ՀԱՄԱՍՏԵՂԻ «ԱՂՕԹԱՐԱՆ» ՀԱՏՈՐԻ ՆԵՐԿԱՅԱՑՈՒՄԸ ՆԻՒ ԵՈՐՔԻ ՍՈՒՐԲ ՍԱՐԳԻՍ ԵԿԵՂԵՑՒՈՅ ՄԷՋ


ՆԻՒ ԵՈՐՔ․- Կիրակի, Փետրուար 3-ին, Սուրբ Պատարագէն ետք, մեծ թիւով ծխականներ հաւաքուած էին Տակլըսթընի Սուրբ Սարգիս եկեղեցւոյ «Չատրճեան» սրահին մէջ, ուր տեղի ունեցաւ Համաստեղի «Աղօթարան» գիրքին ներկայացումը։ Այս երկլեզու գեղատիպ հատորը հրատարակուած է Անուշաւան արք. Դանիէլեանի նախաձեռնութեամբ, անոր առաջնորդական ընտրութեան առիթով։ Գիրքէն օրինակներ բաշխուած էին իբրեւ յուշանուէր անցեալ Դեկտեմբեր 2-ին տեղի ունեցած մեծարանքի ճաշկերոյթին։
Սուրբ Սարգիս եկեղեցւոյ հոգեւոր հովիւ Տ. Նարեկ քհնյ. Թրթռեան բարի գալուստի խօսքերէ ետք, ներկայացուց Ազգ. Ուսումնական Խորհուրդի գործավար դոկտ. Վարդան Մատթէոսեանը, որ գիրքին թարգմանիչն է։ Խօսք առնելով հայերէն եւ անգլերէն, դոկտ. Մատթէոսեան դիտել տուաւ, որ ասիկա Համաստեղի առաջին հատորն է, որ անգլերէնով լոյս կը տեսնէ, եւ որ «Աղօթարան»-ը յատկանշական է իր հոգեւոր գաղափարներով՝ Համաստեղի իւրայատուկ ոճով համեմուած։ Այնուհետեւ, ան ներկայացուց Համաստեղի կեանքն ու կէս դարու գրական ասպարէզը, որ զինք դարձուցած է ամերիկահայ ու սփիւռքահայ գրականութեան կարկառուն անուններէն մէկը։ Պատկերազարդ ներկայացումին հետեւեցան անգլերէն թարգմանութենէն ընթերցումներ Կրեկըրի Տոսթուրի, Նուէր Օրանճեանի եւ Վեհ Պզտիկեանի կողմէ։
Փակման խօսքին մէջ, Անուշաւան Սրբազան Հայրը անդրադարձաւ իր մանկութեան ու պատանեկութեան, երբ Համաստեղի ու յատկապէս «Աղօթարան»ի ընթերցումը այնքան տպաւորած է զինք։ Ան շնորհակալութիւն յայտնեց թարգմանիչին ու Առաջնորդարանի բոլոր գործակիցներուն, որոնք գիրքը հասցուցած են ատենին՝ հակառակ ժամանակի սահմանափակումներու, եւ իր երախտագիտութիւնը յայտնեց Քոչումեան եւ Սթանչիու ընտանիքներուն, որոնք գիրքին հովանաւորութիւնը ստանձնած էին։
«Աղօթարան» հատորը տրամադրելի է Առաջնորդարանի գրախանութէն։

Be the first to comment

Leave a Reply

Your email address will not be published.


*