0
0
Յուլիս 26- Կիրակի օր տեղի ունեցաւ »Խանասոր«ի վրէժարական արշաւանքին 112-ամեակի տարեդարձի նուիրուած դաշնագնացութիւնը, Տիրպօրն քաղաքի քաղաքապետութեան պատկանող, եւ »Միլֆըրտ« գիւղի մէջ գտնուող դաշտին մէջ:
Դաշնագնացութիւնը կազմակերպած էր Հ.Յ.Դաշնակցութեան »Ազատամարտ« կոմիտէութիւնը, օդը նպաստաւոր էր եւ ներկայ էին համակիրներու բազմութիւն մը, ինչպէս նաեւ Հայ Կաթողիկէ Ս.Վարդան եկեղեցւոյ հոգեւոր հովիւ՝ Գերպ. Տ. Անտոն Ծ. Վրդ. Ադամեան, Ս. Սարգիս եկեղեցւոյ հոգեւոր հովիւ Արժպ. Տ. Տարօն Քհնյ. Ստեփանեան, եւ եկեղեցւոյ հոգաբարձութեան անդամները:
Դաշտավայրը լեցուած էր հայկական խորովածի անուշ բոյրով, հայկական պարեղանակներով, ազգային եւ յեղափոխական երգերով կը թնդար դաշտավայրը:
Պահ մը վերացած, մտքով յիսուն տարիներու ետ դարձ մը կատարեցի, շարժապատկերի յաջորդականութեամբ աչքերուս առջեւ պարզուեցան այն գեղեցիկ օրերը, երբ ամէն տարի Լիբանանի զանազան շրջաններէն Հ.Յ.Դաշնակցութեան կոմտէութիւններու պատանեկան միութիւններու անդամակցած փոքր եւ երէց պատանիներ, իրենց ծնողներուն ընկերակցութեամբ, կիրակի կանուխ առաւօտուն փոխադրակառքերու պատուհաններէն դուրս պարզած Եռագոյն եւ Հ.Յ.Դաշնակցութեան դրօշակները կը ժամանէին Այնճար հայ գիւղաւանի »Կարմիր Լեռ« կոմիտէութեան »Բաբգէն Սիւնի« ակումբը:
Կանուխ առաւօտուն Հ.Մ.Ը.Մ.նի ոտնագնդակի, ինչպէս նաեւ ազգային »Յառաջ« վարժարանի եւ հայ Աւետարանական երկրոդական վարժարանի »Կողովագնդակի« դաշտերուն վրայ տեղի կ’ունենար ոտնագնդակի եւ Կողովագնդակի մրցումներ : Որոնց յարակից տեղի կ’ունենար Երկար եւ Կարճ վազքի, բարձրութիւն եւ մէկ քայլ ոստումի մրցումներ, որոնց կը մասնակցէին փոքր եւ երէց պատանիներ:
Կէսօրէ ետք տեղի կ’ունենար աւարտական մրցումները. որոնցմէ փոքր եւ երէց պատանիներ իրենց հարազատներով կը հաւաքուէին գիւղաւանէն ոչ շատ հեռու գտնուող ջրաղբիւրը, որուն շուրջ գտնուող հսկայ սօսիներու, ընկուզենիներու, բարտիներու եւ ուրենիներու փոքր պուրակին մէջ գտնուող սրճարանը : Հոն էին Անկախ Հայաստանի առաջին հանրապետութիւնը կերտած հսկաները, Սիմոն Վրացեան, Կարo Սասունի, Կոմս, Մուսա Լերան հերոսամարտի ղեկավար, Սուրիոյ Իսկէնտէրուն նագանգի, եւ ապա Լիբանանի երեսփոխան Մովսէս Տէր Գալուստեան, Մուսատաղի հերոսամարտին մասնակցած ափ մը քաջեր, Լիբանանի Հ. Յ. Դաշնակցութեան Կ. Կոմիտէի, եւ Լիբանանի Կոմիտէութեան անդամներ, քոյր միութիւններու ընկ.- ընկերուհիներ, ծնողներ եւ համակիրներու հոծ բազմութիւն մը:
Օրուայ հանդիսութիւնը կը սկսէր Լիբանանի եւ Հայստանի օրհներքներով, որուն կը յաջորդէր Հ. Յ.Դաշնակցութեան քայլերգը: »Խանասորի Արշաւանք«ին պատգամը ընդանրապէս կը փոխանցէր ղեկավար ընկերներէն մէկը, նոր աւիշ եւ ոգեւորութիւն կը ներշնչեր պատանիներուս եւ ներկայ հասարակութեան:
Հանդիսութեան աւարտին, տեղի կ’ունենար պատանիներուս կողմէ անհամբեր սպասող բաժակներու տուչութիւնը, ձեռամբ այդ հսկայ Տիտանիներուն :
»Խանասորի Արշաւանք«ին նուիրուած դաշնագնացութիւնը, եւ տեղի ունեցող մարզական զանազան տեսակի խաղերը կը կազմակերպէր Լիբանանի Հ.Յ.Դաշնակցութեան պատանեկան միութեան Շրջանային Վարչութիւնը, որոնք նաեւ կը տրամադրէին այդ բաժակները:
Օրուայ հանդիսութիւնը իր աւարտին կը հասնէր Արշաւանքին մասնակցած եւ իր զինակից ընկերներու քաջագործութիւներէն ներշնչուած, եւ անոց բարոյական մեծութիւնը եւ արշաւանքին փառքը հիւսող Գալուստ Ալոյեանի հեղինակած պատմաբացատրական »Կարկուտ Տեղաց Խանասորայ Դաշտումը« յեղափոխական, եւ ազգահրաշունչ երգին երգեցողութեամբ :
»Ազատամարտ« կոմիտէութեան կողմէ ներկայ հասարակութեան բարի գալուստի խօաքը փոխանցեց ընկ. Անդրանիկ Գարատօլեան, որմէ ետք հակիրճ կերպով անդրադարձաւ Հ.Յ.Դաշնակցութեան կողմէ կազմակերպուած »Խանասոր«ի արկածախնդրական վրէժարական արշաւանքին, եւ անոր արձանագրած զինուորական ու բարոյական արժանիքներուն : Իր խօսքի աւարտին ընկ. Գարատօլեան ապրումով երգեց »Կարկուտ Տեղաց« ազգայնաշունչ երգը:
Շնորհակալութիւն կը յայտնենք »Ազատամարտ« կոմիտէութեան, եւ յատկապէս կազմակերպիչ յանձնախուբի ընկերներուն, որոնք իրենց աշխատանքով դաշնագնացութիւնը յաջողապէս հասցուցին իր լրումին: Կը շնորհաւորենք իրենց կատարած բծախնդիր եւ օրինակելի աշխատանքը ըսելով՝ Վարձքերնիդ Կատար:
Ա. Գ.
