Շնորհանդէս՝ Գէորգ Պետիկեանի «Ես Տեսայ Անին» Հատորին

Հինգշաբթի, Յուլիս 25-ին, Երեւանի «Ա. Իսահակեան»ի անուան գրադարանի սրահին մէջ տեղի ունեցաւ Ամերիկաբնակ ծանօթ գրող, մտաւորական եւ կրթական մշակ՝ Գէորգ Պետիկեանի նոր լոյս ընծայած՝ «Ես Տեսայ Անին» հատորի շնորհանդէսը։
Ձեռնարկին, հեղինակի եւ իր տիկնոջ կողքին ներկայ էին Պետիկեանի Երեւանաբնակ նախկին աշակերտ-աշակերտուհիներէն շատեր, Հալէպի Ազգային Քարէն Եփփէի ճեմարանականներ, հայրենի մտաւորականներ եւ հալէպցի ու հայրենի մշակութասէրներու հոծ բազմութիւն մը։
Պէտք է յիշել, որ երեկոն նախաձեռնած էին Ա. Իսահակեան անուան գրադարանի տնօրէնուհի՝ Յասմիկ Կարապետեանը, Բանասիրական Գիտութիւններու դոկտոր՝ Մարգարիտա Խաչատրեանն ու ծանօթ մտաւորական Գէորգ Եազըճեանը:
Իբրեւ օրուան յայտագիր, նախ Այտա Ասատուրեան ընթերցեց հատորէն «Խոստովանանք» պատմուածքը, յետոյ յաջորդաբար խօսք առին Գէորգ Եազըճեանը, Ճուլիեթա Գալստեանը, լրագրողներու միութեան անդամ՝ Մարիամ Ստեփանեանն ու Դոկտոր Խաչատրեանը։
Բոլոր խօսք առնողներն ալ հատորէն յատուկ պատմուածքներ ընթերցեցին եւ միեւնոյն ժամանակ վեր առին Պետիկեան արեւմտահայ գրողի տաղանդն ու ոճը, անոր սահուն եւ հիւմուրոտ լեզուն, անոր կեանքն ու ցարդ հրատարակած 7 հատորներէն բխող սփիւռքահայ գրողի արժէքը։
Վերջին՝ սրտի իր խօսքով ելոյթ ունեցաւ հեղինակ Պետիկեան մեծապէս տպաւորելով ներկաները որմէ ետք մակագրեց իր նուիրած բոլոր հատորները։
Ստեղծուած խանդավառ մթնոլորտին մէջ ներկաները երկար ու կարօտով զրուցեցին գրող- հեղինակ-ուսուցիչ՝ Գէորգ Պետիկեանի հետ ու նկարուեցան։ Տեղի ունեցաւ նաեւ պատշաճ հիւրասիրութիւն։

Be the first to comment

Leave a Reply

Your email address will not be published.


*