ԿԵԴՐՈՆԱԿԱՆՑԻՆ ԵՒ ԵԹԵՐԻ EXHIBITIONISM-Ը

0 0
Read Time:1 Minute, 51 Second

 

           

Աւանդապաշտ լայնամիտ մըն է Արմենակ: Կիրակի օր, եկեղեցիի բակը, բաժակ մը սուրճով ցուրտին դէմ կը դնէինք: Ան խօսեցաւ համատարած exhibitionnism-ի մասին:

            – Սիրելիս, ինքնացուցադրական ախտէ վարակուած ենք: Ախտը կար, հոգեբոյժները կը խօսին այդ մասին: Հիւանդները բացառութիւն էին: Հիմա, համացանցը ախտին արձակ դաշտն է: Ամէն բանի համար վիճակագրութիւն կազմողները օր մի պիտի ըսե՞ն, թէ ամէն վայրկեան որ կ’անցնի քանի հազար կամ միլիոն հոգի իրիրենց պատկերը կը սփռեն աշխարհով մէկ, պատկեր՝ փողոցը, ճաշի ժամանակ, լոգանքի պահուն, երբ ընկերուհին կը գրկէ…: Աւստրալիոյ զարմուհին ինչո՞ւ պիտի հետաքրքրուի, թէ Շաղիկը կամ Շողիկը, ի՞նչ շապիկ հագած է այսօր, կամ ո՞ր ճաշարանը գացած է Դաւիթին կամ Ճորճիկին հետ:

            – Արդիականութիւն է,- ըսի:

            – Արդիականութեան դէմ չեմ: Ինչո՞ւ Մարալը Լոս Անճելըս գտնուող դասընկերը կամ դասընկերուհին տեղեակ պիտի պահէ, որ ծովափ գացած է եւ լողազգեստով նկար ղրկէ, ըսէ որ նոր շնիկ բերած են տուն եւ ղրկէ շան պատկերը՝ իրենց գիրկը: Հիւանդագին է: Բժշկական բառարան մը բա՛ց, հոն կը գտնես այս ցուցամոլիկութեան-ցուցադրականութեան մասին բացատրութիւններ, կ’իմանաս որ exhibitionnist-ները ունին այլանդակ մղումներ եւ կը տառապին մտացածին պատկերներով, հոգեբոյժի կը դիմեն դարմանուելու համար:

            – Արմենակ, ինչե՜ր կ’ըսես: Միլիոնները հոգեբո՞յժի պիտի ղրկես:

            – Մարդիկ հարսանիքի կ’երթան, փոխանակ ուրախ ժամեր անցնելու, սելֆիները շալկած մէկէն միւսին կ’երթան, ապա անկիւն մը կը քաշուին պատկեր սփռելու համար մոլորակի վրայ: Կը խորհի՞ն, որ կարեւոր կը դառնան կամ անմահութիւն կը նուաճեն:

            Երբ կը խօսէինք, ծանօթի երիտասարդ աղջիկը իր սելֆին բռնած մօտեցաւ մեզի:

            – Պարոն Արմենակ, կ’ուզեմ ձեզի հետ նկարուիլ եւ Լոսի ու Պուէնոս Այրէսի հօրեղբայրներուս ղրկել, անոնք ձեզ լաւ կը ճանչնան:

            Ըսաւ, կանգնեցաւ Արմենակի կողքին, քանի մը քայլ անդին բռնած սելֆիով նկարուեցաւ: Արմենակ շարժում մը ըրաւ ծուռ խօսք մը ըսելու համար: Ոտքին կոխեցի: Ինծի նայեցաւ, մինչ այդ աղջիկը երիտասարդի մը հետ կը նկարուէր, հաւանօրէն իր ընկերոջ պիտի ղրկէր անոր նախանձը գրգռելու համար:

            Արմենակ գլուխը օրօրեց եւ ինքնիրեն խօսեցաւ.

            – Համակարգիչ եւ համացանց չե՞ն հիւանդանար, exhibitionnism-ի միլեառաւոր պատկերներով, ախտը դարմանելու համար առողջապահական նախարարութիւնները պիտի փակե՞ն անոր կայքերը, selfi-ները պիտի հաւաքե՞ն եւ բաժնե՞ն լոլիկ եւ լուբիա մշակողներուն, որպէսզի անոնցմով տունկերուն ճիւղերը կապեն:

            Հանդարտեցնելու համար ըսի.

            – Այլեւս անծանօթ-անկարեւոր մարդ չկայ: Բոլորին պատկերները եթերին մէջ են:

            – Եթէ ամէն մարդ կարեւոր է, հազուագիւտ անկարեւորները իսկական կարեւորներ կը դառնան,- ըսաւ հնդկացած հայ կուրուն:

Մակար ի Գաղիա, 17 դեկտեմբեր 2018

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published. Required fields are marked *

Social profiles