Հ.Մ.Ը.Մ.-Ի Ա.Մ.Ն. ԱՐԵՒԵԼԵԱՆ ՇՐՋԱՆԻ 24-ՐԴ ՄԻՋ-ՄԱՍՆԱՃԻՒՂԱՅԻՆ ՆԱՒԱՍԱՐԴԵԱՆ ԽԱՂԵՐԸ ՆԻՒ ԵՈՐՔԻ ՄԷՋ

DSC_9511  Լուսանկարները՝ ԶԵՆՈՊ ՓՈՄԱՔԵԱՆի

 

Հ.Մ.Ը.Մ.-ի Արեւելեան Միացեալ Նահանգներու 24-րդ միջ-մասնաճիւղային մարզական խաղերը տեղի ունեցան Հինգշաբթի, Յուլիս 3-էն սկսեալ մինչեւ Կիրակի, Յուլիս 6, 2014-ին, նախաձեռնութեամբ` Հ.Մ.Ը.Մ.-ի Շրջանային Վարչութեան, հովանաւորութեամբ` Ա.Մ.Ն. Արեւելեան Շրջանի Բարեջան Առաջնորդ Բարձրաշնորհ Տ. Օշական Արք. Չօլոյեանի, ներկայութեամբ` Հ.Մ.Ը.Մ.-ի Կեդրոնական Վարչութեան անդամ եւ Արեւելեան Միացեալ Նահանգներու Շրջանի կապ` եղբ. Հրաչ Մեսրոպեանի եւ հիւրընկալութեամբ` Հ.Մ.Ը.Մ.-ի Նիւ Եորքի մասնաճիւղին:
Չորս օրերու վրայ երկարող խաղերու ընթացքին` դաշտերու վրայ, պանդոկի միջանցքներուն եւ ամէնուրէք Հ.Մ.Ը.Մ.-ական մարզիկը հանդիպեցաւ իր հարազատներուն, որոնք ժամանած էին Արեւելեան Ամերիկայի ինը շրջաններու մասնաճիւղերէն.- Ալպընի, Նիւ Ճըրզի, Ուաշինկթըն, Շիքակօ, Պոսթըն, Տիթրոյթ, Փրովիտէնս, Ֆիլատելֆիա եւ հիւրընկալ Նիւ Եորք: Նաեւ, DSC_1628Գանատայէն հրաւիրուած էր Թորոնթոյի Հ.Մ.Ը.Մ.-ը: DSC_1607
Հ.Մ.Ը.Մ.-ի տարեկան այս մարզական խաղերը, առիթ մըն են սատարելու Հ.Մ.Ը.Մ.-ի վսեմ նպատակին, երբ շրջանի մասնաճիւղերէն, ժամանած Հ.Մ.Ը.Մ.ականներ եւ համակիրներ, գօտեպնդուած Հ.Մ.Ը.Մ.-ի շունչով եւ ոգիով, կը հաւաքուին Միջ-մասնաճիւղային խաղերու դրօշին տակ` մրցելու` հայկական ազնիւ ոգիով, ստեղծելու` խանդավառ մթնոլորտ մը, ծառայելու` ,Բարձրացի՛ր-Բարձրացո՛ւր»-ին, եւ միշտ ի միտի ունենալով` թէ այս խաղերէն յաղթական դուրս պիտի գայ միայն Հ.Մ.Ը.Մ.-ը:
Յուլիս 3-ին բոլոր մարզիկները, սկաուտները եւ համակիրները, խումբ առ խումբ ժամանեցին Նիւ Եորք, ուր տեղի ունեցաւ մասնաճիւղերու պատասխանատուներու կարճ ժողով մը, բացատրելու շաբաթավերջի մարզախաղերու դասաւորումը, օրէնքները եւ խստապահանջ կարգապահական պայմանները: Ընդամէնը 450 մարզիկներ մասնակցեցան:DSC_9820
Շաբաթ, Յուլիս 5-ի երեկոյեան տեղի ունեցաւ յաղթանակի ճաշկերոյթ-պարահանդէսը: DSC_1328Պաշտօնական բաժինը բացուեցաւ պատւոյ հիւրերու մուտքով: Ներկայ էին երկու հարիւրէ աւելի Հ.Մ.Ը.Մ.ականներ եւ համակիր ազգայիններ, որոնք ապրեցան յիշատակելի երեկոյ մը Հ.Մ.Ը.Մ.ի մեծ ընտանիքին հետ: Պատւոյ սեղանին վրայ ներկայ էին Արեւելեան Միացեալ Նահանգներու Թեմի Բարեջան Առաջնորդ` Բարձրաշնորհ Տ. Օշական Արք. Չօլոյեան, Հ.Մ.Ը.Մ.ի Կեդրոնական Վարչութեան անդամ եւ Արեւելեան Շրջանի ներկայացուցիչ եղբ. Հրաչ Մեսրոպեան, Հ.Յ.Դ. Արեւելեան Միացեալ Նահանգներու Կեդրոնական Կոմիտէի ներկայացուցիչ Գէորգ Չաւուշ Մեսրոպեան, Շրջանային Վարչութեան ատենապետ Վահէ Թանաշեան, Հ.Մ.Ը.Մ.ի Նիւ Եորքի մասնաճիւղի ներկայացուցիչ Վիգէն Շխուկեան:
Հանդիսութեան պաշտօնական բացումը կատարուեցաւ քայլերգներու կատարողութեամբ:
Սրբազան Հօր սեղանի օրհնութենէ եւ ճաշէն ետք, օրուան պատշաճ յայտագիրը բացուած հռչակուեցաւ:
Հ.Մ.Ը.Մ.ի Նիւ Եորքի մասնաճիւղի անունով, Վիգէն Շխուկեան բարի գալուստ մաղթեց: Ան նշեց թէ Հ.Մ.Ը.Մ.ը միշտ ալ յաղթական դուրս եկած է, որովհետեւ ոտնագնդակի, վոլիպոլի, պասքէթպոլի կամ այլ մարզաձեւերու համախմբում մը չէ, այլ Հայկական Մարմնակրթական Ընդհանուր Միութիւն մըն է, որ կը ձգտի ազգային վսեմ նպատակներու հետեւաբար այսօրուան յաղթանակը այդ նպատակին իրագործման աշխատանքներու յաղթանակն է եւ որու հետեւանքով հայ ժողովուրդի յաղթանակն է:
Շրջանային Վարչութեան ատենապետ Վահէ Թանաշեան, իր կարգին բարի գալուստ մաղթեց բոլոր ներկաներուն: Ան շնորհակալութիւն յայտնեց կազմակերպիչ յանձնախումբին, ենթայանձնախումբերուն եւ բոլոր անդամներուն, ընտանիքներուն եւ կազմակերպութիւններուն, որոնք ամիսներ շարունակ անսակարկ եւ նուիրումով աշխատեցան այս խաղերու յաջողութեան համար:
Հ.Յ.Դ. Արեւելեան Միացեալ Նահանգներու Կեդրոնական Կոմիտէի կողմէ խօսք առաւ Գէորգ Չաւուշ Մեսրոպեան: Ան ողջունեց Հ.Մ.Ը.Մ.ի հաստատաքայլ երթը շրջանի մէջ, նշելով թէ Արեւելեան Ամերիկայի Հ.Յ.Դ. Կեդրոնական Կոմիտէն, յանձինս Հայ Յեղափոխական Դաշնակցութեան մեծ ընտանիքին, կու գայ անգամ մը եւս ողջունելու Արեւելեան Ամերիկայի Հ.Մ.Ը.Մ.ի Շրջանային Նաւասարդեան խաղերը, որոնք այս տարի նուիրուած են Հայաստանի Հանրապետութեան Ազգային Բանակի կազմութեան 20ամեակին ու անկասկածօրէն Հ.Մ.Ը.Մ.ական ընտանիքի բոլոր անդամներուն ու յատկապէս պատասխանատու մարմիններուն երկար եւ հետեւողական աշխատանքի, ճիգի ու քրտինքի արդիւնքն է:
Հ.Մ.Ը.Մ.ի Կեդրոնական Վարչութեան ներկայացուցիչ` եղբ. Հրաչ Մեսրոպեան, որ շեշտեց թէ, Հ.Մ.Ը.Մ.-ականը պիտի շարունակէ գործել, հայրենասէր հայու ոգիով, մի՛շտ բարձրանալ ու բարձրացնել հայու պատիւն ու կորովը ըլլայ մարզադաշտի վրայ ըլլայ անձնական կեանքի օրինակով ի փառս հայ ժողովուրդին ու անոր վերականգնող Հայրենիքին, մաղթելով պարծանք ու պատիւ Հայ Մարմնակրթական Ընդհանուր Միութեան աննկուն ոգիով իրականացնող աշխատանքներուն եւ անոր միշտ բարձր ծածանող միութենական դրօշին:DSC_1622
Միացեալ Նահանգներու Թեմի Առաջնորդ Բարձր. Տ. Օշական Արք. Չօլոյեան իր խօսքը ուղղելով երիտասարդութեան, շնորհաւորեց 24-րդ Միջ-մասնաճիւղային մարզական խաղերու յաջողութիւնը եւ յիշեցուց, որ զանազան կազմակերպութիւններ եկած ու գացած են, բայց Հ.Մ.Ը.Մ.ը կը մնայ միշտ երիտասարդ եւ թէ անոր սկզբունքները եւ ազգային սրբութիւնը շունչ եւ արիւն տուած են հայորդիին:
Մրցումներու աւարտին, կատարուեցաւ տողանցք, մետալներու բաշխում եւ փակման հանդիսութիւն:
Փակման հանդիսութեան, նախ մուտք գործեցին պատւոյ հիւրերը, դրօշակակիրներու եւ Շրջանային խմբապետի առաջնորդութեամբ` տողանցեցին շրջանի արի եւ արենոյշներու, արծուիկներու եւ գայլիկներու խումբերը եւ յաջորդաբար ինը մասնաճիւղերու մարզիկները, յատուկ խանդավառութիւն ստեղծեցին եռագոյն դրօշակներ ծածանած գայլիկ-արծուիկներու` ապագայ սերունդի մուտքը եւ խաղերու կազմակերպիչ յանձնախումբի անդամներուն մուտքը, որոնք արժանացան ներկաներուն ծափողջոյններուն:DSC_0147
Համա-Հ.Մ.Ը.Մ.ական բանակումի մասնակցողները կատարեցին յատուկ տողանցք մը։ Նաեւ յայտարարուեցաւ թէ Սմբատ Տրամկոչեան եւ Սօսէ Պէօճէքեան պիտի մասնակցին “Արարատեան Կարգ“ի դասընթացքներուն։
Այսպէս Միջ-մասնաճիւղային 24-րդ խաղերը հասան իրենց աւարտին, անգամ մը եւս Հ.Մ.Ը.Մ.ի յաղթութեամբ, այս խաղերով Արեւելեան Ամերիկայի շրջանը յաւելեալ խթան ստացաւ, խաղերուն մասնակցող բոլոր Հ.Մ.Ը.Մ.ականները վերանորոգեցին իրենց ուխտը, յուսալով որ 2015ի Միջ-Մասնաճիւղային մարզական խաղերը վերանորոգուած եռանդով տեղի պիտի ունենայ Տիթրոյթի մէջ:
Խումբերու Ընդհանուր Դասաւորում
Մասնաճիւղ Կէտ
1.- Նիւ Ճըրզի 53
2.- Նիւ Եորք 38
3.- Պոսթըն 31
4.- Ուաշինկթըն 16
5.- Փրովիտէնս 14
6.- Շիքակօ 8
7.- Ֆիլատելֆիա 7
8.- Թօրոնթօ 5
9.- Տիթրոյթ 4
10.- Ալպընի 0
ԹՂԹԱԿԻՑ

Be the first to comment

Leave a Reply

Your email address will not be published.


*