Էրտողանի Թիկնապահները Կ’ամբաստանուին

Ամերիկայի Հայ Դատի յանձնախումբը կը տեղեկացնէ, թէ Օգոստոս 29-ին, մայրաքաղաք Ուաշինկթընի մէկ ատեանը, ատելութեան հիման վրայ ոճրագործութեամբ ամբաստանած է 19 անձ, որոնց կարգին Թուրքիոյ նախագահ Ռէճեպ Թայիպ Էրտողանի տասնեակէ մը աւելի թիկնապահները:

Դատախազը տեղեկացուց, թէ նշեալ երեք այլ թիկնապահներու անուններն ալ աւելցած էին, այս ցանկին վրայ: Այս ամբաստանեալները Մայիս 16-ին անմեղ ցուցարարներ խոշտանգած էին։

Յունիս 6-ին, Ներկայացուցիչներու տունը դատապարտած էր թրքական այս բռնարարքը, իսկ քանի մը օր ետք՝ Յուլիս 14-ին վաւերացուցած էր քոնկրէսական Տէյվ Թրաթի առաջադրած՝ Էրտողանի թիկնապահներուն արդիական զէնքեր ծախելու ծրագիրը կասեցնելու մասին յաւելուածը:

Յուլիս 19-ին, Հայ Դատը կազմակերպած էր հաւաք մը, որուն մասնակցած էին շարք մը քոնկրէսականներ, ինչպէս նաեւ՝ քրտական, հայկական, եզիտի եւ ասորի կարգ մը կազմակերպութիւններու ներկայացուցիչներ: Քոնկրէսականները շեշտած էին, թէ Էրտողան պէտք է պաշտօնապէս ներողութիւն խնդրէ այս բռնարարքներուն համար, միաժամանակ պահանջած էին, որ Թուրքիա անյապա՛ղ ամերիկեան իշխանութիւններուն յանձնէ ամերիկացի քաղաքացիներուն վրայ յարձակած թիկնապահները:

Ատելութեան հողի վրայ յարձակում իրականացնելու յանցանքով, ամբաստանեալները կրնան մինչեւ 15 տարուան բանտարկութեան դատապարտուիլ: Ցարդ ձերբակալուած են մեղադրեալներէն միայն երկուքը, որոնց դէմ բացուած դատին առաջին նիստերը տեղի պիտի ունենան Սեպտեմբեր 7-ին:

Ամերիկայի Հայ Դատի յանձնախումբի ներկայացուցիչ՝ Էլիզապէթ Ջուլճեան յայտնեց, թէ այս ամբաստանութիւններուն առաջադրումը կարեւոր քայլ մըն է արդարութեան հաստատման ճամբուն վրայ։

«Արդէն ժամանակն է պահանջելու, որ Էրտողանի թիկնապահները անյապաղ արտայանձնուին եւ Թուրքիոյ հանրապետութիւնը փոխհատուցում վճարէ այս սարսափելի յանցագործութենէն տուժածներուն: … Եթէ Էրտողան չկատարէ արդարութեան հաստատման ուղղութեամբ այս քայլերը, ամերիկեան իշխանութիւնները պէտք է որ անպայման արտաքսեն Միացեալ Նահանգներու մօտ Թուրքիոյ դեսպանը եւ որդեգրեն այլ պատժամիջոցներ», եզրակացուց Ջուլճեան։

Be the first to comment

Leave a Reply

Your email address will not be published.


*