ԻՐԱՎԻՃԱԿ


ՍՕՍԻ ՄԻՇՈՅԵԱՆ ՏԱՊՊԱՂԵԱՆ

 

Ես կ՚ուտեմ

Դուն կ՚ուտես

Ան կ՚ուտէ

Եւ անշուշտ՝ կատուս կ՚ուտէ։

կրկնել խոնարհումը

 

*

Խոհանոցէն հիւրանոց ճեմեցի,

Նոր տեսայ որ իրենց միջեւ

Անցք մը կայ…

լուռ։

 

*

Հազար տարուան

Օղիին յարգը

Հիմա գիտցանք

-Կոկորդդ թրջէ՛…

 

*

Դասերը onlineի վերածեցին,

Իշխանութիւնը աշակերտներուն ձեռքը տուին։

 

*

-Դասդ ինչի՞ չես պատրաստած Արթուր։

-Չի լսւում ընկ. Խաչատրեան։

 

*

Օճառ,

Օճառ,

Օճառ,

Օճառ,

եւ՝ մազի ներկ։

 

*

-Հապա եթէ վէյրուսը

Համացանցը խորտակէ,

-Հոգ չէ, Մարաշի գործ կը հիւսենք։

-Նորվեկեանը կը նախընտրէի

-Չէ՜, Այնթէպինը աւելի յարգի է։

 

*

Հաւկիթ խաշեց՝

Ի հեճուկս թագա-ժահրին.

Թագա-թոքէ

Թագա-թոքէ

Այսօր մեզի Զատիկ է։

Be the first to comment

Leave a Reply

Your email address will not be published.


*