Վարչապետ Փաշինեանի Հրաժարականը Պահանջող Ցոյցերը Կը Շարունակուին

ԵՐԵՒԱՆ.- Նոյեմբեր 18-ին, Ազատութեան հրապարակին վրայ տեղի ունեցաւ Հայրենիքի փրկութեան շարժման հանրահաւաքը` Նիկոլ Փաշինեանի հրաժարականի պահանջով:

Խօսք առաւ Հ.Յ.Դ. Հայաստանի Գերագոյն մարմինի անդամ Արթուր Խաչատրեան, որ յայտնեց. «Թրքական զօրքը Ատրպէյճան է, զբօսաշրջութեա՞ն եկած են: Պարսկական զօրքը սահմանին վրայ է, գործ բան չունին, անոր համա՞ր եկած են: Ռուսական զօրքը Հայաստան ու Արցախ է, պարզ չէ՞, որ այստեղ կաթսայ մը կ՛եռայ, յստակ չէ՞, որ շրջանը վաղը կրնայ պայթիլ, որ Հայաստանը կրնայ դառնալ մեծ պետութիւններու պատերազմի թատերաբեմ, որ կրնայ Հայաստանը ոտնատակ ըլլալ: Այս պայմաններուն մէջ մենք այս վարչապետի՞ն արժանի էինք: Այն վարչապետին, որ 2,5 տարուան ընթացքին ոչ մէկ բան ըրաւ»:

«Երկիր մետիա» պատկերասփիւռի կայանի լրատուական եւ հասարակական-քաղաքական հաղորդումներու տնօրէն Գեղամ Մանուկեան, իր կարգին տեղեկացուցւ, թէ վարչապետ Նիկոլ Փաշինեանը պէտք է հեռանայ, որովհետեւ անոր անլուրջ ղեկավարումով մենք չենք կրնար մեր երկրին մէջ վիճակ փոխել, մեր երկիրը մէջքը չի կրնար ուղղել:

«Հայաստանի զինուած ուժերու սպայակոյտի ընդհանուր հրամանատարը պատերազմի մեկնարկէն 4 օր ետք` 2 հոկտեմբերին, Հայաստանի բարձրագոյն ղեկավարութեան տեղեկացուցած է, որ վիճակը լուրջ է, եղած նիւթական եւ մարդկային ներուժը սահմանափակ է: Հայաստանի վարչապետը 8 հոկտեմբերին կը հրապարակէ տեսանիւթ, ուր իր գրասենեակին մէջ նստած, հեռաձայնով կը կապուի առաջնակէտեր եւ հերթապահ սպաներու եւ զինուորներու հետ կատակներ կ՛ընէ: Ռազմական գաղտնիքներ կը հարցնէ, սպաներն ու զինուորները չեն պատասխաներ, ան ալ երեխայի պէս կ՛ուրախանայ` վայ ինչ լաւ է, ռազմական գաղտնիք չէք բացայայտեր: Այս է Հայաստանի վարչապետ Նիկոլ Փաշինեանի լրջութիւնը այդ լրջագոյն պահուն: Այսպիսի անլուրջ պահեր եղան բոլոր օրերուն», նշեց Մանուկեան:

Հ.Յ.Դ. «Կամաւորական շարժում» կազմակերպութեան խորհուրդի անդամ Իկոր Սարգսեան ըսաւ. «Ինծի այստեղ հարթակ բերած է աստղաբոյլը իմ մարտական ընկերներուս, որոնք զոհուեցան առաջին պատերազմի ժամանակ, ինծի այստեղ հարթակ բերած է աստղաբոյլը իմ մարտական ընկերներուս, որոնք այսօր կանգնած են դիրքերուն վրայ եւ չեն ուզեր իջնել, չունին կորսնցնելիք հայրենիք: Եւ այսօր մէկը, որ առաքելութիւն ունէր յանձնելու, տարաւ մեր բոլորին արիւնը»:

Հանրահաւաքի հազարաւոր մասնակիցներուն կարգին էին Երեւանի մէջ ապաստան գտած արցախցիները, պատերազմին հարազատներ ու ընկերներ կորսնցուցած քաղաքացիները:

 

Be the first to comment

Leave a Reply

Your email address will not be published.


*