0
0
Շիքակոյի մէջ, Հայոց Ցեղասպանութեան առթիւ կատարուեցաւ դասախօսական ձեռնարկ եւ ցոյց` տեղւոյն Թուրքիոյ հիւպատոսարանին առջեւ: Ցոյցը կատարուեցաւ Ապրիլ 24-ին, մասնակցութեամբ տեղւոյն Հ.Ե.Դ. “Արարատ“ մասնաճիւղին Նաեւ մասնակցեցան յոյներ:
Նախապէս, Ապրիլ 21-ին, կատարուած էր դասախօսական-հսկումի ձեռնարկը: Օրուան դասախօսն էր, Հայաստանի մօտ, Ա.Մ.Ն.-ի նախկին դեսպան` Ճոն Էվընզ, որ շեշտեց թէ Սպիտակ Տան վրայ շարունակ պէտք է ճնշում բանեցնել, դուրս գալու համար Թուրքիոյ ճնշումներէն եւ պատշաճօրէն ճանչնալու Հայոց Ցեղասպանութիւնը:
Նախապէս բացման խօսքը կատարեց Իլինոյի Հայ Դատի Յանձնախումբի ներկայացուցիչ Ալին Պարսումեան, որ նաեւ խօսք տուաւ քոնկրէսական Ռապըրթ Տոլտի: Այս վերջինն ալ իր կարգին յայտնեց թէ Ցեղասպանութեան ճանաչման գծով շարունակ պիտի աջակցի հայութեան հետ: Նաեւ խօսք առին Քէն Խաչիկեան (Հայ Դատ) եւ շրջանի “Քրիստափոր“ կոմիտէութեան հերթապահ Կրէկ Պետեան:
Նշենք թէ, անցեալ Կիրակի, Ապրիլ 29-ին, կազմակերպութեամբ Իլինոյի Հայ Դատի յանձնախումբին, ցուցադրուեցաւ “Voyage to Amassia“ վաւերագրականը, բեմադրութեամբ` Էրիք Խաչիկեանի:
