0
0
ԵՐԵՒԱՆ.- Հ.Յ.Դ. Բիւրոյի Երիտասարդական գրասենեակը կը տեղեկացնէ, որ Օգոստոս 25-28ին Ռումանիոյ մայրաքաղաք Պուքրէշի մէջ, տեղի ունեցաւ Ընկերվարական երիտասարդներու միջազգային միութեան Սեւծովեան շրջանի համագործակցութեան երկիրներու ժողովը, որուն կարգախօսն էր «Պայքար կաշառակերութեան եւ անարդարութեան դէմ»: Մասնակցեցան աւելի քան քսան անձեր տաս անդամ կազմակերպութիւններէ` Հայաստանէն, Վրաստանէն, Ուքրայինայէն, Պուլկարիայէն, Պիելոռուսիայէն եւ այլ երկիրներէ:
Հ.Յ.Դ. Երիտասարդականը ներկայացուցին Ընկերվարական երիտասարդներու միջազգային միութեան փոխնախագահ Կարապետ Շատոյեան եւ Հայաստանի երիտասարդական միութեան անդամ Հայկուհի Նալպանտեան:
Օրակարգին մէջ ներառուած էին շրջանին համար առաջնահերթ բազմաթիւ հարցեր, ինչպէս` կաշառակերութիւնը, մարդու իրաւունքները, շրջանային տագնապները, ընկերային ցանցերուն մէջ աշխուժութիւնը եւ այլն: Մասնաւորապէս նշուեցաւ, որ շրջանի անկայուն վիճակը կախեալ է տագնապներէն, որոնց իբրեւ օրինակ նշուեցաւ նաեւ Արցախի խնդիրը:
Հ.Յ.Դ. Երիտասարդականը իր դիրքորոշումին մէջ լուսարձակի տակ առաւ Արցախի ժողովուրդին ինքնորոշման իրաւունքը եւ հարցը բացառապէս խաղաղ ուղիով լուծելը: Կոչ ուղղուեցաւ` ցուցաբերելու հանդուրժողականութիւն եւ միասին պայքարելու յանուն շրջանի կայուն ապագային:
Երիտասարդները համոզում յայտնեցին, որ իրենց երկիրներուն մէջ յարգելով ժողովրդավարական արժէքները, կրնան հասնիլ կարեւոր փոփոխութիւններու, եւ քանի որ ժողովրդավարութիւնը ժամանակի հրամայականն է, ապա իրենցմէ կախեալ են այդ փոփոխութիւնները:
Մասնակիցները այցելեցին Ռումանիոյ խորհրդարան, ինչպէս նաեւ տեղի ունեցան հանդիպումներ Ռումանիոյ Ընկերվար-ժողովրդավարական կուսակցութեան եւ Արհեստակցական միութեան անդամներուն հետ:
