Ոչ Եւս Է Ռուբէն Յովսէփեան

 roupen-hovsepian3

Հոկտեմբեր 27, 2016-ին, 77 տարեկանին մահացաւ հայրենի վաստակաշատ գրող, հրապարակագիր, թարգմանիչ, մտաւորական, գրականագէտ եւ հասարակական գործիչ Ռուբէն Յովսէփեան: Ան պատասխանատու պաշտօններ ստանձնած է Հայ Յեղափոխական Դաշնակցութեան մէջ:

Հայաստանի Հանրապետութեան նախագահ Սերժ Սարգսեան երէկ ցաւակցական հեռագիր յղեց Յովսէփեաններու ընտանիքին` Հայաստանի Հանրապետութեան մշակոյթի վաստակաւոր գործիչ եւ գրող Ռուբէն Յովսէփեանի մահուան առիթով:

«Անոր վիպակները, պատմուածքներն ու թարգմանութիւնները մնայուն արժէքներ են մեր գրականութեան մէջ: Նշանակալի է նաեւ Ռուբէն Յովսէփեանի` իբրեւ «Նորք» գրական հանդէսի խմբագիրի աւանդը հայ գրականութեան տարածման գործին մէջ: Խորին ցաւակցութիւն կը յայտնեմ անուանի մտաւորականի ընտանիքին, հարազատներուն, գրչակիցներուն եւ ընթերցողներուն», նշուած  է նախագահ Սարգսեանի ցաւակցական հեռագիրին մէջ:

Գրող-արձակագիր, շարժապատկերագիր, հրապարակախօս, թարգմանիչ, խմբագիր, հասարակական-քաղաքական գործիչ Ռուբէն Յովսէփեան ծնած է 5 մայիս 1939-ին, Երեւանի մէջ:

1956-ին աւարտած է Հոկտեմբերեան (այժմ` Արմաւիր) քաղաքի թիւ 1 միջնակարգ դպրոցը:

1956-1957-ին աշխատած է Հոկտեմբերեանի հաստոցաշինական գործարանին մէջ:

1962 թուականին աւարտած է Երեւանի պետական համալսարանի երկրաբանական բաժանմունքը:

1962-1964-ին` իբրեւ երկրաբան, աշխատած է Թուրքմենիոյ Քարաքումի անապատին մէջ:

1965-66-ին եղած է «Աւանգարդ» թերթի արուեստի եւ գրականութեան բաժինի վարիչ: 1966-69-ին եղած է «Գրական թերթ»-ի շրջիկ թղթակից:

1970-74-ին եղած է «Սովետական գրականութիւն» ամսագիրի արձակի բաժինի վարիչ:

1974-75-ին հետեւած է Մոսկուայի բարձրագոյն բեմագրական դասընթացներուն:

1975-76-ին աշխատած է Հայաստանի խորհրդային հանրապետութեան նախարարներու խորհուրդի հեռուստատեսութեան եւ ռատիոհաղորդումներու պետական կոմիտէին մէջ` իբրեւ երիտասարդական հաղորդումներու գլխաւոր խմբագիր:

1976-79-ին աշխատած է «Եթերում է Երեւանը» թերթի խմբագրութեան մէջ:

1980-1981-ին աշխատած է «Սովետական գրականութիւն» ամսագիրին մէջ` իբրեւ գեղարուեստական գրականութեան բաժինի վարիչ:

1981-1982-ին եղած է« Սովետական գրող» հրատարակչութեան գեղարուեստական գրականութեան (ժամանակակից արձակ եւ բանաստեղծութիւն) խմբագրութեան վարիչը:

1982-1987 թուականներու եղած է «Սովետական գրող» (այժմ` «Նայիրի») հրատարակչութեան գլխաւոր խմբագիր:

1988-1989 թուականներուն գրողներու միութեան քարտուղարն էր:

1989 թուականէն մինչեւ մահը եղած է «Նորք» ամսագիրի գլխաւոր խմբագիր:

2007-2011 թուականներուն եղած է Հ.Յ.Դ. Բիւրոյի «Դրօշակ» պաշտօնաթերթի աւագ խմբագիր:

1990 թուականին անդամագրուած է Հայ յեղափոխական դաշնակցութեան:

Նոյն թուականին ընտրուած է Հ.Յ.Դ. Հայաստանի կեդրոնական կոմիտէի անդամ, եղած է Կեդրոնական կոմիտէի ներկայացուցիչը (1990-1992):

1992 թուականին, Հ.Յ.Դ. 25-րդ Ընդհանուր ժողովին կողմէ ընտրուած եւ մինչեւ 1995 թուականը եղած է ՀՅԴ Բիւրոյի անդամ:

1998-2006 թուականներուն եղած է Համազգային կրթական եւ մշակութային միութեան Կեդրոնական վարչութեան անդամ:

2000-2007 թուականներուն եղած է Հայաստանի Հանրապետութեան Ազգային ժողովի 2-րդ եւ 3-րդ գումարման պատգամաւոր: Իբրեւ պատգամաւոր մաս կազմած է Ազգային ժողովի ՀՅԴ խմբակցութեան:

Երեւանի թատրոնի եւ շարժապատկերի պետական հիմնարկի դասախօս էր: Այս համալսարանին մէջ դասաւանդած է մինչեւ կեանքէն հեռանալը:

Ռուբէն Յովսէփեան հեղինակ է հետեւեալ գիրքերուն, որոնցմէ ոմանց հիման վրայ նկարահանուած են նաեւ շարժապատկերներ. «Որոնումներ», 1965, «Երկու վիպակ: Ճիչ: Հայոց թաղ», 1970, «Հնձան», 1972 (համանուն շարժապատկերը 1973), «Ամենատաք երկիրը», 1977 (համանուն շարժապատկերը 1983), «Կարուսելի կանաչ ձին», 1978, «Երկար, հրաշալի օր», 1980, «Ճայերը», 1980, «Ես ձեր յիշողութիւնն եմ», 2003, «Ծիրանի ծառերի տակ», 2007, «Նռները», «Որդան կարմիր» 2016:

1980 թուականին արժանացած է Հայաստանի գրողներու միութեան Դ. Դեմիրճեանի անուան մրցանակի:

Ռուբէն Յովսէփեանի բեմագրութիւններուն հիման վրայ նկարահանուած են նաեւ «Ապրիլ» (1973), «Խնձորի այգին» (1985) (ըստ Ստեփան Զօրեանի համանուն ստեղծագործութեան), «Վարդապետի լռութիւնը» (բեմագրութիւնը գրուած է համատեղ) շարժապատկերները:

2009 թուականին Ռուբէն Յովսէփեանի գրած թատերախաղի հիման վրայ «Համազգային» թատրոնին մէջ բեմադրուած է «Կարմեն կամ չինական պարիսպ» ներկայացումը:

Թարգմանած եւ առանձին գիրքերով հրատարակած է Լեւ Թոլսթոյի, Կապրիէլ Կարսիա Մարքեզի շարք մը ստեղծագործութիւնները:

2009 թուականին Հայաստանի Հանրապետութեան նախագահին կողմէ պարգեւատրուած է Մովսէս Խորենացիի մետալով:

2014 թուականին Հայաստանի Հանրապետութեան նախագահին կողմէ արժանացած է Հայաստանի Հանրապետութեան մշակոյթի վաստակաւոր գործիչի

կոչումին:

2016 թուականին Լեռնային Ղարաբաղի Հանրապետութեան նախագահին կողմէ պարգեւատրուած է «Մխիթար Գոշ» մետալով:

Be the first to comment

Leave a Reply

Your email address will not be published.


*