0
0
Հ.Հ.եւ ընդդիմադիր Հայ ազգային քոնկրէսի պատուիրակութիւններուն միջեւ տեղի ունեցած հանդիպումները շարունակուեցան եւ իբրեւ արդիւնք որոշուեցաւ ու համադրուեցաւ երկխօսութեան օրակարգը:
Օրակարգին վրայ ներառուած են երկու հարցեր` առաջին` Հայաստանի մէջ օրինական իշխանութեան շուտափոյթ ձեւաւորման նպատակով արտակարգ նախագահական եւ խորհրդարանական ընտրութիւններու կայացում եւ անոնց ազատութեան, արդարութեան եւ օրինականութեան ապահովման անհրաժեշտ միջոցառումները եւ երկրորդ` ընտրութիւններու պատշաճ կայացման նպատակով քաղաքակիրթ մրցակցութիւնը ապահովող կանոններու ձեւաւորումը:
Հայ ազգային քոնկրէսի ձեւաւորած պատուիրակութեան ղեկավար, քոնկրէսի համակարգող Լեւոն Զուրաբեան լրագրողներուն հետ հանդիպման ընթացքին յայտնեց, որ քոնկրէսը առաջարկած է նախագահական արտակարգ ընտրութիւններ կայացնել Հոկտեմբերի կէսերուն: Քոնկրէսին կարծիքով, նախագահական արտակարգ ընտրութիւնները պիտի ստեղծեն լրջագոյն երաշխիքներ նաեւ խորհրդարանական ընտրութիւններու արդար, ազատ եւ օրինական կայացման համար:
Ան աւելցուց, որ հանդիպման ընթացքին առաջարկներու մանրամասնութիւնները չեն քննարկուած եւ երկխօսութեան մասնակից կողմերը իրենց ժամանակը նուիրած են միայն երկխօսութեան օրակարգին ձեւաւորման:
