Վատիկանի Մէջ Սուրբ Գրիգոր Նարեկացիի Արձանի Եւ Բացում Եւ Օրհնութիւն


Հինգշաբթի, Ապրիլ 5-ը յատկանշական օր մը եղաւ հայութեան համար` Վատիկանի մէջ Սուրբ Գրիգոր Նարեկացիի արձանի պաշտօնական բացումով, նախագահութեամբ Փրանկիսկոս Պապին, մասնակցութեամբ Ամենայն Հայոց Գարեգին Բ. եւ Մեծի Տանն Կիլիկիոյ Արամ Ա. կաթողիկոսներուն, Տանն Կիլիկիոյ կաթողիկէ հայոց Գրիգոր Պետրոս Ի. կաթողիկոս պատրիարքին, Վատիկանի միջեկեղեցական յարաբերութեանց բաժանմունքի նախագահ կարտինալ Քիւրթ Քոխի, Արեւելեան եկեղեցիներու խորհուրդի նախագահ կարտինալ Լէոնարտօ Սանտրիի, Հայաստանի Հանրապետութեան նախագահ Սերժ Սարգսեանի եւ բարձրաստիճան հոգեւորականներու, քաղաքական գործիչներու եւ զանազան երկիրներէ եկած հայ եւ օտար հիւրերու:
Բացման արարողութիւնը սկսաւ Սուրբ Երրորդութեան անունով եւ Թարգմանչացի «Որք զարդարեցին տնօրինաբար» շարականով , զոր կատարեց Քահանայապետական Լեւոնեան հայ վարժարանի ժառանգաւորաց երգչախումբը` ղեկավարութեամբ Արամ Սաատոյի: Ապա ընթերցումներ կատարուեցան Սուրբ Յովհաննէսի Աւետարանէն եւ Գրիգոր Նարեկացիի «Մատեան ողբերգութեան» գիրքէն: Փրանկիսկոս Պապին օրհնութեան աղօթքին յաջորդեց արձանի քօղազերծումը` Վատիկանի մէջ Հայաստանի դեսպան Միքայէլ Մինասեանի ձեռամբ: Արարողութեան ընթացքին Արամ Ա. վեհափառ հայրապետը հանդէս եկաւ պաղատանքի աղօթքով, որուն յաջորդեց Գրիգոր Պետրոս Ի. կաթողիկոս պատրիարքին աղօթքը, ապա աղօթք բարձրացուց Ամենայն հայոց Գարեգին Բ. կաթողիկոսը: Տէրունական աղօթքով ու քահանայապետին միացած երեք հովուապետերու վերջին օրհնութեամբ արարողակարգը հասաւ իր լրումին:
Գրիգոր Նարեկացիի երկու մեթր հասակով, պրոնզէ արձանը գործն է ֆրանսահայ ճարտարապետ Դաւիթ Երեւանցիի (Բաբայեան), իսկ ճարտարապետն է Միքայէլ Հասրաթեան, անիկա իրականութիւն դարձաւ Վատիկանի մէջ Հայաստանի դեսպան Միքայէլ Մինասեանին եւ ռուսաստանաբնակ գործարար Արթուր Ջանիբեկեանի բարերարութեամբ, Վատիկանի մէջ Հայաստանի դեսպանութեան մշակոյթի բաժինի պատասխանատու Վարդան Կարապետեանի կազմակերպական ջանքերուն շնորհիւ: Դաւիթ Երեւանցի այս արձանի քանդակը կատարած է սրբազան քահանայապետի Հայաստան ուխտագնացութեան առիթով, Հայաստանի նախագահ Սերժ Սարգսեանի սրբազան քահանայապետին նուիրած նմուշին հիման վրայ: Արձանը ունի իր երկրորդ օրինակը, որ պիտի տեղադրուի Էջմիածնի կաթողիկոսարանին մէջ` իբրեւ «տիպար ու պատգամ երկու քոյր եկեղեցիներուն միջեւ եղբայրական կապի»:
Արձանի բացման պաշտօնական արարողութենէն ետք երկու վեհափառ հայրապետները եւ հոգեւոր տէրը ճաշի հիւրը եղան պապին` իրենց պատուիրակութեան անդամներուն հետ, իսկ երեկոյեան ներկայ գտնուեցան ի պատիւ նախագահ Սարգսեանին Վատիկանի մէջ Հայաստանի դեսպան Միքայէլ Մինասեանին կազմակերպած ճաշկերոյթին:

Be the first to comment

Leave a Reply

Your email address will not be published.


*