Արամ Ա. Կաթողիկոսի Ձեռնադրութեան Յիսնամեակի Նշում

Կիրակի Հոկտեմբեր 21-ին, Մեծի Տանն Կիլիկիոյ կաթողիկոսարանին մէջ նշուեցաւ Արամ Ա. կաթողիկոսին` իր ձեռնադրութեան յիսնամեակը: Ներկայ էին Հայաստանի Հանրապետութեան վարչապետի պաշտօնակատար Նիկոլ Փաշինեան եւ իր կողակիցը, Լիբանանի նախագահի, վարչապետի եւ խորհրդարանի նախագահի ներկայացուցիչները։ Այս վերջինին ներկայացուցիչն էր երեսփոխան Յակոբ Բագրատունի։ Նաեւ, ներկայ էին համայնքապետերու ներկայացուցիչները, պետական նախարարներ, երեսփոխաններ, դեսպաններ, քաղաքական կուսակցութեանց ու կազմակերպութեանց ներկայացուցիչները, Հայաստանէն եկած նախարարներ, ազգային բարերարներ եւ մեր ժողովուրդի զաւակները:
Անթիլիասի մայրավանքի Սուրբ Գրիգոր Լուսաւորիչ մայր տաճարին մէջ Սուրբ եւ անմահ պատարագ մատուցեց վեհափառ հայրապետը: Իր պատգամին իբրեւ բնաբան վեհափառ հայրապետը ընտրած էր Քրիստոսի այն խօսքը, որ կ՛ըսէ, թէ «Ես աշխարհ եկայ ո՛չ թէ ծառայութիւն ստանալու, այլ ծառայելու» (Հմմտ. Մտ 20.28): Վեհափառ հայրապետը ընդհանուր գիծերով պարզեց ծառայութեան իմաստը քրիստոնէական տեսանկիւնէն դիտուած: Ան յիշեցուց, թէ եկեղեցին ինքզինք կ՛ըլլայ, իր հարազատ էութեամբ, ծառայութեան ճամբով, որովհետեւ եկեղեցին ո՛չ անշարժ կառոյց է եւ ո՛չ ալ զմռսուած մտածողութիւն, այլ ժողովուրդին գացող ծառայական առաքելութիւն է: Ապա, ան ըսաւ, թէ կեանքի դժուար պայմաններուն մէջ, անցնող 50 տարիներուն, յատկապէս իբրեւ Լիբանանի հայոց թեմի առաջնորդ եւ ապա կաթողիկոս, փորձած է Քրիստոսի թելադրութեան հաւատարիմ ըլլալ իր ծառայական կեանքին մէջ: Ան յիշեց, որ ինք Ցեղասպանութեան վերապրողներու զաւակ է եւ հայ եկեղեցւոյ` Լիբանանի մէջ ծնած առաջին կաթողիկոսը:
Իր գնահատանքը յայտնելէ ետք Լիբանանի նախագահին, վարչապետին ու խորհրդարանի նախագահին, վեհափառ հայրապետը յատուկ կերպով ողջունեց Հ․Հ․ վարչապետի պաշտօնակատար Փաշինեանը` շեշտելով, որ հայրենի ժողովուրդի կամքին ու սպասումներուն թարգմանը ըլլալով` ան նոր էջ բացաւ Հայաստանի ներկայ ժամանակներու պատմութեան մէջ: Վեհափառ հայրապետը միաժամանակ վստահեցուց, որ Մեծի Տանն Կիլիկիոյ կաթողիկոսութիւնը պիտի շարունակէ վերանորոգ հաւատքով իր մասնակցութիւնը բերել Հայաստանի հզօրութեան ու ծաղկման աշխատանքներուն:
Իր պատգամի աւարտին, վեհափառ հայրապետը կոչ ուղղեց, որ Լիբանանի ու Հայաստանի միջեւ եղբայրական սերտ կապն ու գործակցութիւնը աւելի ամրապնդուին:
Պատարագէն ետք, վեհարանի դահլիճին մէջ, խօսք առաւ Ազգային կեդրոնական վարչութեան ատենապետ Ստեփան Տէր Պետրոսեան եւ շեշտելէ ետք վեհափառ հայրապետին յիսնամեայ ծառայութեան կարեւորութիւնը մեր եկեղեցւոյ ու ժողովուրդին, ինչպէս նաեւ Լիբանանի կեանքին մէջ, յաջորդաբար հրաւիրեց Ամենայն Հայոց կաթողիկոսին ու պապին ներկայացուցիչները եւ ապա վարչապետի պաշտօնակատար Փաշինեանը` իրենց խօսքերը արտասանելու:

Նաթան արք. Յովհաննիսեան կարդաց Ամենայն Հայոց Գարեգին Բ. կաթողիկոսի շնորհաւորական ուղերձը: Իր խօսքին մէջ, Ամենայն Հայոց կաթողիկոսը կ՛ընդգծէ վեհափառ հայրապետին յիսնամեայ ծառայութեան անկիւնադարձային փուլերը. «Դուք ջանացել էք արդիւնաւորել Աւետարանի կենարար խօսքի քարոզութիւնը եւ Մեծի Տանն Կիլիկիոյ կաթողիկոսութեան խնամքի ներքոյ գտնուող հայորդաց հոգեւոր հոգածութիւնը` վայելելով հոգեւոր դասի ու հաւատացեալների սէրն ու յարգանքը», ըսած է Ամենայն Հայոց կաթողիկոս ու աւելցուցած, որ Արամ Ա. կաթողիկոս իր վաստակը ունի նաեւ հայ եկեղեցւոյ հոգեւոր ու ազգային կեանքին եւ միջեկեղեցական աշխարհին մէջ: Գարեգին Բ. կաթողիկոս իր ուղերձին մէջ կ՛ընդգծէ, որ Մեծի Տանն Կիլիկիոյ կաթողիկոսութեան առաքելութեան ծաւալուն աշխատանքին արդիւնքով նոր հորիզոններ բացուած են հայ եկեղեցւոյ առջեւ` պայծառացնելու աշխարհասփիւռ հայերու հոգեւոր կեանքը եւ հզօրացնելու անոր միասնականութիւնը. «Հաւատում ենք, որ միասնակամ գործակցութեամբ պիտի շարունակենք լուծման առաջնորդել հոգեւոր-եկեղեցական մեր անդաստանում առկայ մարտահրաւէրները», կ՛եզրափակէ ուղերձը:
Պապական նուիրակ Ճոզեֆ Սփիթերի կարդաց Փրանկիսկոս Պապին ուղերձը: Պապը իր խօսքին մէջ կը շնորհաւորէ վեհափառ հայրապետին քահանայական ձեռնադրութեան եւ օծման յիսնամեակը, եւ կ՛աղօթէ անոր քաջառողջութեան եւ երկարակեցութեան համար:
Լիբանանի Հանրապետութեան նախագահին անունով խօսք առաւ երեսփոխան Իպրահիմ Քանաան: Ան ըսաւ, թէ այս առիթը իր մէջ կը պարփակէ ազատութեան, հաստատ սկզբունքներու եւ համակեցութեան պատգամները: Ան հանրապետութեան նախագահին անունով յայտարարեց, որ Լիբանանի ժողովուրդը մէկ է եւ միշտ իբրեւ մէկ ամբողջութիւն պիտի կանգնի` Լիբանանի յարութեան համար: «Դուք` Նորին Սրբութիւն եւ հայ համայնքը, կը կազմէք այս հայրենիքին ամէնէն կարեւոր բաղկացուցիչ տարրերէն մին», շեշտեց Քանաան:
Հանդիսութեան վերջին խօսքը արտասանեց Հայաստանի Հանրապետութեան վարչապետի պաշտօնակատար Նիկոլ Փաշինեան: Ան վեր առաւ վեհափառ հայրապետին եկեղեցանուէր, ազգանուէր ու ազգաշէն գործունէութիւնը եւ նշեց Մեծի Տանն Կիլիկիոյ կաթողիկոսութեան դերն ու դերակատարութիւնը Ցեղասպանութենէն ճողոպրած հայութեան կեանքի վերակազմակերպման առաքելութեան մէջ: «Մեծի Տանն Կիլիկիոյ Կաթողիկոսութիւնը սփիւռքի առաքելական հայերի մի մեծ հատուածի հոգեւոր կեդրոնն է, եկեղեցական եւ կրօնական աւանդոյթների պահպանման ու հարստացման իւրայատուկ դարբնոցը: Անթիլիասը հազարաւոր հայերի սրտում է: Շնորհակալ ենք, որ այս պատերի ներքոյ տարիներ ի վեր փայփայուել են մեր ազգային ինքնութիւնը, մշակութային արժէքները, խրախուսուել ազգապահպանութեան ծրագրերը», ըսաւ վարչապետի պաշտօնակատարը: Ան ընդգծեց, որ լիբանանահայ գաղութը ընդհանրապէս եւ Մեծի Տանն Կիլիկիոյ կաթողիկոսութեան աթոռը յատկապէս իրենց ներդրումը ունեցած են Լիբանանի վերելքին:
Ան կարեւորութեամբ շեշտեց վեհափառ հայրապետին տարած աշխատանքը` Հայոց ցեղասպանութեան արդար հատուցման ապահովման նպատակով եւ նշեց. «Մենք հիացած ենք Ձեր ստեղծագործ եւ լայնածաւալ աշխատանքով, որի արդիւնքում յաջողութեամբ կերտում էք Մեծի Տանն Կիլիկիոյ կաթողիկոսութեան եւ նրա սփիւռքեան թեմերի ու թեմական կառոյցների երէկուայ ու այսօրուայ պատմութիւնը», ու աւելցուց, որ անժխտելի է վեհափառ հայրապետին օրհնութեան եւ իմաստուն խօսքի ազդեցութիւնը ազգային կեանքին, հայոց պետականաշինութեան եւ համազգային առաջնահերթութիւններու իրականացման հոլովոյթին մէջ: Ան նաեւ շեշտեց վեհափառ հայրապետին միջեկեղեցական ոլորտին մէջ եւ միջազգային գետնի վրայ ունեցած գործունէութիւնն ու համբաւը:
Փաշինեան նաեւ վեր առաւ Լիբանանի ապահովութեան եւ կայունութեան պահպանման կարեւորութիւնը եւ ընդգծեց Հայոց ցեղասպանութեան ճանաչման հոլովոյթին մէջ Հայաստան-սփիւռք փոխադարձ գործակցութեան մէջ վեհափառ հայրապետին ջանքերը:
Փաշինեան իր խօսքը եզրափակեց ըսելով. «Երախտապարտ ենք, որ Դուք ձեր ականաւոր գիտնականի, հայագէտի եւ կրօնագէտի իմաստութիւնը միահիւսելով Ձեր անհուն հայրենասիրութեանն ու մշտական ծառայութեանը` շուրջ կէս դար Ձեր սրբազան առաքելութիւնն էք կատարում առ Աստուած, առ Հայաստանեայց առաքելական սուրբ եկեղեցին եւ առ հայրենիք»:
Աւարտին, ներկաները իրենց շնորհաւորութիւնները յայտնեցին վեհափառ հայրապետին:
Երեկոյեան, պաշտօնական ճաշկերոյթ մը տեղի ունեցաւ ի յարգանս Վեհափառ Հայրապետին՝ իր ձեռնադրութեան յիսնամեակին առիթով։
Ճաշկերոյթի ընթացքին խօսք առաւ Ազգային Կեդրոնական Վարչութեան համա-ատենապետ՝ Գրիգոր Մահսերեճեան. կարդացուեցաւ Արցախի Հանրապետութեան վսեմաշուք նախագահ՝ Տիար Բակօ Սահակեանի ուղերձը եւ ապա յաջորդաբար խօսք առին վարչապետի պաշտօնակատար Տիար Նիկոլ Փաշինեանն ու Նորին Սրբութիւնը։
Մահսերեճեան արտասանելով բացման խօսքը՝ ըսաւ, որ Նորին Սրբութեան նկարագիրին գերակշիռ յատկութիւններէն են համահայկական մտածողութիւնն ու աշխատանքի մղող նկարագիրը, ինչպէս նաեւ եկեղեցին պատերէն անդին տանելու յանձնառութիւնը։ Տիար Պետօ Տէմիրճեան ընթերցեց Նախագահ Բակօ Սահակեան ուղերձը, ուր ան կը նշէ, որ Նորին Սրբութեան ձեռնադրութեան եւ օծման յիսնամեակը նշանակալից իրադարձութիւն է ոչ միայն Մեծի Տանն Կիլիկիոյ Կաթողիկոսութեան համար, այլ նաեւ Հայ Առաքելական եկեղեցւոյ, հայրենիքին եւ Սփիւռքի բազմաթիւ օճախներուն համար։ Իր եւ Արցախի ժողովուրդին ու իշխանութեան շնորհաւորանքը յայտնելէ ետք, նախագահ Սահակեան կ՚ընդգծէ, որ Արցախը բարձր կը գնահատէ Նորին Սրբութիւնը եւ անոր գործունէութիւնը որպէս Կաթողիկոս, հոգեւորական, հասարակական գործիչ եւ հայրենանուէր մարդ. «Դուք մեծածաւալ ազգանպաստ գործունէութիւն էք իրականացնում կրթական-հայագիտական ծրագրերի, միջ-եկեղեցական եւ միջ-կրօնական կապերի ընդլայնման ու խորացման ուղղութեամբ», կը նշէ նախագահը ու կը շարունակէ ըսելով, որ Վեհափառ Հայրապետը, թէ՛ օրհասական պահուն եւ թէ՛ յաղթական ժամուն, միշտ նեցուկ կանգնած է հայ ազգին՝ իր գործօն աջակցութեամբ եւ օժանդակութեամբ:
Ապա, բեմ բարձրացաւ Հայաստանի Հանրապետութեան Վարչապետի պաշտօնակատար՝ Տիար Նիկոլ Փաշինեան, որ շնորհաւորեց Վեհափառ Հայրապետին ձեռնադրութեան 50-ամեակը՝ մաղթելով քաջառողջութիւն եւ արեւշատութիւն։ Փաշինեան ընդգծեց Նորին Սրբութեան ծառայասիրութիւնը եւ ըսաւ, որ 50 տարուան հոգեւոր ծառայութիւնը գործնականացուցած է «զրուցելով» Աստուծոյ եւ ժողովուրդի հետ, եւ բնական է, որ նման նուիրական անհատ մը վայելէ համատարած վստահութիւն ու յարգանք թէ՛ ազգային եւ թէ՛ միջազգային մակարդակներու վրայ։
Աւարտին, իր խօսքը ուղղեց Նորին Սրբութիւնը, որ առաջին հերթին շնորհակալութիւն յայտնեց իր ձեռնադրութեան համար կազմակերպուած երեկոյին ու ջերմ շնորհաւորանքներուն համար։ Հայրապետը ընդգծեց, որ մեր կեանքին իմաստն ու նպատակը չի կրնար ըլլալ այլ բան քան ծառայութիւնը. ան ըսաւ, որ իր 50-ամեայ հոգեւորականի կեանքին մէջ՝ ազդուելով իր նախորդ երեք Կաթողիկոսներէն եւ ըլլալով անոնց անջնջելի հետքերով կազմաւորուած, կը մատուցանէ իր ծառայութիւնը։ Վեհափառ Հայրապետը իր խօսքը ուղղելով վարչապետի պաշտօնակատարին, ընդգծեց, որ թաւշեայ յեղափոխութեան առաջին օրերէն իսկ կապ հաստատելով Փաշինեանի հետ շեշտած է յեղափոխութեան հանգուցալուծման առաջնորդող յեղափոխութիւն մը ըլլալուն կարեւորութիւնը, որ հետապնդէ մէկ նպատակ՝ Հայաստանի հզօրացում։ Անդրադառնալով Սփիւռքին, Հայրապետը ըսաւ, որ հարկադրաբար Հայաստանէն հեռու ապրած է Սփիւռքը, տագնապած է անոր ցաւերով եւ ուրախացած անոր վերանկախացումը տեսնելով, սակայն մեր ժողովուրդը ոչ միայն կ՚ուզէ տեսնել անկախացած Հայաստանը, այլ՝ Հայաստանը կ՚ուզէ տեսնել Արարատո՛վ։
«Այս հանգրուանին, պէտք է հզօրացնենք Հայաստանը ի խնդիր Մեծ Հայաստանին։ Զօրացնենք Սփիւռքը, որպէսզի Հայաստանը աւելի հզօրանայ։ Հայաստանը հզօրացնենք, որպէսզի Սփիւռք-Հայաստան-Արցախ եռամիութիւնը փոխադարձ հասկացողութեամբ, ամբողջական համագործակցութեամբ, դերերու յստակեցումով, աշխատանքի բաժանումով, սակայն մէկ ազգի, մէկ հայրենիքի եւ մէկ ապագայի տեսլականով քալենք դէպի ժողովուրդի պայծառ ապագայ։ Հետեւաբար, իմ սպասումս է, որ Հայաստանի մէջ մեր ժողովուրդի մասնակցութեամբ յառաջացած թաւշեայ յեղափոխութիւնը այս գիտակցութեամբ ու հաւատքով հզօրացնէ մեր հայրենիքը։ Կը վստահեցնեմ ձեզի, թէ Սփիւռքը, Մեծի Տանն Կիլիկիոյ Կաթողիկոսութիւնը ձեզի հետ է, Հայաստանին հետ է, Արցախին հետ է», իր խօսքը եզրափակեց Նորին Սրբութիւնը։
Նշենք, որ Գերշ. Տ. Նաթան Արք. Յովհաննէսեան Մայր Աթոռ Ս. Էջմիածնի Կաթողիկոսութեան անունով Նորին Սրբութեան նուիրեց յուշանուէր մը՝ Ս. Էջմիածնի ոսկեձոյլ խաչի մանրակերտը, իսկ Վեհափառ Հայրապետը Նիկոլ Փաշինեանին նուիրեց Բարձր Բերդի ձեռագիր աւետարանին կրկնօրինակը։
Ճաշկերոյթէն առաջ, վարչապետի պաշտօնակատար Նիկոլ Փաշինեան այցելեց Անթիլիասի Մայրավանքի եւ ծաղկեպսակ զետեղեց Սրբոց Նահատակաց յուշարձանին առջեւ, ներկայութեամբ Վեհափառ Հայրապետին եւ Միաբանութեան։

Հանդիպում՝ Հ․Յ․Դ․ Լիբանանի Կեդրոնական Կոմիտէի Պատուիրակութեան Հետ
Շաբաթ, Հոկտեմբեր 20-ին Լիբանանի մէջ Հայաստանի Հանրապետութեան դեսպանատան մէջ, Հայաստանի վարչապետի պաշտօնակատար Նիկոլ Փաշինեան հանդիպում ունեցաւ ՀՅԴ Լիբանանի Կեդրոնական կոմիտէի պատուիրակութեան հետ, որուն մաս կը կազմէին երեսփոխան Յակոբ Բագրատունի, Մելիք Գարագաւորեան, Յակոբ Հաւաթեան, Ճորճ Սապունճեան եւ Շահան Գանտահարեան: Պատուիրակութեան մէջ ներառուած էր նաեւ Հ․Մ․Ը․Մ․-ի Կեդրոնական վարչութեան ատենապետ Գառնիկ Մկրտիչեան:

Վարչապետի պաշտօնակատար Նիկոլ Փաշինեան խօսեցաւ այցելութեան ընդհանուր նպատակին մասին եւ յատուկ կերպով կարեւոր նկատեց Հ․Յ․ Դաշնակցութեան ներգրաւուածութեան անհրաժեշտութիւնը պետականաշինութեան եւ համահայկական օրակարգերու աշխատանքին մէջ:

Be the first to comment

Leave a Reply

Your email address will not be published.


*