ԵՐԻՏԱՍԱՐԴՈՒԹԵԱՆ ՈՂԻՄՊԻԱԿԱՆՆ ՈՒ ՋԱՀԸ

2014082914.indd

ՀԱՅՐԵՆԻՔ

Օգոստոս 27, 2014

Խմբագրական

 

Պարզ ընկերային մթնոլորտի եւ մարզական բնոյթ ունեցող մրցումներու պրիսմակի ետին պէտք չէ նկատի ունենալ, տարեկան դրութեամբ կատարուող, եւ մեծ խանդավառութիւն ստեղծող, Հայ Երիտասարդաց Դաշնակցութեան Ողիմպիականը:

Յատկապէս այս տարուանը, որ կը կատարուի Հայոց Ցեղասպանութեան 100-ամեակի սեմին:
Այս մէկ նշումը, երբե՛ք այդ թութակաբանութեան կրկնութեան թող չնմանի, ոչ ալ “ճիտին պարտքն է“ի հասկացողութւն ստանայ: Այլ ընդհակառակը, թարմ կատարու՛ող Ցեղասպանութեան մը օրերուն կը կատարուի այս Ողիմպիականը:…Եւ այդ ալ Ցեղասպանութիւն մը, հայութեան մօտիկ եւ Հայաստանի կարեւորագոյն փոքրամասնութիւններէն մէկուն՝ Եզիտիներուն:
Զուագադիպութի՞ւն, ճակատագի՞ր: Այս տարուան մրցումները կը կատարուին քաղաքի մը մէջ, որ կը նկատուի Միջին Արեւելեան գաղութներու, ամենէն աւելի երանգ ունեցողն ու թիւ հաշուողը:
Այսպէս “Մօ-Թաուն“ի քաղաքին՝ Տիթրոյթի մէջ, ամերիկահայութեան ապագան՝ ԵՐԻՏԱՍԱՐԴՈՒԹԻՒՆԸ պիտի հաւաքուի:
Երիտասարդականը պէտք է, որ յաւելեալ աշխուժութեամբ գործէ, մանաւանդ որ ներկայ դրութեամբ, բազմաթիւ բնագաւառներ ստեղծուած են, արդի քարոզչական ու համացանցային մարզէն ներս:
Երիտասարդականը յաւելեալ ուժերու կարիքն ունի, իր փորձառու անդամներուն կողքին, որոնք միասնաբար յառաջ պիտի տանին եւ պիտի արդիականացնեն այս վեհ ու բարձր միութիւնը:
Երիտասարդականը թրծուած է, կազմ ու պատրաստ նշելու Հայոց Ցեղասպանութեան հարիւրամեակը: Ան քաջատեղեակ է, թէ միայն պարզ զարհուրելի պատահածի մը նշումը չէ: Նաեւ, միայն պատշած ճանաչումով եւ հարիւր թէ հազար ներողամտութեամբ չէ որ պիտի նշուի Հայոց Ցեղասպանութեան այս հարիւրամեակը: Այլ խլուած հսկայ հողաշերտի մը պահանջը կայ: Այդ հողաշերտը՝ ԱՐԵՒՄՏԱՀԱՅԱՍՏԱՆը կը պատկանի ի՛ր, այսինքն՝ երիդասարդութեան նախահայրերուն…Սասուն, Մուշ, Վան: Եւ դեռ հոն գոյութիւն ունին առաջնահերթ հարցեր՝ վերաբնակեցում, վերաշինութիւն եւ հատուցում:
Հոս տեղին է հարց տալ, թէ արդեօք գիտակի՞ց է երիտասարդը:
Բացարցակապէս, կարելի չէ ընդունիլ ժխտական պատասխան:
Երիտասարդականը պէտք է որ պատրաստ ըլլայ, նոր մտածելակերպ բերելու մեր գործունէութեան մէջ, արդիականանալու ու յարմարելու ժամանակներուն, եւ այս մէկը առանց ծամծմելու եւ տատամսելու:
Գիտակից է երիտասարդականը եւ այս գծով, պետական մակարդակով նոյնիսկ կրնայ պարտականութիւններ ստանձնել եւ ներգործօն քաղաքական դերակատարութիւն ունենալ ոչ թէ միայն իր մակարդակի հարցերու դիմագրաւման մէջ, այլ նաեւ այդ ճամբով ՀԱՅ ԴԱՏի բնագաւառէն ներս:
Յառաջիկայ ամիսներուն, ամէն տեղ երիտասարդականը անսակարկօրէն պիտի նուիրուի իր միութեան եւ ընդհարապէս հայութեան աշխատանքները յաջողապէս կատարելու համար, եւ կրկին կը նշենք…յատկապէս Հայոց Ցեղասպանութեան 100-ամեակի բնագաւառէն ներս:
Երիտասարդնե՛ր…գործ ունինք կատարելիք:
Ջահը վառ…եւ վեր, ձեր ձեռքերուն մէջն է:

 

 

Be the first to comment

Leave a Reply

Your email address will not be published.


*