ՆԻՒ ԵՈՐՔԻ ՄԷՋ.- ԱՐԵՒԵԼԵԱՆ Ա.Մ.Ն.Ի ՀԱՅ ԴԱՏԻ ՅԱՆՁՆԱԽՈՒՄԲԻ ՏԱՐԵԿԱՆ ՄԵԾԱՐԱՆՔԻ 12-ՐԴ ՀԱՆԴԻՍՈՒԹԻՒՆ

 

Լուսանկարներ՝ Ճասթին Գալայճեան եւ Ռայըն Ռիտ

Շաբաթ, Հոկտեմբեր 13-ին, Նիւ Եորքի ”Կրանտ Հայաթ” պանդոկի սրահին մէջ, տեղի ունեցաւ Ա.Մ.Ն. Արեւելեան շրջանի Հայ Դատի յանձնախումբի կազմակերպած մեծարանքի ութերորդ հանդիսութիւնը հոծ բազմութեան մը ներկայութեամբ:
Օրուան հանդիսավարն էր Սարա Լիա Ուիթսըն, որ Միջին Արեւելքի եւ Հիւսիսային Ափրիկէի ”Հիւմըն Ռայթ Ուոչ” ոչ-կառավարական հիմնարկի պատասխանատուն է։ Ան բեմ հրաւիրեց Յուշեր Պզտիկեանը, որ Ա.Մ.Ն.-ի եւ Հայաստանի քայլերգները մեներգելով կատարեց մեծարանքի բացումը։
Ապա, Ա.Մ.Ն. Արեւելեան Շրջանի Բարեջան Առաջնորդ Անուշաւան Դանիէլեան կատարեց բացման աղօթքը։ Ձեռնարկին ներկայ էին Ուաշինկթընի մօտ Արցախի Հանրապետութեան ներկայացուցիչ Ռոպերթ Աւետիսեան եւ Հ․Յ․Դ․ Բիւրոյի անդամ Խաչիկ Մուրատեան։
Սարա Լիա Ուիթսըն յայտնեց, թէ այս տարուայ մեծարանքի երեկոն կը զուգադիպի Հայաստանի Ա. Անկախութեան հարիւրամեակին։ ”Այս հարիւր տարիները ցոյց կու տան թէ որքա՜ն ճամբայ կտրած ենք, յատկապէս պայքարելով ահաւոր կացութիւններու դէմ։ Եւ այս գծով, Հայ Դատը առաջնահերթ դեր խաղցած է, յատկապէս քաղաքականութեան բեմահարթակին վրայ…”, ըսաւ ան։
Այս ձեռնարկի կազմակերպիչ յանձնախումբի անունով, խօսք առաւ Օտրի Մարտոյեան, որ տեղեկացուց, թէ այս տարուան հանդիսութեան համար, յատուկ յիշատակի շքանշաններ պիտի ստանան Հայ Դատի համար անձնաւորութիւններ։
Մարտոյեան վեր առաւ, երիտասարդներու կատարած ներդրումը եւ այս առթիւ շքանշաններ պարգեւատրեց անցեալ ամրան երիտասարդներու յատուկ ”Լէօ Սարգիսեան” դասընթացքին մասնակցող երտասարդներ Ատրիէն Թազեան-Շուարցի, Վիքթորիա Միսիկեանի եւ Անդրանիկ Քէչեճեանի։
”Վահան Գարտաշեան” մրցանակին այս տարուայ նկատի առնուած անձնաւորութիւնը, տարիներ շարունակ Հայ Դատի բնագաւառէն ներս ծառայած Քեն Սարաճեանն էր, որ վերջերս Մերձաւոր Արեւելքի նպաստամատոյցի պատասխանատու տնօրէն՝ Շանթ Մարտիրոսեանի հետ գործակցաբար, գաղափարը յղացած էր, Հայոց ցեղասպանութեան յատուկ դաստիարակչական յայտագիր մը պատրաստել Նիւ Ճըրզիի շրջանէն ներս։
Ան իր խօսքին մէջ շեշտեց թէ.- ”Ես չեմ, այլ մենք ենք այս բոլոր կատարուածներու ետին։ Կարելի չէ մէկ անձով հասնիլ այս արդիւնքներուն։ Այս է մեր գործելաձեւը։ Պայքարիլ, տեսակցիլ, պինդ մնալ ու շարունակ գործել…”։
Ներկաները, վայրկեան մը յոտընկայս յարգեցին յիշատակը առ յաւէտ հեռացած Մովսէս Տէր Յովհաննէսեանի եւ 2016-ի ,Վահան Գարտաշեանե մրցանակակիր Լեւոն Բալեանի։
Ապա, բեմ բարձրացաւ Ռուանտացի մարդկային իրաւունքներուն համար պայքարող Քոնսոլի Նիշիմուէ, որ իր կարգին կորսնցուցած է ընտանեկան պարագաներ, 1994-ին թութսիներու դէմ կատարուած ջարդի արդիւնք։ Նիշիմուէ անդրադարձաւ, թէ ցեղասպանութեան մը ետին կանգնող պետութիւններ եթէ չպատժուին, բնականաբար պիտի շարունակուին նմանօրինակ զարհուրելի դէպքեր։
Ան կոչ ուղղեց, որ ամէն գնով պէտք է նմանօրինակ արարքներու ետին կանգնող անձնաւորութիւններ եւ պետութիւններ, դատի կանչուին։
Նիշիմուէ բեմ հրաւիրեց ”Ազատութեան՛՛ մրցանակի համար նկատի առնուած ”Խոստումը” (“The Promise”) ժապաւէնի իրլանտացի բեմադրիչ՝ Թերի Ճորճը, որ նաեւ տարիներ առաջ բեմադրած էր Ռուանտայի մէջ կատարուած ցեղասպանութիւնը՝ ՛՛Հոթէլ Ռուանտա՛՛-ն։
”Մենք՝ իրլանտացիներս, հայերս եւ ռուանտացիներս շատ տառապած ենք։ Յստակ է թէ որքան տառապած ենք, հետզհետէ պաղելով եւ յաւելեալ տեղեկութիւններ քաղելով։ …Ժապաւէնը դիտելէ ետք, երբ երիտասարդներ կը մօտենան եւ կը հարցադրեն, թէ տեղեակ չէին այս ցեղասպանութենէն, այդ պարագային աւելի կ’անհանգստանաս թէ որքան անարդար է պատահածը”, նշեց Ճորճ շեշտելով, թէ երբ ժապաւէնի աւարտի մասը կը պատրաստուէր Սպանիոյ մէջ, միեւնոյն ժամանակ հեռատեսիլէն կը ցուցադրուէր եզիտիներու ջարդն ու տեղահանումը Սուրիոյ հիւսիսային շրջանին մէջ։
”Ազատութեան” մրցանականակիր Էրիք Իսրայէլեան, չէր կրցած ժամանել այս մեծարանքի երեկոյեան, սակայն յատուկ վիտէօ երիզով պատրաստած էր իր խօսքը, որուն մէջ շնորհակալութիւն կը յայտնէր, շեշտելով, թէ Քըրք Քերքորեանի յետ մահու փափաքը իրականացաւ։ ”Այս ժապաւէնը մեր սպասածէն շատ աւելի յաջող դուրս եկաւ։ Յոյսով ենք, որ խոստումր պիտի յարգուի եւ երբեք պիտի չմոռցուի պատահածը, որ նաեւ երբեք պիտի չկրկնուի”, ըսաւ ան։
Ա.Մ.Ն. Արեւելեան Շրջանի Հ.Յ.Դաշնակցութեան ներկայացուցիչ՝ Ճորճ Աղճայեան բեմ հրաւիրուեցաւ, փոխանցելու իր խօսքը։ Ան ըսաւ թէ շարունակ եւ հետեւողականօրէն կը յայտարարենք Հայ Դատի համար օժանդակութեան արշաւ, Հայ Դատի նուիրահաւաք: Ան շեշտեց թէ հայորդին անվերապահ եւ ամբողջական գիտակցութեամբ կ’ընդառաջէ այս կոչերուն, որովհետեւ հաւատացած է, որ այս մէկը գոյութեան իմաստն է, եւ ան եզրակացուց թէ, եթէ Հայ Դատի հետապնդման ընդհանուր աշխատանքներէն վայրկեան մը կանգ առնուի, բնականաբար իբրեւ հայութիւն, գործընթացը դժուար կ՛ըլլայ եւ ենթակայ մեծ մարտահրաւէրներու եւ վտանգներու: Ան աւելցուց թէ, Միացեալ Նահանգներու եւ ընդհանրապէս աշխարհասփիւռ Հայ Դատի յանձնախումբերու ծաւալուն ու անխոնջ պայքարը, նշանակալի հանգրուան մը բոլորած է Հայաստանի եւ հայ ժողովուրդի նկատմամբ, հակառակ ամերիկեան եւ արեւմտեան աշխարհի կառավարութիւններու, ցարդ որդեգրած խուսափողական քաղաքականութեան:
Օրուան վերջին խօսքը փոխանցեց Ուաշինկթընի Հայ Դատի գրասենեակի պատասխանատու Ռաֆֆի Համբարեան, որ ամփոփելով, օրուան հանդիսութիւնը, յայտնեց թէ Հայ Դատի յանձնախումբը կը լսէ տեսակէտները եւ կը հունաւորէ իր աշխատանքը: Ան աւելցուց թէ, աշխատանքը այնքան բազմածիր է, որ իսկապէս հայ ժողովուրդէն մեծ նիւթական թէ բարոյական ներդրում եւ մեծ կարողականութիւն կþենթադրէ:
Աւարտին, Բարեջան Առաջնորդ Անուշաւան Դանիէլեան եւ Նիւ Եորքի Սուրբ Գրիգոր Լուսաւորիչ մայր եկեղեցւոյ հովիւ Մեսրոպ Լագիսեան, կատարեցին փակման աղօթքը։
Յայտագրէն առաջ, կատարուած աճուրդի արդիւնք, գոյացաւ կոկիկ գումար մը: Նաեւ կատարուեցան նուիրատուութիւններ, որոնք փոխանցուեցան Հայ Դատի Յանձնախումբի անձեռնմխելի հիմնադրամին: Նշենք թէ, Հ.Ե.Դ.-ի անդամ երիտասարդ Շանթ Մասոյեան, բացման հանդիսութեան, կիթարով հրամցուց օտար թէ հայկական կշռոյթով մեղեդիներ։

Be the first to comment

Leave a Reply

Your email address will not be published.


*