0
0
Ս. Ծնունդը Աստուծոյ մարդեղութեան, Անոր աշխարհ գալուստին տօնակատարութիւնն է: Աստուած՝ Յիսուս Քրիստոսով աշխարհ եկաւ մեղաւոր մարդկութիւնը փրկելու համար: Անոր աշխարհ գալը մեծագոյն նուէրն էր մարդկութեան: Բայց նուէրները անպայմանօրէն միեւնոյն կերպով չեն ընդունուիր: Այսպէս օրինակ, մարդկութեան մեծագոյն նուէր եղող Քրիստոսի աշխարհ գալու աւետիսը թէեւ ցնծութեամբ ողջունուեցաւ Արեւելքի իմաստուն Մոգերուն կողմէ, սակայն Հրէաստանի Հերովդէս թագաւորին համար մեծ գոյժ մը նկատուեցաւ:
Իմաստուն Մոգեր, գուշակած էին Յիսուսի Ծնունդը՝ Երուսաղէմ եկան Հերովդէս թագաւորին հարցնելու թէ ո՞ւր ծնած է «նորածին Արքան»: Ըստ իրենց ենթադրութեան, ան մայրաքաղաք Երուսաղէմ ծնած պէտք էր ըլլար: Բայց լուսափայլ աստղը զիրենք առաջնորդեց Հրէաստանի երբեմնի հզօրագոյն Դաւիթ Թագաւորի ծննդավայր Բեթլեհէմ աւանը:
Ի վերջոյ, յետ երկար ճամբորդութեան եւ ի գին մեծ զոհողութիւններու անոնք գտան «Նորածին Արքան» եւ երկրպագելով Անոր՝ իրենց յարգանքի տուրքը ընծայեցին: Բայց կասկածամիտ Հերովդէս, որ կը վախնար թէ Բեթլեհէմի նորածին մանուկը ապագային կրնար մրցակից ըլլալ իրեն եւ լուրջ սպառնալիք մը իր գահը իր ձեռքէն խլելու: Մեծապէս վրդոված՝ Հերովդէսի համար Յիսուսի ծննդեան լուրը մեծ գոյժ կը համարուէր: Որոշապէս, Բեթլեհէմի մանկիկին ծնունդը փոթորկած էր իր ներաշխարհը: Այսպէս ուրեմն, Իր ծննդեան օրէն սկսեալ Յիսուս սկսած էր փոխել մարդոց կեանքը: Մինչ Արեւելքի իմաստուն Մոգերուն համար «Նորածին Արքան» փնտռել եւ գտնել իրենց կարեւոր առաքելութիւն եղած էր՝ Հերովդէս թագաւորին տխրահռչակ առաքելութիւնը եղած էր ոչնչացնել զայն: Մինչ մոգեր իրենց ընծաները կը մատուցանէին այդ հրաշալի մանուկին, Հերովդէս այդ մանուկը մեռցնելու առաջադրութեամբ՝ ջարդել կուտար Բեթլեհէմի համայն մանուկները: Բեթլեհէմի այդ չնաշխարհիկ Մանկիկը մարդոց իրավիճակը փոխած էր: Ան մինչեւ օրս միեւնոյնը կը շարունակէ ընել: Անոնք որ զինք կը փնտռեն խաղաղութիւն եւ հոգիի բաւարարութիւն կ’ունենան: Իսկ անոնք որ զինք կը մերժեն հոգիով կը վրդովին: Հերովդէս չէր գիտեր թէ Բեթլեհէմ ծնող «նորածին Արքայ»ին նպատակը զինք փոխարինելով երկրաւոր թագաւոր մը ըլլալ չէր, այլ մարդոց հոգիներուն եւ սրտերուն վրայ տիրապետող արքայ մը — արքայ մը, որ մարդոց կամաւոր հաւատարմութիւնն ու նուիրումը պիտի վայելէր: Ինչպէս անցեալին, այսօր ալ ա°յդ է բաղձանքը Բեթլեհէմ ծնող եւ մարդկութեան Փրկիչ եղող Տէր Յիսուս Քրիստոսի:
Ս. Ծննդեան տօնը կ’ոգեկոչէ անոր հրաշափառ Ծնունդը, թող առիթ մը ըլլայ ամենուն զԱյն ընդունելու որպէս Աստուծոյ մեծագոյն պարգեւը եւ զԱյն դարձնելու իրենց կեանքի Տէր Տերանց եւ Թագաւոր Թագաւորացը: Յայնժամ բոլորովին նոր իմաստ կը ստանայ Ս. Ծննդեան մաղթանքը — «Քրիստոս ծնաւ եւ յայտնեցաւ.Ձեզի մեզի մեծ աւետիս».
ՎԵՐ. ԴՈԿՏ. ՎԱՀԱՆ Յ. ԹՈՒԹԻԿԵԱՆ
Գործադիր Տնօրէն Հայ Աւետ.
Համաշխարհային Խորհուրդի
