Hairenik Weekly Newspaper

Ուաշինկթընի Համայնքը Նշեց Հ.Յ.Դ.-ի 127-ամեակը


ՈՒԱՇԻՆԹԸՆ.- Վերջերս, տեղւոյն Հ.Յ.Դ. «Սեպուհ» Կոմիտէութեան կազմակերպութեամբ, նշուեցաւ Հ.Յ.Դ.-ի 127-ամեակը, Սուրբ Խաչ եկեղեցւոյ ներքնասրահին մէջ: Օրուան դասախօսն էր Հ.Յ.Դ. Բիւրոյի անդամ դոկտ. Խաչիկ Մուրատեանը:
Այս հանդիսութեան ներկայ էր Արցախի հանրապետութեան Ուաշինկթւնի գրասենեակի ներկայացուցիչ՝ Ռոպէրթ Աւետիսեանը:

Հ.Յ.Դ. «Սեպուհ» Կոմիտէութեան ներկայացուցիչ Սեպուհ Ասատուրեան

Մուրատեան նշեց թէ 127-ամեայ պատմութիւն ունեցող կուսակցութեան մը պատմութիւնը կարելի չէ անտեսել եւ մոռացութեան մատնել: Ան նշեց թէ, նոյնիսկ հողին մէջ թաղուած անցեալը, վերստին պիտի յիշուի, նշելով թուրք ակադեմականի մը պատրաստած մէկ ուսումնասիրութիւնը Հ.Յ.Դ.-ի ունեցած դերին մասին Այնթապի մէջ: Խնդրոյ առարկայ ակադեմականին մօտ մեծ հետաքրքրութիւն ստեղծած էր Այնթապի մէկ փուլ եկած պատերուն մէջ, ի յայտ եկած բացիկ մը, որ ֆետայի Գեորգ Չաւուշի նկարն էր:

Էմմա Սողոմոնեան
Կալին Թանաշեան
Թամար Գոլէճեան-Բենենեան
Անահիտ Տէրտէրեան

«Այն, ինչ որ մենք կը կոչենք Դաշնակցական գործունէութիւն, երբեմն նոյնիսկ թաղուած կ՛ըլլայ հողին տակ, կամ պահուած կ՛ըլլայ պատի մը մէջ, սակայն սա ոչ մէկ կարեւորութիւն ունի: Ժամանակը եկած է, եւ ինչ որ այլ կորսուի վերստին կը կանգնի եւ այսպէս պատմութեան անցեալ մը կը պարզուի»,- ըսաւ ան:
Մուրատեան շեշտեց թէ, այս տարի կը նշուի Հայաստանի Առաջին անկախութեան հարիւրամեակը, որուն համար մեծ եւ արմատական ներդրում ունեցած է Հ.Յ.Դաշնակցութիւնը, յատկապէս յանձին Արամ Մանուկեանի:
Հ.Յ.Դ. «Սեպուհ» Կոմիտէութեան ներկայացուցիչ Սեպուհ Ասատուրեան, շնորհակալութիւն յայտնեց ներկաներուն եւ օրուան դասախօսին:
Գեղարուեստական յայտագրով, ելոյթ ունեցան Էմմա Սողոմոնեան եւ Անահիտ Տէրտէրեան, որոնք ձեռնարկի բացման հանդիսութեան, ներկայացուցին Հայաստանի եւ Միացեալ Նահանգներու քայլերգները: Իսկ Թամար Գոլէճեան-Բենենեան եւ Կալին Թանաշեան արտասանեցին գործեր Յովհաննէս Շիրազէն եւ Ժագ Յակոբեանէն: