ՄԱՄԼՈՅ ՀԱՂՈՐԴԱԳՐՈՒԹԻՒՆ.-  Հ.Յ.Դ. Պատուիրակութիւնը Մասնակցեցաւ Ընկերվար Միջազգայնականի Տարածաշրջանային Յանձնախումբի Ժողովին

ԵՐԵՒԱՆ (Հ.Յ.Դ. Մամլոյ դիւան) – Ընկերվար Միջազգայնականի (Սոցինտերն) Ա.Պ.Հ., Կովկասի եւ Սեւծովեան յանձնախումբի հերթական ժողովը տեղի ունեցաւ Քիշինիեւի մէջ, Փետրուար 6-ին, Մոլտովայի Դեմոկրատական կուսակցութեան հիւրընկալութեամբ։
Ժողովին մասնակցեցան ներկայացուցիչներ Մոլտովայի, Պելառուսի, Ատրպէյճանի, Ուքրայինայի, Ռուսաստանի, Ղազախստանի, Հայաստանի եւ Հունգարիոյ անդամ կուսակցութիւններէն։ Ներկայ էր նաեւ Ընկերվար Միջազգայնականի գլխաւոր քարտուղար Լուիս Այալան։
Ժողովին մասնակից Հ.Յ.Դ. պատուիրակութեան մաս կը կազմէին Հ.Յ.Դ. Բիւրոյի քաղաքական ներկայացուցիչ եւ յանձնախումբի համանախագահ Արմէն Ռուստամեանը եւ Հ.Յ.Դ. Բիւրոյի անդամ եւ Հ.Յ.Դ. Բիւրոյի Հայ Դատի կեդրոնական գրասենեակի պատասխանատու Կիրօ Մանոյեանը։ 
Ժողովը նախագահեցին յանձնախումբի համանախագահներ Մարիօ Նալպանտեանն ու Ալեքսանտրա Տոպոլին (Հունգարիա)։
Ժողովին ողջոյնի խօսքով հանդէս եկաւ Մոլտովայի Դեմոկրատական կուսակցութեան ղեկավար Վլատիմիր Պլահոտնիւկը։ Ժողովին մասնակցեցան կուսակցութեան պատուոյ նախագահ եւ խորհրդարանի նախկին նախագահ Տումիտրու Տիակովը։
Ժողովի օրակարգը կազմուած էր Ընկերվար Միջազգայնականի յառաջիկայ 25-րդ Քոնկրէսի օրակարգի թեմաներու հիման վրայ՝ նպատակ ունենալով այդ թեմաներուն շուրջ կազմակերպութեան բարձրագոյն ժողովի որոշումներու եւ բանաձեւերու մշակման ժամանակ նկատի ունենալ նաեւ տարածաշրջանի տեսակետները։ 
Հ.Յ.Դ. ներկայացուցիչ Արմէն Ռուստամեանը ներկայացուց Հայաստանի վերջին տարուան քաղաքական իրադարձութիւնները՝ սահմանադրական եւ համապատասխան օրէնսդրական փոփոխութիւններէն մինչեւ յառաջիկայ խորհրդարանական ընտրութիւններ եւ Հ.Յ.Դ. դերակատարութիւնը այդ գործընթացներուն մէջ։
Ընկերվար Միջազգայնականը ընկերվար-ժողովրդավարական, ընկերվարական եւ աշխատաւորական կուսակցութիւններ համախմբող համաշխարհային կառոյց է, որ կը համախմբէ բոլոր մայրցամաքներէն աւելի քան 130 երկիրներու շուրջ 150 քաղաքական կուսակցութիւններ եւ կազմակերպութիւններ։
Կազմակերպութեան մօտ Հ.Յ.Դ. ներկայացուցիչ Մարիօ Նալպանտեանը կազմակերպութեան փոխնախագահ է։ Հ.Յ.Դ. համապատասխան կառոյցները լիիրաւ անդամ են Կանանց Ընկերվար Միջազգայնականին  եւ Ընկերվար Երիտասարդներու Միջազգային Միութեան։ Հ.Յ.Դ. Երիտասարդական Միութեան անդամ Կարօ Շատոյեանը Ընկերվար Երիտասարդներու Միջազգային Միութեան փոխնախագահն է։
Հ.Յ.Դ. ՄԱՄԼՈՅ ԴԻՒԱՆ

Be the first to comment

Leave a Reply

Your email address will not be published.


*