ԿԾԿՈՒՄ

ՍՕՍԻ ՄԻՇՈՅԵԱՆ ՏԱՊՊԱՂԵԱՆ

3 Յուլիս 2020

Երեւան

 

 

 

***

Տարտս տուի քոյրիկիս

քոյրիկս առաւ.

չէ՞ որ քոյրս երկրորդ մայրս է։

Բուռ չդարձաւ, ուղղութիւն տուաւ։

 

***

30 Յունիս, Հալէպ,

ջարդուփշուրի օր.

«Շարը թող երթայ»

-Գոնէ հին պնակ մը կոտրէիր։

-Նորը աւելի ազդու է։

 

***

Պարտէզին տերեւը անընդհատ կը շարժի։

Կատուս է։

 

***

Խխունջի խեցիներ հաւաքեցի

բաղնիքս զարդարեցի.

ու հիմա լոգցած ատենս

կը խորհիմ այն խխունջներուն մասին,

որոնք ժամանակաւորապէս դուրս ելած էին իրենց տուներէն,

կարծելով որ ետ պիտի դառնան…

Ես ոչ անտուն եմ, ոչ էլ տարագիր

 

***

Անոյշ խօսքը օձը ծակէն կը հանէ– ըսին։

Ինչո՞ւ կ՚ուզեն որ օձը ծակէն դուրս գայ։

Թող մնա տունը

եղած տեղը.

չթունաւորէ

չվարակէ։

 

***

Ձախորդ օրերը կը յամենան երթալու
մեր համբերութիւնը փորձելով։
Քար պէտք է դնել մեր անհամբեր փորին վրայ

այս օրերն ալ կ՚անցնին

 

***

Ձանձրոյթը փաթթեց երազներուն

ու ամէն ինչ պայծառացաւ,

ծիածանեցաւ։

Վերագտաւ կորսնցուցածը

ուզեց փարուիլ անոր

բայց ափսոս որ երազ էր

 

***

Իրերհասկացողութիւն կը դրսեւորենք անհասկացողութեամբ։

 

***

Գիշերը ցերեկ կ՚ըլլայ,
ցերեկը՝ գիշեր
ժամանակը կը դառնայ
նոյն տեղը
նոյնը ընելու։
Երազներ կը սպասեն,
յոյսեր կը սառին,
կանգ կ՚առնեն։
Ամէն ինչ կրկնութիւն
ունայնութեան շրջանակին մէջ։
-Այսօր ի՞նչ օր է։
– Նոյնշաբթի։

 

***

Վերադարձար,
տեղ չկար քովս:
Փլատակներուն մէջ,
սրտիս տունն ալ փլատակ դարձած էր:

 

***

Այդ ո՞ր ձուկն է,

որ բիւրեղը ձգած

պղտոր ջուրին մէջ լողալ կը փորձէ.

իսկ դուն երկար կարթը բռնած՝

պղտոր ջուրին մէջ ձուկ որսալ կ՚ուզես։

 

***

Երկինքը բացուեր

ծերեր կը կանչէ.

ամէն օր մէկը կ՚երթայ

անվերադա՜րձ։

Ու հոս մնացողները

այս մեկնումին անունը

Քորոնա կը դնեն։

 

***

Սահման չունէր,

շատ անմիջական էր։

Աշխարհը անծայրածիր,

մարդոց հետ կապը անսահման կը կարծէր.

մինչեւ որ մեծ գրիչով կարմիր գիծ մը գծեցին դիմացը.

«Սահմանդ գիտցիր, շատ մի՛ փակիր,

հեռաւորութիւն պահէ՛», յանդիմանելով։

Հիմա ան ինքզինք

շղթայակապ կը գտնէ…

Բանտիս դռներն էին եօթը ելքերով-

 

 

 

 

Be the first to comment

Leave a Reply

Your email address will not be published.


*