ԿԵԴՐՈՆԱԿԱՆՑԻՆ ԿՐԿՆԱԿԻ ՍԳԱՒՈՐ

0 0
Read Time:1 Minute, 33 Second

 

            Արմենակ եւ Էլպիս, Միջինքին այցելութեան եկան որպէսզի առանձին չըլլան եւ մենք ալ առանձին չմնանք: Մակարուհին ձէթով ճաշեր պատրաստած էր, հայկական եւ արաբական: Հայկական շիշ մը գինի ալ սեղան դրաւ:

            Արմենակ քչախօս դարձեր էր, Էլպիս եւ Մակարուհի քաղաքական մեկնաբանի պէս Հայաստանի կացութիւնը կը վերլուծէին, ինչե՜ր լսած եւ ամբարած էին: Ոչ ոքէ պակաս հմտութեամբ, ինչպէս բոլոր հայերը: Կրնային արտակարգ եւ լիազօր դեսպան ըլլալ 

            Օգտուելով կիներու լռութենէն, հարց տուի Արմենակին.

            – Ի՞նչ ունիս, հիւա՞նդ ես, որ սփինքսի պէս անխօս նստեր ես:

            – Տխուր եմ: Նիւ Եորքի գրոց-բրոց տարիքոտ զարմուհիիս մահը իմացայ ել-նամակով ստացուած հայկական թերթէն:

            – Ցաւակցութիւններս:

            – Մակա՛ր, մօտի կամ հեռուի ծանօթի մահը միշտ կը տխրեցնէ: Աւելի տխրեցայ երբ մահազդը տեսայ: Հայերէն թերթ եւ գիրք սիրող ու կարդացող Հայկանուշ զարմուհիս երկու անգամ թաղեր են:

            – Ինչպէ՞ս կ’ըլլայ այդ:

            Արմենակ գրպանէն էջ մը հանեց եւ դրաւ սեղանին վրայ:

            – Ահա թերթի մահազդը. կարդա՛, եւ մի՛ տխրիր: Կարդա՛ բարձրաձայն, կիներն ալ թող լսեն:

            Գրուած էր. «OBITUARY – ՄԱՀԱԶԴ», եւ էջ մը անգլերէն անուններ, մօտ եւ հեռու ազգականներու, նաեւ՝ Smith եւ  Aridi: Եկեղեցիին անունը, գերեզմանատան անունը եւ ցաւակցութեան վայրը՝ անգլերէն:

            Երբ ընթերցումը աւարտեցի, պահ մը լուռ մնալէ ետք, Արմենակ զսպուած զայրոյթով ըսաւ.

            – Հայկանուշ զարմուհիս թաղեր են ամերիկացիի պէս: Վստահ եմ անգլերէն չխօսող Հայկանուշին դամբանականն ալ տէրտէրը անգլերէն խօսած է, Ամերիկայի անդենականի դրախտ անոր մուտքը դիւրացնելու համար:

            – Արմենա՛կ, մի՛ յուզուիր, ժամանակին հետ քայլ պէտք է պահել:

            – Ա՛խ այս գործնապաշտութիւնը: Մեր լրատուամիջոցները դարձան օտարալեզու, ժողովները՝ օտարալեզու, քարոզները՝ օտարալեզու, տուները՝ օտարալեզու, բայց շաբաթավերջին բեմերէն կը պոռանք հայապահպանում: Հայաստան ներածելիք բան չգտնելով օտար բառեր կը ներածեն հայերէնը վերամշակելու համար, վասն նորարարութեան, իսկ դուրսը մեռելներն ալ կ’օտարացնենք:

            Էլպիս եզրակացուց.

            – Հերիք է, մարդ, քեզ ճանչցած օրէս Տոն Քիշոթութիւն կը խաղաս եւ չես տեսներ որ կղզիի վրայ առանձին մնացած Ռոպէնսոն ես:

            Թէեւ գարնան սկիզբն էր եւ դեռ լոյս կար, բայց թագաժահրը կը պարտադ-րէր, որ չտուգանուելու համար ժամը վեցէն առաջ տուն հասնէին:

 

Մակար ի Գաղիա, 13 Մարտ 2021

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %
Previous post Մեկուսացուածի թափառումներ.- ՄԱՐԴ ԵՒ ԸՆԿԵՐՈՒԹԻՒՆ ԹԱԳԱԺԱՀՐԻ ՀՈԳԵԲԱՆԱԿԱՆ ԵՒ ՏՆՏԵՍԱԿԱՆ ԱՂԷՏԻ ՑԱՆՑԻՆ ՄԷՋ
Next post Փնտռելով Հետքերը Մեր Իրազեկութեան

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published. Required fields are marked *

Social profiles