ԱՐՑԱԽԵԱՆ ԳՈՅԱՎԻՃԱԿԻ ՕՐԱԳՐԷՆ

0 0
Read Time:1 Minute, 33 Second

 Ա.Մ.Ն. Արտաքին Գործոց նախարար Հիլըրի Քլինթընի Կովկասեան Բարձրաւանդակ այցելութիւնը եւ ասոր հետ զուգընթաց, ազերի կողմին հետեւողական ձեւով կազմակերպուած նախայարձակումները, ապա Փարիզի մէջ կատարուած վեհաժողովը` որոշ հեւք մը, ժամացոյցի դէմ մրցում մը ստեղծեցին, որոնց եզրակացութիւնը կարելի է դիւրութեամբ գտնել, հազիւ շաբաթ մը առաջ, Ուաշինկթընի հանրահռչակ “Ճոն Հոփքինս“ համալսարանին մէջ տեղի ունեցած մէկ գիտաժողովին:

Արդարեւ, ակադեմական բարձր մակարդակի այս գիտաժողովին նիւթը հետեւեալն էր.- “Կովկասեան հակամարտութիւններու կանխումը. արդեօ՞ք ի նպաստ Ռուսաստանի է թէ ոչ“: Մասնակցողներու շարքին էր նաեւ, Հայաստանի Հանրապետութեան մօտ, Ա.Մ.Ն.-ի նախկին դեսպան  Ճոն Էվընս:

Այս գեր-հետաքրքրական եւ Արցախեան հիմնահարցը մօտէն քննող գիտաժողովը  եզրակացուց թէ Ա.Մ.Ն.-ը, Կովկասեան հարցին մէջ պէտք է անպայման նկատի ունենայ Ռուսաստանեան գործօնը, եւ այդ իսկ պատճառով, ոչ մէկ քայլ ու որոշում առնել, որ կրնայ զայրացնել եւ ջղագրգռել Քրեմլը:

Այսպէս խաղաղապահ կամ զսպիչ ուժերու տեղադրում Արցախի սահմաններուն շուրջ, բնականաբար “երազային“ կարելի է նկատել, յատկապէս երբ այդ խաղաղապահներուն կարգին նկատի առնուի Արեւմուտքը, որուն զինուորներուն հեռադիտակներուն ուղղութիւնն ու կիզակէտը, Արցախէն աւելի…հարաւային Իրանեան սահմաններ պիտի ընդգրկեն:

Բազմիցս, ամերիկացի քաղաքագէտներ եւ դեսպանութեանց մէջ գործող մասնագէտներ, կատարած են իրենց թելադրանքը թէ երբեք տեղին չէ, այդ տարածաշրջանէն ներս – որուն մաս կը կազմէ բնականաբար Արցախը –  հակադրութիւն ստեղծել եւ ճնշում բանեցնել Փութինի ղեկավարութեան վրայ:

Հետեւաբար, ապահովական կացութեան որեւէ վատթարացում կամ պատերազմի հաւանականութիւն, կրնայ մտահոգել Ռուսաստանը, որ արդէն իսկ աշխարհագրականօրէն իր սահմաններէն աւելի հեռու, Սուրիական ՛՛տաք ջուրեր՛՛ու գծով բաւական բազմազբաղ է:

Միեւնոյն ժամանակ, տարածաշրջանային հետեւողական եւ ամբողջական խաղաղութիւն մը, կրնայ տկարացնել կամ լուսանցքի տակ առնել Քրեմլի  ազդեցութիւնը:

Այսպէս “ո՛չ պատերազմ եւ ո՛չ ալ խաղաղութիւն“ գործելաձեւը ստեղծած է իւրայատուկ գոյավիճակ մը, եւ առ այդ Մոսկուա, մերթ ընդ մերթ մտահոգուելով եւ հետաքրքրութիւն ցոյց տալով, հանդիպումներ կը կազմակերպէ Հայաստանի եւ Ատրպէյճանի նախագահներուն միջեւ եւ անհրաժեշտ կը նկատէ երկխօսութեան շարունակութիւնը:

Չափազանցութիւն պիտի չըլլայ եզրակացնելը թէ տասնեակ մը օր առաջ կատարուած բանակցութիւնները, Մոսկուայի կողմէ հրահրուած կրկնակի անհրաժեշտութիւն էին հակամարտող կողմերու սահմանին ծայրայեղ լարուածութեան:

Այս է, ներկայս Արցախեան գոյավիճակի օրագիրը: 

ՀԱՅՐԵՆԻՔ

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %
Previous post ԱՒՍՏՐԻՈՅ ՆԱԽԱԳԱՀԸ ԱՅՑԵԼԵՑ ՀԱՅԱՍՏԱՆ
Next post ՍՈՒՐԲ ՍՏԵՓԱՆՈՍ ԱԶԳԱՅԻՆ ՎԱՐԺԱՐԱՆԻ 2011-2012 ՏԱՐԵՇՐՋԱՆԻ ԱՄԱՎԵՐՋԻ ՀԱՆԴԷՍՆԵՐ

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published. Required fields are marked *

Social profiles