Պիտի Ուզէի Մանկանալ

Տարօն Պարոյր Հալլաճեան
Թորոնթօ
Դեկտեմբեր 9, 2020

Պիտի ուզէի մանկանալ,

Որպէսզի չիմանամ թէ ինչ կը նշանակէ աշխարհէն ապականուիլ։
Պիտի ուզէի մանկանալ որպէսզի չիմանամ
Թէ ինչ կը նշանակէ ըլլալ ազգատեաց ու կանխակալ։
Պիտի ուզէի մանկանալ որպէսզի չիմանամ դրամամոլութեան
Մոլուցքը եւ սադրիչ քաղաքականութեան անողորմ դրդապատճառը։
Պիտի ուզէի մանկանալ որպէսզի երիտասարդ մօրս ժպիտը տեսնեմ,
Եւ չգիտնամ դժխեմ պատճառները մօրենական արցունքի։
Պիտի ուզէի սրբել մտքիս խորհուրդները,
Ու զգալ զուլալ խիղճը անապակ մանկան,
Ու խնդալ առանց ցաւի ու վշտի։
Պիտի ուզէի տեսնել աշխարհը խաղաղ ու բարի,
Եւ ո՛չ ցաւագին ընկղմած՝ անել ու մռայլ խորերուն անդունդի։
Պիտի ուզէի խաղաղութեան խինդը բերել անմխիթար սրտերու,
Ու վերադարձի աւետիսը սպասողներուն՝
Անհետ կորուստներու։
Պիտի ուզէի մանկանալ,
Ու չզգալ ցաւը մի ողջ ազգի,
Այլ միայն գորովալից գգուանքը,
Հօրենական բազուկի։
Պիտի ուզէի ըլլալ բիւրեղ մանուկի մը նման,
Աշխարհի մը մէջ դաժան, բայց ո՛չ անթարմանելի։
Պիտի ուզէի մանկանալ, ո՛չ մարմնով, ո՛չ խելահասութեամբ, այլ հոգիո՛վ, Հոգի՜, որպէսզի ապրեցնեմ հոգիով մեռածը այս կեանքին ամեհի։
Պիտի ուզէի մանկանալ…

Be the first to comment

Leave a Reply

Your email address will not be published.


*