Հ.Յ.Դ. Երիտասարդականը Մասնակցեցաւ Եւրոպայի Երիտասարդ Ընկերվարներու Կազմակերպութեան Ժողովին


Յունուար 24-26-ին, տեղի ունեցաւ Եւրոպայի երիտասարդ ընկերվարներու (Young European Socialists) կազմակերպութեան սեմինարներու շարքը եւ բիւրոյի հերթական ժողովը` Լիւքսեմպուրկի մայրաքաղաքին մէջ:
Հ․Յ․Դ․ Երիտասարդական միութեան կողմէ վերոնշեալ ձեռնարկներուն մասնակցեցաւ Սարին Գազանճեանը (Շուէտ): Սեմինարները կազմակերպուեցան երկու նիւթերով` «Շրջակայ միջավայրի փոփոխութիւնները» եւ «Կազմակերպութիւններու ներքին կազմակերպուածութիւնն ու կառուցուածքները»: Քննարկումներ ծաւալեցան շրջակայ միջավայրի փոփոխութեան հետեւանքներուն եւ այս հարցին մէջ Եւրոպական միութեան առջեւ ծառացած մարտահրաւէրներուն շուրջ: Դասախօսութիւններով հանդէս եկան Եւրոպայի ընկերվարական կուսակցութեան (PES) անդամները: Դասախօսութեամբ հանդէս եկաւ նաեւ Եւրոպայի երիտասարդ ընկերվարներու նախագահ եւ Եւրոպական խորհրդարանի անդամ Ալիսիա Հոմս:
Սեմինարի երկրորդ բաժինին մէջ քննարկուեցան երիտասարդական կազմակերպութիւններու ներքին կազմակերպուածութեան եւ առկայ մարտահրաւէրներու հարցը: Մասնակիցները անդրադարձան իրենց կազմակերպութիւններու դժուարութիւններուն եւ աշխատանքային խումբերուն մէջ առաջարկներ ներկայացուցին կազմակերպութիւններու ներքին կազմակերպուածութեան վիճակը բարելաւելու վերաբերեալ:
Շաբաթավերջին տեղի ունեցաւ նաեւ Եւրոպայի երիտասարդ ընկերվարներու բիւրոյի արտահերթ ժողով, որուն ընթացքին հրաժարական ներկայացուց ընդհանուր քարտուղար Մայ Ենսընը եւ ընտրուեցաւ նոր ընդհանուր քարտուղար` Աննա Փրիխցլաւան: Հ․Յ․Դ․ Երիտասարդականը շնորհակալութիւն յայտնեց նախկին ընդհանուր քարտուղարին` արդիւնաւէտ եւ հաճելի համագործակցութեան համար:

Be the first to comment

Leave a Reply

Your email address will not be published.


*