, հանգստութիւնս, մտքիս ու հոգիիս հաւասարակշռութիւնը եւ յաւերժական երջանկութիւնս:
Տէ՛ր, հիմա որ ներում ստացայ քեզմէ: Խաղաղեցաւ փոթորկած էութիւնս: Պաղատելով կը խնդրեմ եւ կը մուրամ քեզմէ որ զիս չլքես: Երկնային վարարող շունչովդ համակէ զիս: Հովանիիդ ներքեւ ա՛ռ զիս: Քուկդ եմ լիովին: Պահպանէ՛ զիս, փառաւորեալդ յամենայնի:

 

Be the first to comment

Leave a Reply

Your email address will not be published.


*