Գագիկ Ծառուկեանը Զրկուեցաւ Անձեռնմխելիութենէ


ԵՐԵՒԱՆ․- Յունիս 5-ին, «Բարգաւաճ Հայաստան»-ի քաղաքական խորհուրդի տեղի ունեցած է հրատապ նիստին, կուսակցութեան նախագահ Գագիկ Ծառուկեանը բոըռն կերպով քննադատած էր կառավարութիւնը, եզրակացնելով․- «Այսօր տեսնելով այս ձախողութիւնները, կրնամ ըսել, ոչ թէ 97, այլ 100 առ հարիւրը պէտք է փոխուի, որովհետեւ բոլոր ոլորտները ձախողած են»։
Այս սուր քննադատութիւնն ու ստեղծուած մթնոլորտը բաւարար եղաւ, որ Ծառուկեան յաւելեալ հետապնդումներու ենթարկուի։
Կիրակի, Յունիս 14-ի առաւօտեան, ազգային անվտանգութեան ծառայութիւնը խուզարկեց Գագիկ Ծառուկեանի բնակարանը:
Ազգային անվտանգութեան ծառայութիւնը երկու հաղորդագրութիւններով հանդէս եկաւ` տեղեկացնելով Ծառուկեանի ընտանիքին պատկանող ընկերութիւններուն ապօրինի գործունէութեան մասին: Ըստ այդ տեղեկութիւններուն՝ ապօրինի գործունէութեան իբրեւ արդիւնք՝ պետութեան պատճառ դարձած է 29 միլիառ դրամ արժող վնասի: Նաեւ, բացայայտուած են «Բարգաւաճ Հայաստան»-ի անդամներու կողմէ ընտրողները կաշառելու հարիւրաւոր պարագաներ:
Գագիկ Ծառուկեան իր տան դիմաց յայտարարեց, թէ իրեն նկատմամբ քաղաքական ճնշման փորձ կը կատարուի։
Ազգային անվտանգութեան ծառայութեան շէնքին դիմաց հաւաքուեցան «Բարգաւաճ Հայաստան» կուսակցութեան խմբակցութեան պատգամաւորները, ինչպէս նաեւ խումբ մը քաղաքացիներ, որոնք ներկայացան իբրեւ կուսակցութեան առաջնորդ Գագիկ Ծառուկեանի աջակիցներ, որոնք պնդեցին, թէ եղածը քաղաքական հետապնդում է: Արձանագրուեցան բախումներ, եւ ոստիկանները ձեռբակալեցին քաղաքացիներ:
Յունիս 16-ին, Ազգային ժողովը գաղտնի քուէարկութեամբ «Բարգաւաճ Հայաստան» խմբակցութեան ղեկավարը զրկեց պատգամաւորական աձեռնմխելիութենէ:
«Բարգաւաճ Հայաստան», «Լուսաւոր Հայաստան» խմբակցութիւնները չմասնակցեցան քուէարկութեան:
Հուսկ, Ազգային Ժողովը հաւանութիւն տուաւ «Բարգաւաճ Հայաստան» կուսակցութեան ղեկավար, պատգամաւոր Գագիկ Ծառուկեանը ազատազրկելուն համաձայնութիւն տալու մասին Հ․Հ․ Գլխաւոր դատախազի ներկայացուցած միջնորդութեան:

Be the first to comment

Leave a Reply

Your email address will not be published.


*