Հ.Մ.Ը.Մ.-ի Դիւաններու Ժողովը Փրովիտէնսի Մէջ.- Նաւասարդեան Խաղերու Նախապատրաստական Աշխատանքներու Ներկայացում

Հ.Մ.Ը.Մ.-ի Փրովիտէնսի մասնաճիւղը հիւրընկալեց Արեւելեան Միացեալ Նահանգներու շրջանի վարչութիւններու դիւաններու ժողովը, կազմակերպուած Շրջանային Վարչութեան կողմէ, որ տեղի ունեցաւ Շաբաթ, Մարտ 25-ի շաբաթավերջին, Սրբոց Վարդանանց Եկեղեցւոյ Արամեան սրահին մէջ:
Այս զբաղ եւ արդիւնաբեր ժողովին, Շրջանային Վարչութիւնը խօսք ուղղեց բոլոր մասնաճիւղերու Վարչութիւններուն հետեւելու բոլոր շրջաբերականներուն ,որպէս զի յաջողութեամբ արձանագրուին մարզական եւ սկաուտական աշխատանքները: Օրուայ օրակարգը կը ներառէր- մասնաճիւղերու գործունէութեան նախագիծ եւ հակիրճ զեկոյց, Շրջանային Վարչութեան գործունէութեան ամփոփ տիղեկագիր, շրջանի նիւթական իրավիճակ եւ գործունէութեան նախագիծ, յարաբերական եւ կազմակերպական ուղեցոյցեր, շրջաբերական եւ նամակներ, կայքէջ, մասնաճիւղերու ատենագրութիւններ եւ նամակներ, մասնաճիւղի կապ, շրջանի 40-ամեակ 2017, Հ.Մ.Ը.Մ.-ի 100-ամեակ 2018, կանոնագիր, Շրջանային Մարզական Յանձնախումբի զեկոյց, 2017, 2018 եւ 2019 Նաւասարդեան խաղեր, Համա-Հ.Մ.Ը.Մ.-ական 10-րդ Խաղեր 2017-ին Հայաստան, Գանատայի Շրջանի խաղեր, քարոզչական եւ արհեստագիտական (IT), Մարզիկ ամսաթերթ, կայքէջ եւ դիմատետր (Facebook), Հայրենիք եւ Արմինիըն Ուիքլի, ռազմավարական ծրագիր, Հ.Մ.Ը.Մ. եւ Հ.Ե.Դ. պարբերաթերթ, անդամական ցուցակ, Շրջանային Սկաուտական Խորհուրդի նախագիծ, յարաբերութիւն մասնաճիւղերու, 2017 եւ 2019 Շրջանային բանակում, Համա-Հ.Մ.Ը.Մ-ական 11-րդ Ընդհանուր բանակում 2018-ին Հայաստան, դաստիարակչական սեմինարներ ատենապետներու, ատենադպիրներու, գանձապահ եւ հաշուապահներու, մարզական եւ սկաուտական ներկայացուցիչներու, Google, Homenetmen.org եւ Ե-նամակ:
Դիւաններու ժողովի ընթացքին, Փրովիտէնսի Նաւասարդեան խաղերու կազմակերպիչ յանձնախումբը ներկայացուց մանրամասն զեկոյց մը իր նախապատրաստական աշխատանքներուն մասին, քաջալերելով բոլորը որ մեծ խանդավառութեամբ ու կորովով պատրաստուին Հ.Մ.Ը.Մ.-ի Նաւասարդեան խաղերուն, Յուլիս 1-4, 2017-ի շաբաթավերջին՛ ու յաջողութեամբ պսակուին մարզական խաղերը: Ամերիկայի Արեւելեան շրջանէն եւ Գանատայէն, Փրովիտէնս պիտի ժամանեն մօտ 750 սկաուտներ եւ մարզիկներ, որոնք պիտի մասնակցին ոտնագնդակի (ֆութպոլ), կողովագնդակի (պասքեթ), վոլի-պոլի, վազքի, լողալու, թենիսի եւ փինկ փոնկի մրցումներուն, վստահաբար պիտի անցնեն յաջող եւ հաճելի ժամանակ իրենց Հ.Մ.Ը.Մ.-ական ընկերներուն հետ: Ընկերային յանձնախումբը կազմակերպած է զանազան ձեռնարկներ, հաճելի հայկական մթնոլորտ ստեղծելու համար: Կիրակի, Յուլիս 2-ի երեկոյեան Պիլթմոր պանդոկին մեջ, տեղի պիտի ունենայ պարահանդէս, ներկայացնելով սիրուած երգիչ՝ Գէորգ Արթինեան եւ նուագախումբ, ինչպէս նաեւ Տի Ճէ Րամզ: Երկուշաբթի երեկոյեան, Յուլիս 3-ին ճաշկերոյթ պարահանդէս, ներկայացնելով տաղանդաւոր երգիչ՝ Էլի Պէրպէրեան եւ նուագախումբ, ինչպէս նաեւ Տի Ճէ Րամզ: Այս երկու սիրուած երգիչները պիտի խանդավառեն երիտասարդութիւնը եւ բոլոր ներկաները:
Այս մարզական խաղերուն պիտի յիշատակուի Հ.Մ.Ը.Մ.-ի 99-ամեայ ծառայութիւնը Հայ երիտասարդութեան: Ձեր աջակցութեամբ, քաջալերութեամբ եւ գաղութային համագործակցութեամբ, պիտի կարենանք յաջողութեամբ պսակել այս մարզական խաղերը: Հ.Մ.Ը.Մ.-ի սրտագին փափաքն է որ բոլորդ մասնակցիք եւ քաջալերէք այս մարզական խաղերուն եւ խրախճանքներուն, ինչպէս նաեւ արձանագրելով ձեր սրտագին բարեմաղթութիւնները յուշամատեան գրքոյկին մէջ: Կրնաք այցելել Հ.Մ.Ը.Մ.-ի Նաւասարդեան խաղերու կայքը էջը www.navasartianeusa.com եւ ստանալ բոլոր մանրամասնութիւնները:
Մեծ ակնկալութեամբ կը սպասենք միասնաբար անցնելու Յուլիս 1-4, 2017-ի շաբաթավերջը Փրովիտէնսի մէջ:

Յ.Խ.

Be the first to comment

Leave a Reply

Your email address will not be published.


*