Հ.Յ.Դ. Բիւրոյի Անդամները Ծաղիկներ Զետեղեցին Արամ Մանուկեանի Արձանին

Երէկ Հ.Յ.Դ. Բիւրոյի հերթական նիստէն ետք Բիւրոյի ներկայացուցիչ Հրանդ Մարգարեան, քաղաքական ներկայացուցիչ Արմէն Ռուստամեան, անդամներ Կիրօ Մանոյեան, Սպարտակ Սէյրանեան, Բենիամին Պչաքճեան (Լիբանան), Յակոբ Խաչերեան (Լիբանան), Մուրատ Փափազեան (Ֆրանսա) եւ Վիգէն Բաղումեան (Իրան) այցելեցին Հայաստանի Հանրապետութեան հիմնադիր Արամ Մանուկեանի արձան եւ ծաղիկներ զետեղեցին այնտեղ:

Մուրատ Փափազեան ընդգծեց Արամ Մանուկեանի ունեցած մեծ դերն ու դերակատարութիւնը հայոց պետականութեան հաստատման գործին մէջ:

«Շատ մեծ պատիւ է, որ թէեւ ուշացած, բայց վերջապէս` 100 տարի ետք, տեղադրուեցաւ Արամ Մանուկեանի արձանը: Պէտք է հասկնալ Արամ Մանուկեանի դերը` իբրեւ Առաջին Հանրապետութեան հիմնադիր, եւ նոյն առիթով հասկնալ Առաջին Հանրապետութեան դերը` իբրեւ  հայկական պետականութեան հիմնաքար: Եթէ հայ ժողովուրդը յաղթած չըլլար Սարդարապատի, Ղարաքիլիսէի եւ Բաշ Ապարանի ճակատամարտերուն, այսօր ո՛չ միայն Հայաստանը պիտի չըլլար, այլեւ` Հայաստանը Թուրքիա կ՛ըլլար:  Ուստի, պէտք է հասկնալ, որ այս ճակատամարտերը շատ մեծ նշանակութիւն ունին, որ Առաջին Հանրապետութիւնը` հիմնադրուած Արամ Մանուկեանով, ապագայ  տուին հայկական պետականութեան գաղափարին», նշեց Փափազեան:

Be the first to comment

Leave a Reply

Your email address will not be published.


*