Սարդարապատի Յուշահամալիրին Մէջ Մայիս 28-ի Նշում

ԵՐԵՒԱՆ.- Մայիս 28-ին, Սարդարապատի հերոսամարտի յուշահամալիրին մէջ նշուեցաւ Հայաստանի Ա. անկախութեան 99-ամեակը, մասնակցութեամբ Նախագահ Սերժ Սարգսեանի, Ամենայն հայոց Գարեգին Բ. կաթողիկոսի, հանրապետութեան բարձրագոյն ղեկավարութեան եւ յուշահամալիր այցելած հիւրերուն:
Նախագահ Սարգսեան ծաղկեպսակ զետեղեց Սարդարապատի ճակատամարտի հերոսներու յիշատակը յաւերժացնող յուշակոթողին եւ յարգանքի տուրք մատուցեց: Զօրահանդէսին մասնակիցները ողջունելէ եւ պատուոյ նուագախումբի հանդիսաւոր քայլերթը ընդունելէ ետք, նախագահը հանդիսութեան մասնակիցներուն հետ Սարդարապատի յուշահամալիրի Հայոց ազգագրութեան եւ ազատագրական պայքարի պատմութեան ազգային թանգարանին մէջ դիտեց «Գալեմքեարեաններ պղնձագործ վարպետաց սուրիահայոց դպրոց. փրկուած եւ հայրենիքին նուիրաբերուած մշակութային արժէքներ» խորագիրով ցուցահանդէսը:

Նախագահ Սերժ Սարգսեան Սարդարապատի մէջ շնորհաւորական ուղերձ յղեց Հանրապետութեան տօնին առիթով:

Նախագահ Սերժ Սարգսեան շնորհաւորական ուղերձին մէջ նշեց.

«Սիրելի՛ հայրենակիցներ,

Կը շնորհաւորեմ բոլորս Հանրապետութեան տօնին առիթով:

1918 թուականի Մայիսեան յաղթանակները նոր եւ փառաւոր էջ բացին հայ ժողովուրդի դարաւոր պատմութեան մէջ: Սարդարապատի, Բաշ Ապարանի, Ղարաքիլիսայի ճակատամարտերուն մեր նախնիները նուաճեցին ապրելու իրաւունքը:

Այդ կռիւները բնաջնջման եզրին յայտնուած ժողովուրդի վերջին եւ օրհասական ճիգերն էին, որոնք կոչուած էին պաշտպանելու մեր պատմական հայրենիքի վերջին հողակտորները եւ փրկելու մեր ժողովուրդին վերջին բեկորները: Այդ անհաւանական թուացող սխրանքը գործեցին մեր ժողովուրդի բոլոր խաւերը, բոլոր շերտերը: Գործեցին բացառիկ միասնականութեամբ եւ կազմակերպուածութեամբ, անձնազոհ խիզախութեամբ եւ աննահանջ կամքով: Գործեցին ազգային գիտակցութեան եւ պատմական պատասխանատուութեան բարձր մակարդակով:

Նորանկախ Հայաստանը ծնունդ առաւ Համաշխարհային Ա. պատերազմի համազարկերու տարափին տակ: Մենք ամէն տարի հաւատարմութեան երդումի նման կը կրկնենք պարզ ճշմարտութիւն մը. եթէ չըլլար 1918 թուականի մայիս 28-ը, չէր ըլլար Խորհրդային Հայաստանը, եւ չէր ըլլար ներկայ Հայաստանի Հանրապետութիւնը:

Հայ ժողովուրդի ամբողջ պատմութեան ընթացքին մենք, թերեւս, չենք ունեցած պետականութենէ զրկուած ըլլալու աւելի մեծ ժամանակահատուած, քան այն փուլը, որ անմիջականօրէն նախորդած է մայիս 28-ին: Եւ, անկասկած, չենք ունեցած աւելի ծանր եւ ողբերգական ճակատագիր նախորդ որեւէ դարաշրջանի մէջ: Ահա թէ ինչո՛ւ 99 տարի առաջ պետականութեան վերականգնումը կրկնակի սուղ էր եւ նուիրական, եւ այսօր ալ սրբազան է իւրաքանչիւր հայու համար:

Հայաստանի Հանրապետութիւնը իր քաղաքացիներուն բերաւ ո՛չ միայն անկախ պետականութիւն, այլեւ մարդու իրաւունքներ եւ ազատութիւններ, որոնք արդէն ամրագրուած էին օրէնքներով:

Այսօրուան Հայաստանը նոյնպէս ծնաւ պատերազմի կրակի բովի մէջ, բայց այս անգամ` արցախեան ճակատի վրայ: Մենք` ներկայ Հայաստանի քաղաքացիներս, հաւատարիմ ենք Առաջին Հանրապետութեան պատգամներուն:

Սիրելի՛ հայրենակիցներ,

Կրկին կը շնորհաւորեմ բոլորս այս մեծագոյն տօնին առիթով: Կը մաղթեմ խաղաղութիւն եւ ստեղծագործ աշխատանք` յանուն մեր երկրի յառաջընթացին եւ բարօրութեան:

Կեցցէ՛ Հայաստանի Հանրապետութիւնը:

Փա՛ռք հայ ժողովուրդին»:

Միւս կողմէն, Հ.Յ.Դ. «Նիկոլ Աղբալեան» ուսանողական միութիւնը շնորհաւորական ուղերձ յղեց Հայաստանի Հանրապետութեան անկախութեան հռչակման տօնին առիթով: Ստորեւ` ուղերձին բովանդակութիւնը.-

«Սիրելի՛ հայրենակիցներ, ուսանողներ, սրտանց ու մեծ բերկրանքով կը շնորհաւորենք մայիս 28-ի` Հայաստանի Հանրապետութեան անկախութեան հռչակման տօնին առիթով:
Մեր մեծ ու պատկառելի տօնացոյցին մէջ մայիս 28-ի խորհուրդն ու նշանակութիւնը իւրովի կը նշանաւորուի: Անիկա ո՛չ միայն վճռականօրէն բեկեց պատմութեան հազարամեայ անբարենպաստ ընթացքը, մեզ դասեց պետականութիւն ունեցող ժողովուրդներու արժանավայել շարքին, այլեւ սահմանեց անգերազանցելի նշաձող մը, որուն միջոցով կարելի է չափել պետութեան ու ժողովուրդին հանդէպ քաղաքական պատասխանատուութիւնը, պետական իշխանաւորի անմնացորդ նուիրումը եւ անկարելին կարելի դարձնելու ռազմաքաղաքական կամքը:
Բացի պատմական փառաւոր էջ ըլլալէ, մայիս 28-ն նաեւ պետականութեան կերտումի շարունակական հրամայական է` ազատ, արդար, ընկերային գետնի վրայ համերաշխ, բարեկեցիկ ու ապահով երկիր մը կառուցելու: Մեր մաղթանքն է, որ հերթական մայիս 28-երը դիմաւորենք նոյնինքն այդ յաջողութիւններուն անխախտ արձանագրութեամբ:
Տօնի խնդութեան մէջ մեր անմնացորդ խոնարհումը կը յայտնենք դարակազմիկ իրադարձութիւնը կերտած հայ ժողովուրդի պետականակերտ առաքեալներուն, որոնք իրենց անսահման նուիրումով մեր հազարամեայ պատմութեան մէջ բացին փառաւոր ու անվախճան էջ մը»:

Be the first to comment

Leave a Reply

Your email address will not be published.


*