Լիբանանահայութիւնը Դատական Հարց Յարուցեց

ՊԷՅՐՈՒԹ․- Յունիս 16-ին, հայկական երեսփոխանական պլոքը, գլխաւորութեամբ Հ․Յ․Դ․ Լիբանանի Կեդրոնական կոմիտէի ներկայացուցիչ, երեսփոխան Յակոբ Բագրատունիի եւ պլոքի անդամ երեսփոխաններ Յակոբ Թերզեանի եւ Ալեքսանտր Մաթոսեանի, ինչպէս նաեւ խումբ մը փաստաբաններու ընկերակցութեամբ,  այցելեց իրաւաբաններու սենտիքայի նախագահին:

Պատուիրակութիւնը դատական հարց յարուցեց՝  Մունիր Հասան անունով անձի մը եւ Մերտինցիներու արաբական լիբանանեան միութեան դէմ, նկատի ունենալով հայութեան դէմ անոնց ունեցած վարկաբեկիչ արտայայտութիւններն ու Օսմանեան կայսրութեան կողմէ գործուած Հայոց ցեղասպանութեան գովաբանութիւնը, Լիբանանի պատկերասփիւռի կայանէ մը սփռուած յայտագիրի մը ընթացքին։

Աւելի քան 30 հայ եւ ոչ հայ իրաւաբաններ ստորագրեցին յարուցուած դատին տակ:

Հանդիպումէն ետք երեսփոխան Բագրատունի յայտնեց, որ  փոխանցուած են հայկական երեսփոխանական պլոքին որդեգրելիք քայլերուն մասին տեղեկութիւններ։

«Մենք կը հաւատանք դատական իշխանութեան եւ կը գործենք օրէնքի յարկին տակ եւ խումբ մը իրաւաբաններ համապատասխան մարմիններուն բողոք պիտի ներկայացնեն:  Այս հարցը զուտ իրաւական է եւ մենք պիտի չներքաշուինք սադրանքներու ու ծուղակներու մէջ, պիտի չտարուինք արարքներով Լիբանանը բաղկացնող հիմնական համայնքի մը դէմ գործուող գաղտնի սպասարկութիւններու, որոնք արտաքին զօրակցութիւն կը վայելեն: Այս յարձակումը բոլոր լիբանանցիներուն դէմ գործուած յարձակում կը նկատենք եւ կը վերահաստատենք, որ կը մերժենք փողոց իջնելու թակարդին մէջ ներքաշուիլ` հաւատալով, որ այս հարցին լուծումը միայն օրէնքն ու իրաւական համակարգն է», եզրակացուց Բագրատունի:

 

Be the first to comment

Leave a Reply

Your email address will not be published.


*