Հ.Յ.Դաշնակցութիւնը 7 Պատգամաւորներով Պիտի Մասնակցի Ազգային Ժողովին


ԵՐԵՒԱՆ.- Կիրակի, Ապրիլ 2-ին, Հայաստանի մէջ կայացած Ազգային Ժողովի ընտրութիւններուն արդիւնքները ցոյց կու տան թէ նախագահ Սերժ Սարգսեանի «Հանրապետական» կուսակցութիւնը յաղթական դուրս եկած է ապահովելով
771 հազար 249 ձայն, որ ընտրողներուն 49.19 տոկոսը կը կազմէ: Ապա, յաջորդաբար «Ծառուկեան» դաշինքը (428 հազար 965 ձայն, ընտրողներուն 27.36 տոկոսը), «Ելք» դաշինքը (122 հազար 49 ձայն, ընտրողներուն 7.78 տոկոսը) եւ Հայ Յեղափոխական Դաշնակցութիւնը (103 հազար 173 ձայն, ընտրողներուն 6.58 տոկոսը) կը գրաւեն յաջորդ դիրքերը: Այս չորս կուսակցութիւններն ու կուսակցութիւններու դաշինքներն են, որոնք ապահովելով քուէներուն հինգ առ հարիւրէն աւելի, մուտք պիտի գործեն Ազգային Ժողով:
Պատգամաւորական աթոռներու բաշխումը, նոր ընտրական օրէնսգիրքի համաձայն՝ կը կատարուի հետեւեալ կերպով. նախ՝ կուսակցութիւններուն կամ կուսակցութիւններու դաշինքներուն ստացած ձայներուն թիւը կը բազմապատկուի 101ով, որ Ազգային Ժողովի իրաւագիրներու նուազագոյն թիւն է, ապա կը բաժնուի խորհրդարան անցած քաղաքական ուժերուն կողմ քուէարկած քուէաթերթիկներու հանրագումարով:
Այս հաշուարկը կատարելով, կը պարզուի հետեւեալ պատկերը.-
-Հանրապետական կուսակցութեան ստացած ձայներուն թիւը՝ (771249) x 101 / 1,425,445 = 54.6 իրաւագիր (այսինքն մանտաթ):
-«Ծառուկեան» դաշինքի ստացած ձայներու թիւը՝ (428965) x 101 / 1,425,445 = 30.3 իրաւագիր:
-«Ելք» դաշինքի ստացած ձայներու թիւը՝ (122049) x 101 / 1,425,445 = 8.6 իրաւագիր:
-Հ.Յ.Դ.-ի ստացած ձայներու թիւը՝ (103173 ) x 101 / 1425445 = 7.3 իրաւագիր:
Հետեւաբար Հանրապետական կուսակցութիւնը կը ստանայ 55 պատգամաւոր, «Ծառուկեան» դաշինքը՝ 30, «Ելք»ը՝ 9, իսկ Հ.Յ.Դաշնակցութիւնը՝ 7:
Լրացուցիչ 4 իրաւագիրներ նախատեսուած են նաեւ ազգային փոքրամասնութիւններուն համար:
Հինգ առ հարիւրէն պակաս արձանագրած կուսակցութիւն-դաշինքներչուն պատկերն է.-
-«Հայկական Վերածնունդ» կուսակցութիւն՝ 3,72%
-«Օհանեան-Րաֆֆի-Օսկանեան» կուսակցութիւններու դաշինք՝ 2,07%
-«Կոնգրէս»-Հ.Ժ.Կ. կուսակցութիւններու դաշինք՝ 1,65%
-«Ազատ Դեմոկրատներ» կուսակցութիւն՝ 0,94%
-Հայաստանի Համայնավար կուսակցութիւն՝ 0,75%:
Ապրիլ 3-ին ունեցած իր յայտարարութիւններուն ընթացքին Հայաստանի Կեդրոնական ընտրական յանձնախումբի նախագահ Տիգրան Մուկուչեան յայտնեց թէ Հայաստանի Ազգային ժողովի ընտրութիւններուն ընդհանուր առմամբ մասնակցած է ընտրելու իրաւունք ունեցող քաղաքացիներուն 60,86 առ հարիւրը: «Ընտրելու իրաւունք ունեցող 2 միլիոն 587 հազար 706 քաղաքացիներէ Ազգային ժողովի ընտրութիւններու քուէարկութեան մասնակցած է 1 միլիոն 574 հազար 947 քուէարկող: Ասոնք նախնական տուեալներ են, որոնք տակաւին ստացուած են ելեկտրոնային եղանակով: Այսինքն, տեղամասային ընտրական յանձնախումբերէն արձանագրութիւնները կը բերուին տարածքային ընտրական յանձնախումբեր, այդ տուեալները կ՛անցուին համակարգիչներու մէջ, որմէ ետք արդէն մենք կը ստանանք թղթային արձանագրութիւնները, կը կատարուի ուսումնասիրութիւն, եթէ բողոքներու դիմումներ ստանանք` նաեւ այդ ընթացքին կը տրուին համապատասխան որոշումներ եւ այդ ամբողջին համագումարումով տեղի կ՛ունենայ ընտրութեան արդիւնքներու ամփոփումը», յայտնեց Մուկուչեան` աւելցնելով, որ ընտրութիւններու արդիւնքներուն վերջնական յայտարարութիւնը տեղի պիտի ունենայ կիրակի, Ապրիլ 9-ին:
Խախտումներու վերաբերեալ կային բազմաթիւ ահազանգներ: Երկու հարիւրէ աւելի հեռաձայնային հաղորդակցութիւն միայն Կեդրոնական ընտրական յանձնախումբը ստացած է: Այս մասին լրագրողներու հետ զրոյցի մը ընթացքին ըսաւ Կեդրոնական ընտրական յանձնախումբի նախագահ Տիգրան Մուկուչեան:
Ան նշեց նաեւ, որ Կեդրոնական ընտրական յանձնախումբը հետեւած է տարբեր լրատուական կայքերով խախտումներու վերաբերեալ տեղեկատուութեան եւ փորձած առաւելագոյնս արագ միջոցներու ձեռնարկել` խախտումներու հանգամանքները պարզելու, զանոնք կանխելու եւ հետագային բացառելու համար: «Պէտք է նկատել, որ եղած են բազմաթիւ դէպքեր, երբ, հաղորդումներով պայմանաւորուած, ընտրական յանձնախումբի կա՛մ անդամները, կա՛մ նախագահները այցելած են տեղամասային ընտրական յանձնախումբեր եւ տեղւոյն վրայ փորձած են պարզել հանգամանքները: Արձանագրուած են բողոքներ, բայց անոնք պէտք է ուսումնասիրուին, որմէ ետք միայն կրնանք յայտարարութեամբ հանդէս գալ», ըսաւ Մուկուչեան:
Հ.Յ.Դ. Բիւրոյի քաղաքական ներկայացուցիչ, Հ.Յ.Դ. համամասնական ցուցակը գլխաւորող Արմէն Ռուստամեան քուէարկութեան ժամանակ յայտնեց թէ.- « Ես քիչ առաջ հոգեհանգիստի էի. ո՛չ միայն Պռօշեանի մեր ընկերոջ` Հրաչ Մուրադեանի հոգեհանգիստն էր, այլ նաեւ` Ապրիլ 2-ին քառօրեայ պատերազմին զոհուած բոլոր զինուորներուն: Բոլորը անուն առ անուն յիշեցինք: Անոնք հերոսներ են, եւ պէտք չէ միայն սուգով նայիլ այդ ամէն ինչին, ես վստահ եմ, որ անոնք նոր Հայաստանի, այսօրուան Հայաստանի հիմքերը դրին, ապահովեցին, որ մենք կարենանք այսօր ազատ ընտրութիւններ կազմակերպել, ատիկա նաեւ անոնց շնորհքն էր եւ անոնց վաստակը, եւ ասիկա պէտք է ըլլայ գլխաւորը: Անոնց անունները պիտի գրուին մեր պատմութեան մէջ:…Մենք համոզուած ենք, որ ասիկա 4-րդ հանրապետութեան հիմնադիր խորհրդարանն է, եւ կ՛ուզենք, որ այս 4-րդ հանրապետութիւնը ճշմարիտ սկզբնաւորում ունենայ: Այս նպատակին համար քուէարկած եմ` վստահ ըլլալով, որ մենք, իսկապէս, կը թեւակոխենք նոր ժամանակաշրջան մը, եւ այս ընտրութիւնը պիտի ըլլայ որոշիչ, վճռական: Մեր հետագայ քայլերը ինչպէ՞ս կրնանք կատարել եւ ի՞նչ խորութեամբ ու արագութեամբ` կախեալ է այն խորհրդարանի որակէն, որ այսօր կ՛ընտրուի», ըսած է ան` աւելցնելով, որ կ՛ուզեն աւելի լուրջ ներկայութիւն ունենալ խորհրդարանին մէջ, որպէսզի այս հոլովոյթը, որ իրենք սկսած են, մինչեւ վերջ կարենան տեղ հասցնել: Շատ հաճելի է տեսնել կիրարկուող արհեստագիտական ոճը: Շատերը կ՛ըսէին, որ ասիկա խնդիրներ պիտի յառաջացնէ, բայց հակառակը` շատ սահուն կ՛ընթանայ ամէն ինչ:… Ընտրակաշառքի մասին ստացած ենք մինչեւ այսօր, չեմ բացառեր, որ այսօր ալ ըլլայ, որովհետեւ անոր պատրաստուած են շատերը: Այս ընտրութիւններուն ամէնէն ստուերոտ մասը պիտի ըլլայ ընտրակաշառքի հանգամանքը: Ես այստեղ ոեւէ մէկը առանձնացնելու խնդիր չեմ բարձացներ, ընտրակաշառք տուողն ալ, ստացողն ալ պէտք է գիտնան, որ նոյն յանցաւոր համագործակցութեան մէջ են: Մեր ժողովուրդը պէտք է հասկնայ` այս ձեւով չի կրնար ունենալ այն երկիրը, որուն մասին կ՛երազէ», ըսաւ Ռուստամեան:
Հ.Յ.Դ. Հայաստանի Գերագոյն մարմինի ներկայացուցիչ եւ նախընտրական գրասենեակի պետ Աղուան Վարդանեան, իր քուէարկութիւնը կատարելու ժամանակ յայտնեց թէ.- «Իրականութիւնը այն է, որ մեր ապագան այդ տղաներն են: Անոնք կը պարտադրեն, որ մենք կարենանք արդար, ուժեղ Հայաստան կառուցել», շեշտելով, որ ինքն ալ քուէարկած է յանուն նոր սկիզբի, յանուն ազատ, անվտանգ, զարգացող եւ խաղաղ Հայաստանի: Ան նշեց նաեւ, որ յոյս ունի` ընտրական նոր համակարգն ու արհեստագիտական նոր միջոցները կարելիութիւն կու տան շատ աւելի վստահութիւն ներշնչող ընտրութիւն կազմակերպելու:
Հայաստանի տարածքային կառավարման եւ զարգացման նախարար Դաւիթ Լոքեան, իր կարգին քուէարկութեան ժամանակ յայտնեց թէ իր ցանկութիւնն է, որ ընտրութեան իբրեւ հետեւանք յառաջիկայ հինգ տարիներուն մեր երկրին մէջ ըլլան ժպտացող մարդիկ, որոնք կը սկսին ապրիլ անհոգ, քիչ թէ շատ հարուստ, բարեկեցիկ կեանքով: «Ընտրած եմ նաեւ, որ Հայաստանի մէջ սկսի թագաւորել միտքը, բանականութիւնը. ժամանակն է, որ մենք` իբրեւ քաղաքակիրթ ազգ, անցնինք այդ փուլը եւ մեր երկրին մէջ գերակշիռ դառնայ միտքը: Այս օրը նաեւ ցաւի օր է` անցեալ տարի այս օրը մենք լուրջ խնդիրներ ունեցանք յարձակում սկսած նախաձեռնութենէ մը եւ զոհեր ունեցանք, բայց, նախարարին խօսքով, այսօր նաեւ հերոսութեան օր է: Փառք Աստուծոյ, որ մեր զինուորները կրցան կեանքի գնով պահել մեր սահմանը, ինչ որ, կը կարծեմ, պէտք է իր ազդեցութիւնը ունենայ հասարակութեան վրայ, բայց չեմ գիտեր` իրակա՞ն է այդ ազդեցութիւնը, թէ՞ ոչ», յայտնեց Լոքեան:

ԵԱՀԿ-ի կարճաժամկէտ դիտորդական առաքելութեան յատուկ համակարգող եւ ղեկավար Ինիասիօ Սանչէս Ամոր յայտնեց թէ.- «Գործընթացի բոլոր փուլերուն վերաբերեալ ԵԱՀԿ-ի զեկուցումին մէջ կայ անդրադարձ` քարոզչութեան, ֆինանսաւորման, բողոքներու քննարկման ընթացակարգերու, գրանցման սարքերու եւ քուէներու հաշուարկի մասին:…Ձեր երկիրը, ձեր խորհրդարանը մեծ ջանքեր գործադրած է բարեփոխումներ իրականացնելու ուղղութեամբ: Պէտք է դրուատել սահմանադրական բարեփոխումները, ընտրական օրէնսգիրքը քաղաքական լայն համաձայնութեամբ ընդունելու քայլը», ըսաւ Սանչէս Ամոր` աւելցնելով, որ հասարակութիւնը պէտք է իրաւական դաշտէն անցնի դիրքորոշումներու, վարքագիծի, վերաբերմունքի փոփոխութեան: Ան շեշտեց, թէ իրաւական լաւ դաշտ, սարքեր, գործիքներ ունենալը ընտրական գործընթացի որոշ փուլերու համար տակաւին բաւարար չէ, պէտք է յատկապէս կուսակցութիւնները փոխեն գործելակերպը, որոնք, ըստ երեւոյթին, կը շարունակեն գործել այնպէս, որ խնդիրը միայն իրաւական համակարգով չէ որ կը լուծուի:
Հանրապետական կուսակցութեան բանբեր Էդուարդ Շարմազանով յայտարարեց թէ.- «Հ.Յ.Դ.-ի հետ ունինք համագործակցութեան յուշագիր, որ կարճաժամկէտ չէ, որ ռազմավարական է, ծրագրային եւ գաղափարական: Հաշուի առնելով այն հանգամանքը, որ Հ.Յ.Դաշնակցութիւնը յաղթահարած է հինգ առ հարիւրի շեմը, ապագայ համագործակցութիւնը չեմ բացառեր, նոյնիսկ կարելի կը նկատեմ»:
Պատասխանելով այն հարցումին, թէ հանրապետականները Հ.Յ.Դ.-ի հետ համաձայնական կառավարութիւն պիտի կազմէ՞, Շարմազանովը նշեց, որ մնացած երկու ուժերը ցանկութիւն չեն յայտնած իրենց հետ համաձայնական կառավարութիւն կազմելու: Ըստ Շարմազանովի, խորհրդարանական համակարգին մէջ շատ կարեւոր են ընդդիմութեան կայուն եւ ուժեղ վերահսկումը:
«Ժառանգութիւն» կուսակցութեան ղեկավար, «Օհանեան-Րաֆֆի-Օսկանեան» դաշինքի անդամ Րաֆֆի Յովհաննէսեան յայտնեց, որ քուէարկած է «Յանուն հայրենիքին, հերոս տղոց, Հայաստանի Հանրապետութեան ապագային: Մենք յոյսով պէտք է ապրինք մեր երկրին մէջ, որպէսզի վերջապէս ունենանք Հայաստանի Հանրապետութիւն եւ ոչ թէ կուսակցապետութիւն»: Անոր համաձայն, ընտրական խախտումները նկատելի են թէ՛ նախընտրական շրջանին, եւ թէ՛ ընտրութեան օրը` դիտել տալով, որ անոնց վերաբերող ամբողջական թղթածրարը պիտի ներկայացուի հասարակութեան:
Պաշտպանութեան նախկին նախարար, «Օհանեան-Րաֆֆի-Օսկանեան» դաշինքի առաջնորդ Սէյրան Օհանեան,իր կարգին յայտարարեց թէ.-«Կը քուէարկեմ մեր արդար, ազնիւ Հայաստանին, մեր ժողովուրդին համար աւելի զարգացող տնտեսութիւն ձեւաւորելու, աւելի բարեկեցիկ կեանք կերտելու եւ մեր Հայաստանի համար աւելի յարատեւող ու միջազգային վարկը օրըստօրէ բարձրացնող ապագայ կերտելու համար»:…Եկէք այս օրը անցընենք հանդարտ ոգիով եւ անսասան հաւատքով, որ ամէն ինչ լաւ պիտի ըլլայ մեր երկրին համար, բոլորին համար, նաեւ մեր մարտական ընկերոջ` Սամուէլ Բաբայեանին համար». ան դիտել տուած է, որ իրենք մօտէն կը հետեւին ամէն ինչի եւ այս բոլորով պիտի զբաղին աւելի ուշ:
Առինջ գիւղին մէջ իր կնոջ եւ զաւակներուն հետ քուէարկելէ ետք «Ծառուկեան» դաշինքի առաջնորդ Գագիկ Ծառուկեան յայտարեց, թէ ամէն ինչ կախեալ է ժողովուրդէն եւ անոր կատարած ընտրութենէն` աւելցնելով, որ ան պատասխանատու պիտի ըլլայ ատոր, որովհետեւ Ապրիլ 2-ին տրուելիք քուէն պիտի ճշդէ, թէ Ապրիլ 3-ին ինչպիսի՛ Հայաստան կ’ուզէ տեսնել ժողովուրդը:
Ծառուկեան նախընտրական քարոզարշաւին ընթացքին յայտարարած էր, որ իր առաջնորդած դաշինքը եթէ յաղթէ, ապա ինք եւ ընկերները պատրաստ են արաբական եւ եւրոպական երկիրներէն 15 միլիառ տոլարի ներդրում բերել Հայաստան: Լրագրողները հարցուցին, որ եթէ «Ծառուկեան» դաշինքը մեծամասնութիւն չստանայ, այդ ներդրումները այնուամենայնիւ պիտի կատարուի՞ն: Ծառուկեան պատասխանեց, թէ երբ իրաւունքները իր ձեռքը չըլլան, երաշխաւոր չըլլայ, ուրեմն բնականաբար չեն կատարուիր այդ ներդրումները:
Ան հերքեց այն, որ «Ծառուկեան» դաշինքը ընտրակաշառք բաժնած ըլլայ` աւելցնելով, որ աշխատավարձ տրամադրուած է միայն կառոյցներուն եւ քարոզչական աշխատանք տանողներուն, ան նոյնիսկ բարեսիրական աշխատանքները կասեցուցած է այս փուլին:
Հայաստանի նախկին նախագահ Լեւոն Տէր Պետրոսեան, որ ՕՐՕ դաշինքին կողքին, կը նկատուի մեծագոյն պարտեալը, յայտնեց.- «Քուէարկեցի քաղաքացիական պարտքս կատարելու»:
Նշենք, որ Լեւոն Տէր Պետրոսեան քուէարկած է ընտրական նոյն կեդրոնին մէջ, ուր քուէարկած էր ներկայ նախագահ Սերժ Սարգսեանը, եւ քուէարկութեան ընթացքին թեքնիք հարցեր ծագած էին: Սարքը չճշդեց Տէր Պետրոսեանի մատնահետքը: Հեգնանքով պատասխանելով լրագրողին հարցումին, թէ ի՞նչ պատճառով այդ հարցը եղած է, Տէր Պետրոսեան պատասխանեց.- «Գիւղատնտեսական աշխատանքներէն»:

Be the first to comment

Leave a Reply

Your email address will not be published.


*