Գառնիկ Ալաճաճեան Արեւելեան Ա․Մ․Ն․-ի Հայ Օգնութեան Միութեան 250 Հազար Տոլար Կը Նուիրէ  Հիմնելով Կրթաթոշակի ֆոնտ

ՈՒԱԹԸՐԹԱՈՒՆ (Մասաչուսէց),- Հայ Օգնութեան Միութեան Արեւելեան Միացեալ Նահանգներու Շրջանային Վարչութիւնը ուրախութեամբ կը յայտարարէ, թէ Նիւ Եորք նահանգի Հայ համայնքին երկարատեւ ծառայութիւն կատարած՝ Գառնիկ Ալաճաճեանի նուիրած է 250 հազար տոլար, հիմնելով Ալաճաճեան Ընտանիքի անունով Կրթաթոշակի ֆոնտ մը։

«Ես գիտեմ թէ ինչ դժուարութիւններու կը հանդիպին ուսանողներ, որոնք կը ձգտին բարձրագոյն ուսումի տիրանալ, այդ հիման վրայ փափաքեցայ հիմնել այս Կրթաթոշակը։ Իմ կրտսեր քոյրս՝ Սոնիա Պզտիկեանը, 45 տարիէ ի վեր կը ծառայէ ու անսակարկ կը նուիրաբերէ Հայ Օգնութեան Միութեան.  իր հաւաստիքն ու հաւատարմութիւնը այս կազմակերպութեան հանդէպ խրախուսեց զիս հիմնելու այս ֆոնտը Արեւելեան Միացեալ Նահանգներու Հայ Օգնութեան Միութեան», նշեց Գառնիկ Ալաճաճեան։

Սոյն Ֆոնտը պիտի օգնէ Մերձաւոր Արեւելքէն ժամանաած Հայ ուսանողներուն, որոնք կը ձգտին ստանալ իրենց բարձրագոյն ուսումը Ամերիկայի համալսարաններէն ներս։ Դիմումնագրեր պիտի ընդունուին 2022-էն սկսեալ։

«Շրջանային Վարչութեան ու աշակերտներու անունով որոնք պիտի օգտուին այս նպաստէն, շնորհակալութիւն կը յայտնենք Պարոն Գառնիկ Ալաճաճեանին», նշեց Հայ Օգնութեան Միութեան։ Գառնիկ Ալաճաճեանին տեսլականը օգնելու ուսանողներուն, նաեւ ներդրում է մեր համայնքի ու հայրենիքի ապագայի համար» յայտնեց Արեւելեան Միացեալ Նահանգներու Շրջանային Վարչութեան ատենապետուհի՝ Անի Աթթար։

Հետաքրքրուած ուսանողները կրնան հետեւիլ Հ․Օ․Մ․-ի Արեւելեան Ա․Մ․Ն․-ի կայքէջին կրթաթոշակի մասին տեղադրուելիք ապագայ յայտարարութիւններուն։

Վահան եւ Ակնէս Ալաճաճեան, Հայոց ցեղասպանութենէն վերապրած բնակութիւն հաստատած են Ալեքսանդրիա (Եգիպտոս) փնտռելով խաղաղ նոր կեանք։ Այս սիրալիր ընտանեկան բոյնին աւելցան երեք զաւակներ. Անահիտ, Գառնիկ եւ Սոնիա։

1955-ին Գառնիկ կը մեկնի Ամերիկա շարունակելու իր բարձրագոյն ուսումը Ֆարլէհ Տիքինսըն համալսարանի Ելեկտրական մարզէն ներս։  Աւարտելէ ետք ան կը գործէ ելեկտրոնային մարզին Bell Systems ընկերութեան մէջ, միաժամանակ ստանալով իր մագիստրոսը։

Ապա, Պարոն Ալաճաճեան փոփոխութեան կ՛ենթարկէ իր ասպարէզը եւ կը գործէ անշարժ գոյգի, կալուածներու բնագաւառէն ներս, աւելի քան 10 տարի մաս կազմելով  Century  21 ընկերութեան,  նախ որպէս վաճառող, ետքը որպէս գործընկեր։ 1980 թուականին ան կ՛որոշէ հիմնել իր անձնական ընկերութիւնները, Anchors Away Realty  եւ  AAR Funding։ Նաեւ սկսաւ LAK Construction Corp տուներու շինարարական աշխատանքներուն,  Նիւ Եորքի Քուինզ շրջանին մէջ։  Իր փորձառագիտութիւնը պատճառ դարձաի, որ ան ըլլայ ԱԼՄԱ Դրամատան Վարչական անդամ։

Իր յաջող գործընթացին զուգահեռ, Գառնիկը գործունեայ անդամ եղաւ իր գաղութէն ներս. Ան կը ծառայէ Նիւ Եորքի Սուրբ Սարգիս Առաքելական Եկեղեցւոյ եւ իբրեւ հաւատաւոր պատգամաւոր, շարունակ կը ներկայանայ Ազգային Երեսփոխանական Ժողովներուն։ Ան անդամ է նաեւ Համազգային մշակութային եւ կրթական Ընկերակցութեան, ուր մեծ նուիրումով, զբաղուած է թատերախումբով։

Իր ազատ ժամերուն Գառնիկ կը զբաղի նկարչութեամբ։ Ան կը բնակի Նիւ Եորք, իր կնոջ Ալիսի (Պէզազեան) հետ, իր աղջկան Սոնիայի եւ անոր օրհնեալ ընտանիքի երեք թոռնիկներու՝ Թալին, Անիթա եւ Նարինէ կողքին։

Be the first to comment

Leave a Reply

Your email address will not be published.


*