Ամերիկայի Հայ Դատի Յանձնախումբը Կը Գործակցի Քոնկրէսականներ Վալատաոյի եւ Շիֆի հետ

 

Ամերիկայի Հայ Դատի յանձնախումբը ողջունեց Միացեալ Նահանգներու Քոնկրէսի Ներկայացուցիչների տան յատկացումներու յանձնախումբի անդամ Տէյվիտ Վալատաոյի` Արցախի Հանրապետութեան բնակիչները ականներէ եւ այլ չպայթած զէնքերէ պաշտպանելուն ուղղուած արշաւը աւարտին հասցնելու համար աջակցութիւն փնտռելուն ուղղուած ջանքերը:
Վալատաօ Ներկայացուցիչներու տան մէջ ջանքեր ի գործ դրած է, որ 2018-ի արտաքին օգնութեան օրինագիծին մէջ առաջնահերթութիւն տրուի «Հալօ Թրասթ» ընկերութեան տրամադրուող աջակցութեան ապահովման:
«Ես կը գնահատեմ իմ գործընկերութիւնս Ամերիկայի Հայ դատի յանձնախումբին հետ այս կեանքեր փրկող, խաղաղութեան նպաստող նախաձեռնութեան շուրջ: Ականազերծումը կեանքեր կը փրկէ, անիկա կարելիութիւն կ՛ընձեռէ հողագործներուն աշխատելու իրենց հողին մէջ` ականներու վտանգէ ազատ, եւ աւելի երկարաժամկէտ հեռանկարով պայմաններ կը ստեղծէ Արցախի եւ Ազրպէյճանի միջեւ բանակցութիւններու միջոցով խաղաղութեան հաստատման համար», յայտնեց Վալատաօ:
«Հալօ Թրասթ» ոչ կառավարական կազմակերպութիւն է, որ 2006-էն ի վեր հազարաւոր պայթուցիկ սարքեր ոչնչացուցած է, որուն շնորհիւ բազմաթիւ կեանքեր փրկուած են: Այդ աշխատանքը նպաստած է շրջանային կայունութեան եւ մնայուն ու ժողովրդավարական խաղաղութեան հեռանկարին:
Միւս կողմէն, քոնկրէսական Էտըմ Շիֆ կը շարունակէ մօտէն զբաղիլ հայութիւնը յուզող հարցերով եւ յատկապէս Հայաստանի մէջ գիտութեան, արհեստագիտութեան, ճարտարագիտութեան եւ ուսողութեանդասաւանդման համար «Հազարամեակի մարտահրաւէրներ» հիմնարկէն յաւելեալ աջակցութիւն ապահովելու խնդիրով: Այս ջանքերուն համար ան մօտէն կը գործակցի Ամերիկայի Հայ Դատի յանձնախումբին հետ:
«Հազարամեակի մարտահրաւէրներ» հիմնարկը Միացեալ Նահանգներու օրէնսդիր մարմիններուն կողմէ 2004-ին հաստատուած ու անկախաբար գործող մարմին մըն է, որուն նպատակն է համակարգել երկրին տրամադրելիք արտաքին օժանդակութիւնները: Անիկա ցարդ աւելի քան 10 միլիառ տոլարի օժանդակութիւն տրամադրած է զանազան երկիրներու, ներառեալ Հայաստանը, որ 2008-ին ստացած էր գիւղական ճամբաներ նորոգելու եւ ոռոգման ծրագիրներ իրականացնելու նպատակով յատկացում մը:
Շիֆ տեղեկացուց, որ «Հազարամեակի մարտահրաւէրներ» հիմնարկին կողմէ 2006-ին Հայաստանին տրամադրուած առաջին օժանդակութիւնը` 170 միլիոն տոլարի, յատկանշական կերպով նուազեցուցած էր գիւղական շրջաններուն մէջ չքաւորութեան մակարդակը: Ան միաժամանակ կրթական մարզին մէջ նման նոր յատկացում մը կատարելու գաղափարին կը զօրակցի:
Ամերիկայի Հայ Դատի յանձնախումբի ատենապետ Րաֆֆի Համբարեան յայտնեց, թէ գիտութեան, արհեստագիտութեան, ճարտարագիտութեան եւ ուսողութեան դասաւանդման ծրագիրներուն համար Վրաստանին յատկացուած 140 միլիոն տոլար օժանդակութեամբ ձեռք բերուած յաջողութիւնները կրնան օրինակ հանդիսանալ նման ծրագիր մը Հայաստանի մէջ եւս իրականացնելու ջանքերուն, յատկապէս որովհետեւ Հայաստանի մէջ արդի արհեստագիտութեան մարզը զարգացման մեծ կարելիութիւններ ունի:
Ան աւելցուց, թէ առնուազն 100 միլիոն տոլարի ներդրում մը յատկանշական պիտի ըլլայ երկրին մէջ չքաւորութեան նուազեցման եւ տնտեսական նոր կարելիութիւններ ստեղծելու համար, միաժամանակ` սերտացնելով Ամերիկա-Հայաստան տնտեսական յարաբերութիւնները:

Be the first to comment

Leave a Reply

Your email address will not be published.


*