ՊԱՀԱՆՋՈՒԱԾԸ ՀԱՆԴՈՒՐԺՈՂԱԿԱՆՈՒԹԻՆՆ ՈՒ ԽԵԼԱՄՏՈՒԹԻՒՆՆ Է

0 0
Read Time:2 Minute, 14 Second

Ա.Ա.
Վերջին օրերուն հայրենի մամուլին թէ ընկերային հաղորդակցութեան միջոցներու եւ թելեկրամեան գրառումներու մէջ բազմիցս հրապարակուեցաւ ամենայն հայոց բանաստեղծ Յովհաննէս Թումանեանի նամակը՝ բանաստեղծ, հեքիաթագիր, հասարակական գործիչ, “Նեմեսիս” գործողութեան կազմակերպիչներէն՝ Աւետիք Իսահակեանի, որ Վենետիկ ապրած միջոցին Թումանեանէն խնդրած է որոշ տեղեկութիւններ Հայաստանի եւ հայկական իրավիճակին մասին։ Այդ ժամանակ Յովհաննէս Թումանեան կը գտնուէր Կոստանդնուպոլիս՝ գլխաւորելով Հայաստանի Օգնութեան Կոմիտէի պատուիրակութիւնը։ Թումանեան կոմիտէի նախագահն էր եւ պատուիրակութեան անդամներուն հետ մեկնած էր Կոստանդնուպոլիս, հայ գաղթականներու օգնութեան կազմակերպչական աշխատանքներու նպատակով։ Իսահակեանի ուղղուած նամակն ալ գրուած է Կոստանդնուպոլիս, 9 Դեկտեմբեր 1921-ին։
Ամենայն Հայոց Բանաստեղծը իր նամակին մէջ կը գրէ․-
«Ես չեմ ուզում եւ չեմ կարող երկար բարակ գրել մեր երկրից, թէեւ դու հարցնում ես։ Կարճ ասեմ։Մենք թէ՛ դրսից, եւ թէ՛ ներսից քանդեցինք մեր երկիրը։ Գլխաւորապէս մենք։ Մենք եմ ասում, եւ սրա մէջն է ճշմարտութիւնը։ Մի մասը խաչագող սրիկաներ, մի մասը գողեր եւ աւազակներ, մի մասը ապիկար թշուառականներ, եւ չերեւաց մի բազմութիւն, գոնէ մի խմբակ, որ վերածնուող երկրին շունչը եւ բարոյական կարողութիւնը յայտնաբերեր։ էսքան աղէտների եւ պարտութիւնների մէջ ո՛չ մի մեղաւոր չերեւաց, ո՛չ ոք ոչ պատասխանի կանչուեց, ոչ պատասխան տուեց։ Եւ շարունակւում է։այժմ էլ նոյն մարդիկը, նոյն ճանապարհներով….Եւ ոչ մէկը անձնասպան չեղաւ, որ ապացուցէր, թէ գոնէ ամօթ եւ խղճմտանք կայ էս մարդկանց մէջ կամ էս ժողովուրդի մէջ։ Բայց ես ինչ եմ ասում… չկարողացան գոնէ վշտանալ, կամ վշտացած երեւալ»։
09-12-1921 Կոստանդնուպոլիս- Վենետիկ
Հարիւր տարի առաջ կատարուած թումանեանական նշումները այսօր աւելի քան ուսանելի են։Հայաստան մխրճուած է այնպիսի իրավիճակի մը մէջ, որ կրնայ աւելի ու աւելի տագնապալի դառնալ, եթէ բանականութեան, խելամտութեան, հանդուրժողականութեան, իրատեսութեան եւ հայրենասիրութեան վերադարձ չըլլայ։ Հիմա ոչ ժամանակն է յանցաւորներ փնտռելու, ոչ ալ նախկինները յանցաւոր հռչակելու։ Հիմա ժամանակն է տրամաբանութեան տիրապետութեան, որպէսզի ի մի բերուին բոլոր ուժերը, կշռադատուի կացութիւնը, սերտուին անել վիճակէն դուրս գալու ընդունելի ուղիներն ու միջոցները եւ բոլորը՝ ձեռք ձեռքի, աշխատանքի լծուին,վերակերտելու համար հայոց հայրենիքը, «երկիր դրախտավայրը», որ եթէ այսպէս շարունակուի, պիտի վերածուի թշուառներու երկրի մը։
Բայց ինքզինք կը պարտադրէ հարցում մը։Ե՞րբ բոլորը, իշխանութիւնները եւ ընդդիմութիւնը, անտարբերները եւ սրտցաւները, դժգոհները եւ գոհունակները, քով քովի պիտի գան, ու փոխանակ փողոցներու մէջ զիրար հալածելու, իրարու հասցէին մեղադրանքներ արձակելու, Հայաստանի շահերը գերադասեն Ամէն Բանէ Վեր եւ լծուին ազգաշէն աշխատանքի։ Ասիկա զոհողութիւն, զիջում եւ իսկական հայրենասիրութիւն կը պահանջէ։Եւ ոչ ոք առաւել կամ նուազ չափով հայրենասէր է դիմացինէն։Աշխարհացրիւ հայութիւնը հայաստանցի իր եղբայրներէն եւ քոյրերէն խնդրելով կը պահանջէ։ Վերջ տալ այս անընդունելի իրավիճակին եւ վերադառնալ ակունքներուն՝ հանդուրժողականութեան, ներողամտութեան եւ դիմացինին արդար եւ տեղին մտահոգութիւնները բաժնելու եւ ըստ այնմ գործի լծուելու հայավայել պատրաստակամութեամբ։
Երեւանի երկու գլխաւոր Ազատութեան եւ Հանրապետութեան հրապարակները պէտք չէ վերածուին իշխանութիւններ – ընդդիմութիւն բախման բեմերուն։Ժողովուրդը ամբողջ հիմա ունի լաւագոյն ընտրանքը՝ համախմբուիլ բանակին շուրջ եւ հարցերուն լուծումներ գտնել հանդարտ եւ անհանդուրժողականութենէ հեռու մթնոլորտի մը մէջ։Այլապէս իրավիճակը ծանր եւ վտանգաւոր հետեւանքներ կրնայ ունենալ։

 

 

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %
Previous post Յայտարարութիւն՝ Հ․Յ․Դ․ Բիւրոյի
Next post Հայաստանի Պառակտումները Այլ Ձեւով Հասկնալու Եւ Յաղթահարելու Փորձ․- ԴԺԳՈՀՈՒԹԻՒՆ, ՔԷՆ, ՓԱՌՔ, ԵՍ ԵՒ ՉԱՐԱՇԱՀՈՒՄ ՊԱՐԱՐՏ ԵՆԹԱՀՈՂՆ ԵՆ ՔԱՂԱՔԱԿԱՆՈՒԹԵԱՆ

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published. Required fields are marked *

Social profiles