Հ.Օ.Մ.-ի Հովանաւորութեամբ Արցախի Համայնքներու Մէջ Տեղադրուեցաւ 101 Արեւային Ջրատաքացուցիչ

0 0
Read Time:1 Minute, 30 Second

 

Հայ Oգնութեան Միութեան հովանաւորութեամբ, Արցախի շարք մը համայնքներու մէջ տեղադրուեցան 101 արեւային ջրատաքացուցիչներ: Հ.Օ.Մ.-ի Արցախի միաւորի ատենապետուհի Լիլիթ Մարտիրոսեան նշեց, որ ծրագիրին իրագործումը կապուած է անցեալ տարուան Մարտին Արցախի մէջ ստեղծուած ճգնաժամին` Ատրպէյճանի կողմէ ստեղծուած կազի եւ ուժանիւթի մատակարարման հարցերուն հետ:

Հ.Յ.Դ. Արցախի կառոյցին եւ Հ.Օ.Մ.-ի Արցախի միաւորին կողմէ ստեղծուած աշխատանքային յանձնախումբը համապատասխան աշխատանքներ տարաւ համայնքներու ղեկավարներուն հետ` ծանօթանալով ընտանիքներու ընկերային հարցերուն: Սկզբնական շրջանին ծրագիրի շահառու հանդիսացան զոհուած, հաշմանդամութիւն ունեցող եւ բազմազաւակ ընտանիքները, որոնց ընտրութեան համար համագործակցեցան Արցախի ընկերային զարգացման եւ գաղթի նախարարութեան հետ:

Կազ չունեցող համայնքներու մէջ Արցախի կառավարութիւնը կը յատկացնէ անհրաժեշտ գումարին յիսուն առ հարիւրը, իսկ կազով ապահովուած համայնքներու մէջ Հ.Օ.Մ.-ը հոգաց ջրատաքացուցիչներու տեղադրման ամբողջ ծախսը:

Ըստ Լ. Մարտիրոսեանի, համապատասխան պայմանագիրները կնքուեցան Արցախի կառավարութեան, Հ.Օ.Մ.-ի Արցախի միաւորի, մատակարար «Շտիգեն» ընկերութեան եւ ծրագիրի շահառուներուն միջեւ:

Արցախի Մարտունի շրջանի Պառաւաթումբ համայնքի բնակիչ Հրանուշ Համբարձումեան ամուսինին հետ 10 երեխայ կը դաստիարակէ: Բազմանդամ ընտանիքը նախապէս հոսանքի համար ամիսը 35 հազար դրամ գումար կը վճարէր, հիմա ընդամէնը հինգ հազար դրամ կը կազմէ տուեալ ծախսը: Ամուսինը հովիւ է: Կազով չապահովուած այս համայնքին մէջ յաճախ կ՛ըլլան նաեւ հոսանքի անջատումներ, ուստի ՀՕՄ-ի աջակցութեամբ չորս ամիս առաջ տեղադրուած արեւային ջրատաքացուցիչը իսկական փրկութիւն էր:

Նոյն գիւղի մէկ այլ բնակիչ եւս` Մանուշ Ներսիսեանը գոհ է ստացուած օժանդակութենէն: Այս ընտանիքին մէջ 4 երեխայ կը դաստիարակուի: Ըստ կեսրոջ` Նայիրա Համբարձումեանի, ջուրը տաքցնելու համար նախապէս շատ փայտ կը վառէին, իսկ հիմա այդ առումով դիւրացած է կենցաղը, առաւել եւս, որ տան մէջ հիւանդ ունին:

Մարտունի շրջանի Կաղարծի համայնքի ղեկավար Գարուշ Սարգսեանը նշեց, որ 2022 թուականին իրենց համայնքին մէջ երեք բազմազաւակ ընտանիքներու համար տեղադրուած է երեք արեւային ջրատաքացուցիչներ: «Իբրեւ կազով չապահովուած համայնքի բնակիչ` ծրագիրը դրական կը գնահատեմ, եւ մեծ աջակցութիւն կը համարուի մանաւանդ բազմազաւակ ընտանիքներու համար», ըսաւ Կաղարծի համայնքին ղեկավարը:

 

 

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published. Required fields are marked *

Social profiles