Երիտասարդական Անկիւն․- ՀԱՅՐԵՆԻՔՍ ՈՒ ԳՐԻՉՍ

0 0
Read Time:2 Minute, 28 Second

Նարօտ Քէյվանեան
Տիթրոյթ – Միշիկըն
(17 տարեկան, Հ․Ե․Դ․-ի «Կոպեռնիկ Թանտրճեան» մասնաճիւղի եւ Հ․Մ․Ը․Մ․-ի անդամ)

Երեքս նստած էինք՝ գրիչս, թուղթն ու ես։ Լռութիւն մը կար, որ կարծես ժամանակի սլաքներուն ձայնը կը բարձրացնէր, որպէսզի զայն լսելի դարձնէ սենեակիս բոլոր անկիւններէն։ Նիւթ մը կ՚ուզէի գտնել, որ ոչ եսակեդրոն, ոչ ալ շատ զգացմունքային ըլլայ։ Բոլոր միտքերս դէպի Հայրենիք կ՚երթային։ Այս մտասեւեռումս նախ ապշեցուց, յետոյ տակնուվրայ ըրաւ զիս։ Անդրադարձայ, որ Հայրենիքս «սեփականացնելու» տարօրինակ հակում մը ունիմ. Լա՞ւ է, թէ՞ վատ՝ չեմ գիտեր։ Հայրենի տաղանդաւոր երգիչ Ֆորշ կ՚ըսէ. «Երեւանը տուն ու շէնք չէ, Երեւանը մենք ենք»։
Հայրենիքիս մասին խօսած ժամանակ անգամ կ՚աշխուժանամ, եռանդով կը լեցուիմ։ Սահեան կ՚ըսէ. «Հայաստան ասելիս հասակս ծաղկում է. Չգիտեմ՝ ինչո՞ւ է այդպէս»։ Անկեղծօրէն այս հարցին պատասխանը զիս ալ շատ կը հետաքրքրէ։ Երբ հայրենիքիս մասին կը խօսիմ մէջս փոթորիկ մը կը սկսի, անտեսանելի արմատներով կը խրիմ հողին ու կ՚անշարժանամ։ Հիմա ինչպէ՞ս ելլեմ տեղէս՝ քալող ծառի՞ պէս։ Հայրենիքս երբեմն դէմքիս ժպիտ կը բերէ, երբեմն՝ տխրութիւն։ Կը տխրիմ, որովհետեւ այդ հսկայ «ծովից-ծով» Հայաստանէն միայն բուռ մը հող մնաց. կը ժպտիմ, երբ կը մտաբերեմ մեր պայքարը, որ Արցախեան յաղթարշաւով փայլուն սկիզբ ունեցաւ, իսկ Մուշով, Անիով ու Արտահանով՝ պատուաբեր աւարտ պիտի ունենայ։
Իրավիճակը աւելի կը բարդանայ, երբ միայն երեքով ըլլանք՝ գրիչս, թուղթն ու ես։ Ձեռագիրս՝ անհասկնալի, միտքերս՝ արագավազ։ Թուղթերը իսկական քարտէսներու կը վերածուին. միտքերս ամէնուր առանձին պղպջակներու մէջ հետզհետէ աւելի կը խճճուին։ Գրելու գործընթացին զուգահեռ վերծանման հսկայական գործ մը կը դիզուի, որ միշտ աւելի դժուարանցանելի կ՚ըլլայ եւ գրիչս վար դնելով հետախոյզի մը կը վերածուիմ։ Կէտադրական նշաններն ալ կը խեղճանան, բոլոր ստորակէտերը, միջակէտերը, պարոյկներն ու վերջակէտերը իրարու կը խառնուին եւ իրար ամուր գրկած կը սպասեն հետախոյզին, որ զիրենք կը տարանջատէ եւ կ՚ուղղորդէ իրենց պատշաճ տեղերը։ Բոլոր կէտադրական նշաններէն միայն բութին ու բազմակէտին տեղերը յայտնի են։ Երբ հայրենիքս է թեման սղելը կը դառնայ անընդունելի, անկարելի ու անիմաստ։ Բազմակէտին տեղն ալ յայտնի է, որովհետեւ Հայրենիքիս մասին ինչքան գրեմ ու խօսիմ, ապագայի ակնկալիքներով լեցուն կը մնայ եւ անաւարտ…
Երբ կը մտածեմ Հայրենիքիս մասին, կ՚ուզեմ զինուոր դառնալ, որ զայն պաշտպանեմ. շինարար՝ որ ԱրեւմտաՀայաստանը ԱրեւելաՀայաստանին կապող կամուրջներ կառուցեմ. պատմաբան՝ որ զայն ուսումնասիրեմ եւ միշտ նոր գանձեր բացայայտեմ. բուսաբան՝ որ անոր լեռնային ու դաշտային ծաղիկներու բոյրով արբենամ. ճանապարհաշէն՝ որ միակողմանի ճանապարհ գծեմ դԷպի տուն, ուրկէ հեռանալու հնարաւորութիւն չըլլայ. ճարտարապետ՝ որ հին շէնքերու կողքին նորերը յատակագծեմ վարդագոյն տուֆով. քանդակագործ՝ որ կիսաքանդ խաչքարերու կողքին նորերը քանդակեմ. երաժիշտ՝ որ անդադար անոր գովքը հիւսեմ ու երգեմ անոր մասին. նկարիչ՝ որ սխալ գծուած սահմանները կարմիրով ուղղեմ. մանկավարժ՝ որ սէր սերմանեմ մանուկներու հոգիներուն մէջ. օդաչու՝ որ ազատ թռչիմ անոր ամպերուն մէջ ու արծիւներուն հետ մրցիմ. լողորդ՝ որ լողամ անոր սառնօրակ ջուրերում մէջ՝ կապոյտ շրթունքներով, բայց պայծառ ժպիտով. բժիշկ՝ որ հիւանդին յոյս ներշնչեմ ու բուժման համար արտասահման չուղարկեմ. դատախազ՝ որ արդարութեան ձայնը լսուի. աղբահաւաք՝ որ Երկիրս միշտ մաքուր մնայ. երթուղայինի վարորդ՝ որ անծանօթներու հետ մտերմաբար զրուցեմ. ծերունի՝ որ բարի ժպիտով վարակեմ տխրադէմ անցորդները։
Կ՚ուզեմ ծառ մը ըլլալ Հայաստանիս սահմանին՝ քանի որ Հայրենիքը սահմանէն կը սկսին սիրել, եւ քանի որ այլեւս երբեք չեմ ուզեր զայն լքել…

 

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %
Previous post ՆԷՕ ՕՍՄԱՆՈՒԹԵԱՆ ՄՇԱԿՈՒԹԱՅԻՆ ԳՈՐԾՕՆԸ
Next post ՄԱՐԴԻԿ ԿԸ ԳՐԵՆ ՊԱՏՄՈՒԹԻՒՆԸ, ՈՐ ՍՈՍԿ ԹԻՒ-ԹՈՒԱԿԱՆ ՉԷ

Average Rating

5 Star
0%
4 Star
0%
3 Star
0%
2 Star
0%
1 Star
0%

One thought on “Երիտասարդական Անկիւն․- ՀԱՅՐԵՆԻՔՍ ՈՒ ԳՐԻՉՍ

  1. Մեծ պրավօ մը Նարոտին, որ ասանկ աղուոր բան մը գրեր է. պրավօ Հայրենիք թերթին, որ աս գրութիւնը տպեր է: Աս աշակերտը կրնայ լաւ գրող ըլլալ երբոր ասանկ քաջալերոութիւն առնէ: Ուրիշ պատանիներ եւ երտասարներ ալ պէտք է գրեն Հայաստանի եւ Արցախի մասին իրենց մտածումը եւ զգացումըն, որպէսզի նայինք, որ երիտասարդ սերունդին իրական կապը ուրտեղէն է: Պրաւօ բոլոր քաջալերողներուն:

Leave a Reply

Your email address will not be published. Required fields are marked *

Social profiles