0
0
ԵՐԵՒԱՆ (Յուլիս 2. 2011).- Յուլիս 1-ին Ծաղկաձորում իր աշխատանքներն աւարտեց Հ.Յ.Դ. 31-րդ Ընդհանուր ժողովը: Բացման պաշտօնական նիստը գումարուեց Յունիս 24. 2011-ին, Երեւանում, այնուհետեւ ժողովն իր աշխատանքները շարունակեց Ծաղկաձորում:
Օրակարգի բոլոր հարցերի քննարկումից յետոյ, ժողովը ընտրեց 2011-2015 քառամեակի Հ.Յ.Դ. Բիւրo, հետեւեալ կազմով.-
Վիգէն Բաղումեան
Դաւիթ Լոքեան
Վահան Յովհաննէսեան
Հրանդ Մարգարեան
Լեւոն Մկրտչեան
Մկրտիչ Մկրտիչեան
Մարիօ Նալպանտեան
Գէորգի Պետրոսեան
Յակոբ Տէր Խաչատուրեան
Յուլիսի 2-ի իր առաջին լիագումար նիստում, Հ.Յ.Դ. Բիւրոն ներկայացուցիչ ընտրեց Հրանդ Մարգարեանին:
ՅԱՅՏԱՐԱՐՈՒԹԻՒՆ
Հանգամանալից քննութեան ենթարկելով Հայրենիքի եւ Սփիւռքի ազգային-քաղաքական իրավիճակը, Հայաստան-Արցախ-Սփիւռք եռամիասնութեան կարողականութեան լիարժէք օգտագործման հնարաւորութիւնները, Երկրի ներքաղաքական, սոցիալ-տնտեսական, բարոյահոգեբանական կացութիւնն ու դիմագրաւած արտաքին մարտահրաւէրները` Հ.Յ.Դ. 31-րդ ընդհանուր ժողովը արձանագրում է.
Ինքնիշխան, ժողովրդավար, իրաւական եւ սոցիալական պետութիւն կառուցելու, տարածաշրջանում եւ աշխարհում ազդեցիկ գործօն դառնալու մեր ժողովրդի նպատակը տակաւին մնում է չիրագործուած:
Սփիւռքը, շարունակելով անբարենպաստ պայմանների մէջ իր հայկական ինքնութիւնը պահպանելու ճիգերը, ստիպուած է դիմագրաւել լուրջ մարտահրաւէրների, ինչը պահանջում է ներուժի կուտակման եւ միասնութեան առաւելագոյն աստիճան:
Արցախի հիմնահարցը շարունակում է մնալ չկարգաւորուած, ցայսօր չի յաջողուել միջազգայնօրէն ամրագրել Լ.Ղ.Հ. փաստացի անկախութիւնը, չի ապահովուել մեզ պարտադրուած պատերազմի արդիւնքում նուաճուած ռազմաքաղաքական ձեռքբերումների անշրջելիութիւնը:
Հայ-թրքական յարաբերութիւնները, Թուրքիոյ կողմից Հայոց Ցեղասպանութեան ճանաչման եւ պահանջատիրութեան հանդէպ ժխտողական կեցուածքի պատճառով, ի սկզբանէ դատապարտուած էին ձախողման: Անհրաժեշտ է Հայաստան-Թուրքիա արձանագրութիւններից Հայաստանի ստորագրութեան ետկանչմամբ եզրափակել ներկայ գործընթացը:
Հայաստանի Հանրապետութիւնում`
ա) Գործող իշխանութեան սոցիալ-տնտեսական քաղաքականութիւնը չի բխում բնակչութեան բացարձակ մեծամասնութեան շահերից:
բ) Խորանում է աղքատութիւնը, նուազում է վստահութիւնը ապագայի հանդէպ, արտագաղթի վտանգաւոր միտում է նկատւում:
գ) Քաղաքական ու տնտեսական իշխանութիւնների սերտաճումը յանգեցրել է մենաշնորհների, ազատ մրցակցութեան բացակայութեան եւ ստուերայնութեան մեծ ծաւալների:
դ) Երաշխաւորուած չեն անհատի եւ հանրութեան իրաւունքներն ու ազատութիւնները, լիարժէք քաղաքացիական հասարակութիւն չի կայանում, առկայ բացասական բարոյահոգեբանական մթնոլորտը խոչընդոտում է Հայրենիքի լիարժէք քաղաքացու ձեւաւորմանը եւ սոցիալական առաջընթացին:
է) Յայտարարուած սկզբունքների եւ իրական կեանքի անհամապատասխանութիւնը յանգեցրել է պետականութեան ու իշխանութեան, ընտրութիւնների միջոցով ժողովրդի իշխանութիւն ձեւաւորելու հանդէպ անվստահութեան:
Մեկնելով այս հաստատումներից ` Ընդհանուր ժողովը յայտարարում է.
Հ.Յ. Դաշնակցութեան քաղաքական օրակարգի գլխաւոր առաջնահերթութիւնն ու համակուսակցական խնդիրը առաջիկայ համապետական ընտրութիւնների նախապատրաստութիւնն է` նպատակ ունենալով համակարգային իշխանափոխութեամբ նոր որակի իշխանութեան ձեւաւորումը, համակարգային բարեփոխումները, ազգային-պետական ուղեգծի եւ սոցիալական արդարութեան սկզբունքների արմատաւորումը, քաղաքական համակարգի լիարժէք կայացումը, Հայաստանի արագընթաց զարգացումը:
Մենք վստահ ենք, որ Հայաստանի բնակչութիւնն ու աշխարհասփիւռ հայութիւնը կարող են մէկտեղել իրենց ուժերը եւ մեր Հայրենիքի ու ժողովրդի համար արժանապատիւ ապագայ երաշխաւորել:
Մենք ի վիճակի ենք առանց զիջելու եւ վտանգելու համազգային ձեռքբերումները, նպատակներն ու շահերը` ապահովել Հայրենիքի կայուն զարգացումը, ի նպաստ հայութեան կարգաւորել Արցախի հիմնահարցն ու հայ-թրքական յարաբերութիւնները, հետապնդել Ցեղասպանութեան եւ հայրենազրկման հետեւանքների արդարացի հատուցումը, պաշտպանել ջավախահայութեան օրինական իրաւունքները:
Մենք կարող ենք նոր որակ հաղորդել Հայրենիք-Սփիւռք յարաբերութիւններին, փոխլրացնել միմեանց եւ աշխարհին ներկայանալ համայն հայութեան ներուժով: Հայրենիք-Սփիւռք յարաբերութիւնները պէտք է ստանան առաւել խորքային բնոյթ: Սփիւռքի կազմակերպման եւ առաւել քաղաքականացման ճիգը պէտք է լինի տեւական:
Մենք պարտաւոր ենք Հայաստանը դարձնել հզօր, ժողովրդավար, սոցիալական արդարութեան վրայ հիմնուած, թռիչքաձեւ զարգացող պետութիւն, ուր ազատ անհատն ու համերաշխ հասարակութիւնը վստահութեամբ կը նայեն ապագային, կ’ապրեն բարեկեցիկ, ստեղծագործ կեանքով: Մենք պէտք է կարողանանք բացառել ներազգային պառակ¬տումն ու թշնամանքը, վեր կանգնել անձնական ու խմբակային շահերից, օրէնքի իշխանութիւն եւ սոցիալական արդարութիւն հաստատել, երկիրը դուրս բերել զարգացման մայրուղի:
Հայաստանի Հանրապետութեան եւ Լեռնային Ղարաբաղի Հանրապետութեան 20-ամեակի շեմին, Հ.Յ. Դաշնակցութիւնը վերահաստատում է իր կամքն ու վճռականութիւնը` բովանդակ ուժերով եւ աշխարհասփիւռ կարողականութեամբ կարելին ու անկարելին անելու յանուն հայ մարդու, հայ հաւաքականութեան եւ հայկական պետականութեան անշեղ վերելքի:
Հ.Յ.Դ. 31-ՐԴ ԸՆԴՀԱՆՈՒՐ ԺՈՂՈՎ
Ծաղկաձոր, Յուլիս 1, 2011
Հ.Յ.Դ. Մամլոյ Դիւան
