ՀԱՒԱՔԱԿԱՆ ԿԱՐԳԱՊԱՀՈՒԹԻՒՆ….. ՊԱՏԵՐԱԶՄԸ ՇԱՀԵԼՈՒ ՀԱՄԱՐ

0 0
Read Time:2 Minute, 49 Second

Ա.Ա.

Քաղաքական եւ առողջապահական մարզերու պատասխանատուներ միանշանակ համամիտ են, որ ամբողջ մարդկութիւնը 1945-էն ի վեր այս տարողութեամբ տագնապ չէր դիմագրաւած, ինչ որ կ՛ապրի այս օրերուն՝ Պսակաձեւ Ժահրին պատճառով։ Համաշխարհային տնտեսութիւնը խոցուած է, ամբողջ երկրագունդը կը գտնուի այս անտեսանելի թշնամիին միահեծան իշխանութեան եւ քմահաճոյքին տակ, առանց սեռի, տարիքի, ազգութեան եւ քաղաքական թէ ընկերատնտեսական տարբերութիւններու։ Այլ խօսքով բոլորը վտանգին թիրախներն են։
Նման կացութեան մը մէջ անճրկութիւնը եւ անձկութիւնը շատ հասկնալի է, մանաւանդ ամիս մը առաջ կեանքով եռացող երկրագունդին բնակիչներուն համար, որոնք յանկարծ աներեւոյթ թշնամի մը դիմակալելու անզօրութեան մատնուած՝ ենթակայ են ընկերահոգեբանական շատ լուրջ ճնշումներու, ահաւոր վախի, անորոշութեան ընդհանուր մթնոլորտի մը մէջ։ Ե՞րբ ազդու պատուաստ մը պիտի ստեղծուի, ե՞րբ այս վարակը կարելի պիտի ըլլայ զգետնել, ո՞ր դեղը պիտի կարենայ բուժել հազարաւոր հիւանդները՝ մահացութեան պարագաները նուազագոյնի իջեցնելով։ Տակաւին։ Ամէն արեւածագին հետ, նոր թելադրանք մը, նոր ուսումնասիրութեան մը հիմամբ եզրակացութիւն մը մարդոց ջիղերը առաւել կը լարեն եւ անապահովութեան զգացումը տիրական կը դառնայ բոլորին մօտ։Եթէ համաճարակին առաջին շաբաթներուն կը շեշտուէր, թէ այս վարակը օդին մէջ չի մնար, վերջին օրերուն կատարուած ուսումնասիրութիւններ սկսած են անդրադառնալ շատ մտահոգիչ հարցի մը, թէ Պսակաձեւ Ժահրը գոնէ երեք ժամ կրնայ օդին մէջ «մնալ» անտեսանելի պղպջակներու մէջ։ Եւ ոեւէ մէկը՝ գէթ տեսականօրէն կրնայ շնչել եւ վարակուիլ։ Գրեթէ ամէն օր նաեւ գլխիվայր կը դարձուին նախապէս բանաձեւուած ուղեցոյցները, եւ նորը կ՛աւելնայ։ Դիմակ պէ՞տք է գործածել, թէ ոչ։ Նախապէս ոչ էր պատասխանը։ Այս օրերուն լուրջ խնդիր է բոլորին կողմէ անխտիր բժշկական դիմակներու գործածութեան մասին արդէն իսկ իրարու յաջորդող թելադրանքները, որոնք եթէ առողջապահականօրէն ճիշդ քայլ մըն են, անդին բժշկական դիմակներու չգոյութիւնը տագնապը առաւել կը բարդացնէ։
Նման անձկագին իրավիճակի մը մէջ է, որ հաւաքական կարգապահութեան խնդիրը ջուրին երեսը կ՛ելլէ։ Բոլորը համոզուած են եւ ասիկա ապացուցուած է բարեբախտաբար, որ Ֆիզիքական հեռաւորութիւն պահելը ազդու միջոց մըն է, վարակին դէմ պայքարելու համար։Այս պարագային ալ կայ որոշ շփոթ մը։ Ֆիզիքական եւ ոչ ընկերային հեռաւորութիւն պահելու մասին է խօսքը։ Բառը հոս սխալ կը գործածուի, երբ կը շեշտուի Social Distancing եզրը։ Մինչդեռ գաղափարը եւ թելադրուածը Physical Distancing հասկացութեան մասին է։ Այսինքն՝ գէթ երկու մեթր հեռու պէտք է մնալ Ֆիզիքապէս՝բոլորէն անխտիր, որովհետեւ ոչ ոք գիտէ, թէ ով առանց ախտանիշ ունենալու վարակուած է, ով ոչ։ Ուրեմն պէտք է անպայման Ֆիզիքական հեռաւորութիւն պահել, չձեռնուիլ, չողջագուրուիլ, բազմամարդ վայրերէ հեռու մնալ։
Եւ ասիկա բոլորին կողմէ ճշգրտօրէն գործադրուելու պարագային, ինչպէս առողջապահական մարզի մասնագէտները խորապէս կը հաւատան, կարելի է վարակումներու Կորը հարթեցնել։ Այսինքն, վարակը զգետնել, եւ վերսկսիլ բնականոն կեանքի։
Հաւաքական կարգապահութեան կիրարկման խնդիրը հոգեբաններու եւ ընկերաբաններու ուսումնասիրած բաւական բարդ եւ բազմերես խնդիրներէն մին է, որ հաւաքական գիտակցութեան մէկ կարեւոր դրսեւորումն է, որուն այս օրերուն ամբողջ աշխարհը կարիքը ունի։Անհատական կարգապահութեամբ կարելի է պայքարիլ այս վարակին դէմ, բայց հաւաքական ճիգն է, որ իր առաւելագոյն արդիւնքը պիտի տայ, երբ հաւաքականութիւններ կ՛անսան իրենց կատարուած թելադրանքին եւ տունը կը մնան, հիւրեր չեն ընդունիր, ընտանեկան – ազգականական հաւաքներ եւ երեկոներ չեն կազմակերպեր։ Այսինքն կը մեկուսանան Ֆիզիքապէս, բայց ոչ ընկերային իմաստով, որովհետեւ այսօր շատ դիւրին է կապ պահել բարեկամի, սիրելիի, հարազատի թէ ընկերոջ հետ՝ ընկերային հաղորդակցութեան միջոցներով, որոնք աշխարհը գիւղի վերածած են։ Ասիկա թէեւ մարդկային անմիջական շփման տեղը չի կրնար առնել, բայց երբ համաճարակի մը մէջ մխրճուած ենք, լաւ, ապահով եւ կիրարկելի այլընտրանք մըն է։
Տակաւին ոչ ոք գիտէ, թէ այս կացութիւնը որքան կրնայ տեւել։ Ոչ ոք գիտէ, թէ գալ ամիս ինչ պիտի ըլլայ իրավիճակը։ Մինչ այդ ինքնամեկուսացմամբ եւ Ֆիզիքական հեռաւորութեան պահպանմամբ, նաեւ անհատական մաքրութեան կանոններուն ամբողջական գործադրութեամբ, բոլորս կրնանք մեր ներդրումը ունենալ այս ահաւոր պատերազմէն յաղթական դուրս գալու ճիգերուն։ Որովհետեւ աներեւոյթ թշնամիին զոհը մարդկութիւնն է։ Հաւաքականօրէն։

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %
Previous post Արցախի Համապետական Ընտրութիւններ
Next post ՇՏԱՊ ԱՇԽԱՏԱՆՔԱՅԻՆ ՄԱՐՄԻՆՆԵՐ

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published. Required fields are marked *

Social profiles