Արայիկ Յարութիւնեան՝ Արցախի Նախագահ

0 0
Read Time:1 Minute, 42 Second

ՍՏԵՓԱՆԱԿԵՐՏ․- Երեքշաբթի, Ապրիլ 14-ին Արցախի մէջ տեղի ունեցաւ նախագահական ընտրութիւններու երկրորդ փուլը, որուն մասնակցեցան 47․050 ընտրողներ։ Ընտրողներուն ընդհանուր թիւը 104․777 ըլլալով, մասնակցութեան տոկոսն էր 44․9։

Արդիւնքները ցոյց կու տան, թէ «Ազատ Հայրենիք-Քաղաքացիական Միացեալ Դաշինք» կուսակցութիւններուն կողմէ ներկայացուած թեկնածու Արայիկ Յարութիւնեան ընտրուած է Արցախի նախագահ։

Կեդրոնական ընտրական յանձնաժողովի նախագահ Սրբուհի Արզումանեան ներկայացուց արդիւնքները տեղեկացնելով, որ ի նպաստ Արայիկ Յարութիւնեանի քուէարկած է 39․860 ընտրող կամ ընտրողներուն 88 առ հարիւրը, իսկ Մասիս Մայիլեանի օգտին՝ 5428 ընտրող՝ ընտրողներուն 12 առ հարիւրը: Արզումանեան աւելցուց, թէ Արայիկ Յարութիւնեան 3784 ձայնով գերազանցած է իր նախկին ցուցանիշը: Ան աւելցուց, որ Արցախի Հանրապետութեան մէջ, ընտրողներու թիւն է  104,777:

Ընդամէնը 282 ընտրական տեղամասեր տրամադրուած էին, որոնցմէ մէկը` Երեւանի մէջ, Հայաստանի Հանրապետութեան մէջ Արցախի Հանրապետութեան մնայուն ներկայացուցչութեան շէնքին մէջ։

Նշենք թէ, Մարտ 31-ին տեղի ունեցած նախագահական ընտրութիւններու արդիւնքներուն համաձայն, ոչ մէկ թեկնածու կրցած էր ապահովել անհրաժեշտ քուէն: Արայիկի մրցակից Մասիս Մայիլեանը (արտաքին գործոց նախարար)  կոչ ուղղած էր չմասնակցելու երկրորդ փուլի  ընտրութիւններուն` նկատի ունենալով պսակաձեւ ժահրի տարածման վտանգը:

Հ․ Հ․ նախագահ Արմէն Սարգսեան հեռաձայնային հաղորդակցութիւն մը ունեցաւ եւ շնորհաւորեց Արայիկ Յարութիւնեանը` Արցախի  նախագահի ընտրութիւններու երկրորդ փուլին յաջողութեան հասնելու եւ Արցախի Հանրապետության նախագահի բարձր պաշտօնին  ընտրուելու առիթով:

Հ․Հ․ վարչապետ Նիկոլ Փաշինեան իր կարգին շնորհաւորեց Արցախի ժողովուրդը` ընտրութիւնները աւարտին հասցնելու առիթով` շեշտելով, որ Հայաստանը կը շարունակէ Արցախի հետ սերտ համագործակցութիւնը` ընդհանուր նպատակներուն հասնելու համար:

Ապրիլ 12-ին, համաճարակի սպառնալիքէն բնակչութիւնը պաշտպանելու նպատակով Արցախի Հանրապետութեան մէջ մինչեւ Մայիս 12 արտակարգ իրավիճակ յայտարարուած էր, սակայն որոշուած էր կատարել նախագահական ընտրութիւններու երկրորդ փուլը։

Մեծի Տանն Կիլիկիոյ Արամ Ա. Վեհափառ Հայրապետը Արցախի Հանրապետութեան նորընտիր նախագահին ուղղած նամակով մը շնորհաւորեց անոր ընտրութիւնը։ Վեհափառը իր նամակին մէջ ըսաւ.- «Արցախի հանրապետութեան ամրացումը, հայոց բանակի հզօրացումը եւ տնտեսութեան զարգացումը մեր Սուրբ Աթոռին համար միշտ եղած են առաջնահերթ յանձնառութիւն։ Անցնող տարիներու ընթացքին, մեր յանձնառութիւնը գործի վերածող ծրագիրներ մշակած ենք, թէ՛ Կաթողիկոսարանը ուղղակիօրէն, եւ թէ իր թեմերուն ճամբով։ Կը վստահեցնենք Ձեզ, որ նոյն ոգիով պիտի շարունակենք գործնապէս մասնակից դառնալ Արցախի առաւել հզօրացման աշխատանքներուն»։

Նորընտիր նախագահը, իր դիմատետրին մէջ գրած էր․- «Շնորհաւորում եմ բոլորիս․․․: Գնում ենք առաջ: Պարտաւո՛ր ենք կառուցել մեր ժողովրդի բարեկեցիկ ապագան: Յաջողութիւն բոլորիս»:

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %
Previous post Հայաստան.- Արտակարգ Դրութիւնը Երկարաձգուեցաւ Երեսուն Օրով
Next post Արթուր Մկրտչեանի Յիշատակին

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published. Required fields are marked *

Social profiles