0
0
Աշխարհը իր աչքերը սեւեռած է Ափրիկեան ցամաքամասի ամէնէն աւելի մեծ հողաշերտ՝ Սուտանի վրայ, ուր կը կատարուի հարաւ – հիւսիս բաժանման վճռական հանրաքուէ մը, կամ աւելի ճիշտը՝ հարաւային շրջանի անջատումը՝ Խարթումէն:
Փետրուար 17, 2008-ին, Քոսովոյի անկախութեան եւ այդ առթիւ Լա Հէյի միջազգային դատարանի դրական վճիռին եւ Միացեալ Ազգերու Կազմակերպութեան ընդհանուր ժողովին կողմէ վերջերս ինքնորոշման իրաւունքը կարեւոր նկատող երկու բանաձեւերու որդեգրումին լոյսին տակ, Սուտանի այս բաժանումը, որուն իրագործումը պատրաստուած էր 2005-էն ի վեր կատարուած երկար խօսակցութիւններէ ետք, կը փաստէ թէ, ժողովուրդներու ինքնորոշման իրաւունքը հողային ամբողջականութեան սկզբունքին ստորադաս կամ նոյնիսկ հաւասար չէ, այլ՝ գերադաս:
Այս իրադարձութիւններու լոյսին տակ, Ատրպէյճան կը շարունակէ վերջին քանի մը ամիսներուն իր յարձակողական ոճն ու վերաբերմունքը, որ պարզումէկին կարելի է ամփոփել՝ յախորտանքով:
Այսպէս ձեռնոց նետելու այս քաղաքականութիւնը, որ սկսած էր նախագահ Ալիեւ, շաբաթներ առաջ, Նախիջեւան այցելութեան ընթացքին, կը շարունակեն այլ ազերի քաղաքական անձնաւորութիւններ:
Ասոնց վերջինը՝ Ատրպէյճանի պաշտպանութեան նախարարութեան բանբեր, գնդապետ Էլտար Սապիրօղլուն է, որ առանց բառերը ծամծմելու կը յայտնէ թէ.- »Ատրպէյճան տակաւին կորսնցուցած չէ իր վստահութիւնը տագնապը խաղաղ ճանապարհով լուծելու եւ մեր երկրի տարածքային ամբողջականութիւնը ապահովելու՝ միջազգային միջնորդներու ջանքերուն արդիւնաւէտութենէն: Սակայն ամէն ինչի սահման կայ:…Գաղտնիք չէ, թէ ո՞վ սկսաւ պատերազմը: Ոչ ոք պէտք է թաքցնէ այս իրողութիւնը: Իրականութեան մէջ, Հայաստանն ալ առանձինն չէր կրնար ձեռնարկել պատերազմի: Ամբողջ աշխարհը լաւատեղեակ է, թէ որո°ւն աջակցութեամբ թշնամին կրցաւ ժամանակաւոր յաջողութիւն ապահովել»:
Աւելի°ն, ազերի զինուորականը, սպառնական արտայայտութեամբ կ°անուանէ Արցախի Հանրապետութեան նախագահը՝ Արցախի անջատողական վարչակարգի ղեկավար Բակօ Սահակեան, նշելով թէ այս վերջինը ինքզինք կը խաբէ, երբ կը յայտնէ թէ, Արցախցին առանձինն կը կռուի Ատրպէյճանի դէմ:
Սապիօղլու իր յոխորտանքներու աւետարանը կ°եզրակացնէ, յայտնելով թէ.- »Մեր զինեալ ուժերը ունին այնպիսի զէնքեր, զորս թշնամին նոյնիսկ չի կրնար երեւակայել:…Այս անգամուան ռազմական յարձակումը շատ տարբեր պիտի ըլլայ նախորդէն: Մեր հարուածը կրնայ հասնիլ որեւէ թիրախի: Հայաստան թող չվստահի այն բարենպաստ քամիին, զոր անցեալ պատերազմին վայելեց»:
Առանց իրարնցումի տեղին է հարց տալ…Արդեօք ո՞վ պիտի ըլլայ յաջորդ յոխորտացողը:
»Հայրենիք»
Յունուար 10, 2011
