Ս Ա Ղ Մ Ո Ս    Լ Ի Ա Ք Ի Ս Տ

Վեհանոյշ Թեքեան

 

Հաւատացեա՜լ եմ.

Աշխարհի բոլոր խորան-խուցերուն,

Մայր-տաճարներուն,

Արևագալին ու մութ գիշերին

Ե՛ւ փոթորիկին ե՛ւ շոգ շողերուն

Խունկ տատիկներուն, այրի կիներուն

Քով մինակ կանգնած հաւատացեալն եմ,

Բոլոր ջահերը մարեցէ՛ք այլևս

Պիտի աղօթեմ:

 

Արարի՛չ, գիտես,

Ես հրկիզեցի աղօթքներս վեհ

Մեհեաններու մէջ սիրոյ ու սիրոյ.

Գեղեցկութեան մէջ, հաճոյքի, երգի՝

Ամոքում չկար ցաւերուս բորբոք:

Հաւատացեալդ եմ արդ. միայն, միայն

Սուրբ, սո՜ւրբ եղիցի անուն Քո…

 

Հասեր եմ այստեղ քառուղիներէն սարսափող մահուան,

Օդանաւերէն շպրտուած ռումբեր՝ ափերուս փափուկ,

Բորբ հայեացքիս մէջ՝ տնքացող հառաչ,

Անհաւատալի նենգութեան շառաչ,

Ձայներ թաւ ու թաց՝

…Եկեսցէ արքայութիւն Քո…

…Եղիցին կամք Քո…

…Որպէս…

Մնացեալը ջնջուեր է, Տէր, անգործնակա՞ն էր այդքան:

 

…Զհաց մեր հանապազորդ, տո՜ւր մեզ այսօր…

Հաւատացեա՜լն եմ

Մեր թոնիրներուն:

Ամենակա՛լ Տէր,

Թող աշխարհի մէջ երաշտի՛ երաշտ մնայ միմիայն,

Թո՜ղ մեր արտերը

Մեր յորդ, անթառամ ժպիտով ծաղկին,

Մեր ողկոյզները

Արևահաս օրհնութիւններով թող յղիանան,

Թող Լոյսի, Հողի նաւասա՛րդ ըլլայ:

Այո, թող որ ալ

Մոխիր չթառի մեր աղ ու հացին

Ու մեր սրտերուն ոխ չսերմանուի։

 

 

…Ինչպէս եւ մենք

Թողումք մերոց պարտապանաց…

Թող մեր կիներուն նրբազանգ ծոցը

Ծլի ու ծաղկի, լուսացան մնայ,

Մեր մանուկներուն թուշերուն վրայ

Թող խաղաղութեան համը թարմանայ,

Ու մեր հայրերուն, մեր ողջ հայութեան ափերուն միջև

Գինին թող արիւն չհագուի՛ յանկարծ,

Պատառ մը Հողը թող հալա՜լ մնայ։

 

…Եւ մի տանիր զմեզ ի փորձութիւն…

Եւ նաև հզօր հաւատացեալն եմ

Մեր կամարներուն հոյլ-հոյլ ծփացող շարականներուն,

Մեր խաչքարերուն, ձեռագիրներուն,

և գմբէթներուն մեր գլխակորոյս…

 

… Այլ փրկեա՛ զմեզ ի չարէ…

Տո՜ւր մեր ազգին հզօրութիւն,

Վախ ու դողին՝ իմաստութիւն,

Ազգիս հայոց՝ սէր, միութիւն,

Շեղում ՝ ճամբէ ինքնակործան,

Աստուածատուր պաշտպանութիւն։

Եւ հիւանդաց՝ առողջութիւն,

Սգահարաց՝ խոր սփոփանք,

Որբուկներուն՝ լոյս ապագայ,

Մեր սուրբ Հողին ու Տաճարին՝ ո՛չ մէկ զրկանք։

Մե՜զ ալ օծէ արքայութեամբ ու զօրութեամբ,

Փառքով, պատուով անվաղնջեան։

 

Վերջին խնդրանքս, ամենագո՛ւթ Տէր,

Երբ ցանկաս՝ գինիի, արևի, երգի սիրահար

այս աշխարհամասը խախտել վերստին՝

Նայէ՜ Անիին……

…Յաւիտեանս յաւիտենից

Ամէն:

 

 

Be the first to comment

Leave a Reply

Your email address will not be published.


*