ԱՏՐՊԷՅՃԱՆ՝ ՍԵՒ ՈՍԿԻԻՆ ԵՒ ՊՍԱԿԱՁԵՒ ԺԱՀՐԻՆ ՄԻՋԵՒ

0 0
Read Time:2 Minute, 48 Second

Ա.Ա.
Հակառակ անոր որ քարիւղի միջազգային սակերը աննախընթաց նահանջ մը արձանագրած են, Պաքուի իշխանութիւնները կը խոստանան չկրճատել ընկերային զարգացման ծրագրերը։ Անոնք նաեւ կը պնդեն,որ մանէթի արժեզրկման առաջքը առնելու համար կեդրոնական դրամատունը անհրաժեշտ պահեստները ունի։
Սակայն հարաւային կովկասեան տնտեսական եւ ելեւմտական իրավիճակներուն եւ զարգացումներուն մօտէն հետեւող տնտեսագէտներ այլ կարծիք ունին։ Անոնք համոզուած են, որ քարիւղի համաշխարհային սակերուն անկումը Եւրասիական ամբողջ տարածքին մէջ պիտի փոխեն տնտեսական բոլոր կանխատեսումները եւ քարիւղ արտահանող Ատրպէյճան, Ղազախստան եւ Ռուսիա արդէն իսկ պիւտճէի կրճատումներու եւ ազգային դրամանիշերու արժեզրկման կը պատրատուին։Անոնք նաեւ այս երկիրներուն մէջ տնտեսական անկումներու մասին իրենց ակնկալութիւնները չեն թաքցներ։
Այս անորոշութեան բարձրացման գործօններէն մին կը համարուի նաեւ պսակաձեւ ժահրի համաճարակը, որուն պատճառով միջազգային շուկաներուն վրայ քարիւղի պահանջը նկատառելի նահանջ արծանագրած է։
Ատրպէյճանի իշխանութիւնները անցեալ տարի ամսականները բարձրացուցին եւ աւելցուցին ընկերային ծրագրերու յատկացուող գումարները։ Այս քայլերուն նպատակն էր պայքարիլ սղաճին դէմ եւ լռեցնել դժգոհութեան ձայները, որոնք սկսած էին երկրին տարածքին բարձրանալ, որովհետեւ մարդիկ կը գանգատէին, որ քարիւղով հարուստ Ատրպէյճանի քաղաքացիները աղքատ են, իսկ իշխանութեան գլուխը գտնուող իշխանախումբը միլիառաւոր տոլարներու մէջ թաղուած է։
Օրին նախագահ Իլհամ Ալիեւ յայտարարած էր, որ ընկերային ծրագրերուն ծախսերը պիտի հայթայթուին՝ հարկային բարեփոխումներով, աւելի բարձր մաքսատուրքերով եւ արժէքի աւելցած հարկերով։ Ան նաեւ ակնկալած էր, որ Ատրպէյճան զբօսաշրջային աճ արձանագրէ։
Պաքուի Տնտեսական Ուսումնասիրութիւններու Կեդրոնի փորձագէտները սակայն նկատել կու տան, որ այս բոլոր եկամուտները պիտի չապահովուին՝ քորոնավայրըսի համաճարակին պատճառով։Իսկ Միջազգային Դրամական Ֆոնտին մասնագէտներուն գնահատականով, Ատրպէյճանի պետական պիտճէին հաւասարակաշռութիւնը պահպանելու համար անհրաժեշտ է, որ քարիւղին մէկ տակառին գինը յիսուն երեք տոլար ըլլայ, մինչդեռ անիկա այսօր երեսուն հինգ տոլար է։
Իսկ ատրպէյճանցի անկախ ելեւմտագէտներ արդէն իսկ ահազանգ հնչեցուցած են,որ մանէթին արժէքը պահպանելու համար կեդրոնական դրամատունը միայն քանի մը ամսուան համար պահեստներ ունի։
Ուրեմն՝ ըստ եւեմտական հարցերու մասնագէտներու, կը մնայ մէկ ընտրանք։ Ներդրումային միջոցներու եւ ռազմական ծախսերու կրճատումը։ Եւ նկատի ունենալով Լեռնային Ղարաբաղի տագնապը, որուն նկատմամբ Ատրպէյճանի իշխանութիւնները մնայուն կերպով պատերազմի ընտրանքը բաց կը պահեն, այնքան ալ դիւրին չէ կրճատել զէնքի եւ զինամթերքի գնումները, իսկ յստակ է, որ այս տարի ներդրումները շատ աւելի քիչ եղած են՝ բաղդատած անցեալ եւ նախորդ տարիներուն, ինչ որ առաւել կրճատումներու առիթներ չ՛ստեղծեր։
Ամենայնդէպս, Սթոքհոլմի մէջ գործող Միջազգային խաղաղութեան Ուսումնասիրութիւններու հիմնարկին նորագոյն զեկոյցը կը հաստատէ, որ Ատրպէյճան վերջին հինգ տարիներուն ընթացքին քառասուն առ հարիւրով նուազեցուցած է զէնքի գնումը։Սակայն նոյնիսկ նման նահանջով մը, Ատրպէյճան Հայաստանէն երեք անգամ աւելի զէնք գնած է վերջին հինգ տարիներուն ընթացքին։
Ատրպէյճան զէնքերու իր գնումներուն վաթսուն մէկ առ հարիւրը կատարած է Իսրայէլէն, իսկ միայն երեսուն մէկ առ հարիւրը՝ Ռուսիայէն։Զեկոյցին հեղինակները կը վկայակոչեն ապրիլեան քառօրեայ պատերազմը եւ կը շեշտեն, որ թէ Հայաստան եւ թէ Ատրպէյճան կը կուտակեն հրթիռներ, որոնք կրնան շատ աւելի հեռու թիրախներ հարուածել։ Իսկ տեղին է նշել,որ նոյն զեկոյցին համաձայն,Հայաստան վերջին հինգ տարիներուն 415 առ հարիւրով բարծրացուցած է զէնքի եւ զինամթերքի գնումները՝ բաղդատած նախորդ հինգ տարիներու տուալներուն։
Քարիւղի արտադրութեան քանակին նուազեցման վերաբերեալ խուլ պատերազմը ընթացք առած է Ռուսիոյ եւ Սէուտական Արաբիոյ միջեւ եւ բոլոր տուեալները ցոյց կու տան, որ ռուսերը բաւական լաւ պատրաստուած են այս պատերազմին, հակառակ անոր որ առաջին հարուածները հասան ռուսական դրամանիշին։ Մեզի համար առաւել ուշադրութեան առարկայ է «քարիւղով հարուստ» Ատրպէյճանը, ուր ժողովրդային լուրջ գանգատներ եւ բողոքներ նախապէս ճնշուած են բրտօրէն, ապա յայտարարուած են ընկերային որոշ ծրագրեր, որպէսզի լռութեան մատնուի ժողովրդային պահանջներուն աղմուկը։ Բայց պսակաձեւ ժահրի տնտեսական ազդեցութեան նախանշանները ի յայտ սկսած են գալ եւ իբրեւ առաջին զոհերէն մէկը, Ատրպէյճան կը մատնուի բաւական տագնապալի վիճակի մը, որուն ժխտումը եւ ուրացումը յար եւ նման է Արցախի պատմութեան, պատկանելիութեան եւ ընդհանրապէս հայ ժողովուրդին ու Հայաստանի վերաբերեալ Ատրպէյճանի վարած նենգափոխման եւ խեղաթիւրման քաղաքականութեան։

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %
Previous post ԳՈՐԻՍ․- Հ․Հ․ Վարչապետ Փաշինեան Ընթերցեց Սահմանադրութեան Փոփոխութիւններու Հռչակագիրը
Next post ՍՏԵՂԾԵ՛Լ ԻՐԱՒԱՍՈՒԹԵԱՄԲ ՕԺՏՈՒԱԾ ՀԱՅԵՐԷՆԻ ՊԱՇՏՊԱՆՈՒԹԵԱՆ ՀԱՄԱՀԱՅԿԱԿԱՆ ՄԱՐՄԻՆ

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published. Required fields are marked *

Social profiles