ԱՄԵՐԻԿԱՅԻ ՀԱՅ ՄՇԱԿՈՒԹԱՅԻՆ ՄԻՈՒԹԵԱՆ 20-ՐԴ ՆԱՒԱՊՏՈՅՏԸ

Պարպարա Յարութիւնեան

(անգլերէնէ թարգմանուած՝ ՀԱՅՐԵՆԻՔ – Պոսթըն)

Ամերիկայի Հայ Մշակութային Միութեան կազմակերպած 20-րդ տարեկան նաւապտոյտին ազդանշանը տրուեցաւ Յունուար 21ին, Մայամիի նաւահանգիստէն: Աւելի քան 1300 հայորդիներ, բարձրացան ՝՝Ռոյըլ Քարիպիըն՝՝ ընկերութեան ՝՝Նավիկէյթըրզ աֆ տը Սիզ՝՝ շքեղ զբօսանաւը, որ օժտուած է արդի սարքաւորումներով՝ չմշկումի հարթակ, ժայռ բարձրանալու պատ, կողովագնդակի դաշտ, եւայլն:
Մասնակցող հայորդիները ժամանած էին հետեւեալ աշխարհատարած երկիրներէն` Աւստրալիա, Հայաստան, Գանատա, Անգլիա, Ֆրանսա, Գերմանիա, Լիբանան, ինչպէս նաեւ Ա.Մ.Ն.ի 25 նահանգներէն:
Ա.Մ.Ն. արեւելեան շրջանի Առաջնորդական փոխանորդ` Անուշաւան Եպս. Դանիէլեան իր մասնակցութիւնը կը բերէր այս նաւապտոյտին, նաեւ Հայաստանի մօտ Միացեալ Նահանգներու նախկին դեսպան՝ Ճոն Էվընզը, իր կողակից՝ Տոնային հետ:
Քսան տարի առաջ հազիւ քանի մը հարիւր հայորդիներով սկսած այս նաւապտոյտը, քսան տարի ետք կը կատարուէր 1300 հայորդիներու մասնակցութեամբ: Քսան տարիէ ի վեր հերթականութեամբ կազմակերպուող այս ձեռնարկը, իրարոու կը ծանօթացնէ զանազան գաղթօճախներէ ժամանած հայորդիներ, որոնք կը վայելէն ճոխ յայտագիր մը: Միշտ ալ նորութիւններով լեցուն է այս նաւապտոյտը, որ պատճառ դարձած է նաեւ որ երիտասարդներ յաւելեալ ծանօթանալով եւ իրենց կապերը պահելով ընտանիք կազմեն:
Ուրբաթ երեկոյեան զբօսանաւը ուղղուեցաւ դէպի Քարայիպեան շրջան, յաջորդաբար կանգ առնելով Արուպա, Պոնէր, Քուրասաօ, եւ Լապատի: Ամէն օր նաւի մատուռի մէջ առաւօտեան ժամերգութիւն կը կատարուէր Առաջնորդական փոխանորդ` Անուշաւան Եպս. Դանիէլեանի գլխաւորութեամբ, որուն կը մասնակցէին մեծ թիւով հաւատացեալներ:
Յատուկ սեղան մը դասաւորուած էր, յաւելեալ տեղեկութիւններ փոխանցելու համար Ամերիկայի Հայ Մշակութային Միութեան կազմակերպած մէկ այլ ձեռնարկին՝ Այցելութիւն Հայաստան եւ Արցախ, յառաջիկայ Սեպտեմբեր 17-էն Հոկտեմբեր 1:
Տոհմիկ պարի սիրահարներուն համար, Մարկօ Քաֆթաճեան յատուկ դասընթացքներ կազմակերպած էր: Իսկ նարտի խաղի եւ պլօթ թղթախաղի սիրահարներուն համար, կազմակերպուեցան յատուկ մրշաշարքեր, կազմակերպութեամբ Անդրանիկ Պուտագեանի, Ճոն Ճերիքեանի եւ Համբար Վարդանեանի:
Տարիներ շարունակ բացակայելէ ետք, ներկայ էր նաեւ ՝՝Հայրենիք՝՝ի գրախանութը, որ հետաքրքրութիւն ստեղծեց մասնակցող հայորդիներու մօտ:
Գեղարուեստական յայտագիրը ճոխ էր: Այսպէս Ժոզէֆ Գրիգորեան, Գէորգ Արթինեան, Յարութ Խաչոյեան, Անդրանիկ Մուրատեան, Սալբի Մայիլեան, Յարութ Յակոբեան եւ Արմէն Յովհաննիսեան իրենց ելոյթներով խանդավառեցին մասնակցող հայորդիները:
Անգլիայէն ժամանած դերասան Գեւ Օրգեան անգամ մը եւս իր սրամտութիւններով եւ երաժշտութեամբ անմոռանալի ծիծաղաշարժ վայրկեաններ ստեղծեց: Ան երրորդ անգամ ըլլալով, ան կը մասնակցէր այս նաւապտոյտին:
Առաջին անգամ ըլլալով, տեղի ունեցաւ հաւաք մը, կազմակերպութեամբ բժշկական-ատամնաբուժական-առողջապահական բնագաւառէն ներս մասնագիտացած բժիշկներու: Դասախօսութիւններ կատարուեցան զանազան մասնագէտ բժիշկներու կողմէ, որոնց կարգին՝ Րաֆֆի Յովհաննէսեան (հիմնարկի պատասխանատու), Ճոն Պիլեզիքեան, Վարդուհի Պետրոսեան, Ռոպերթ Բարկրանեան եւ Լօրանս Նաճարեան:
Տեղի ունեցան նաեւ այլ ձեռնարկներ, որոնց կարգին.-

՝՝Քոզմիք Ռէյ՝՝ը Հայաստանի մէջ.- բանախօս՝ Անահիտ Երեմեան
՝՝Արցախի Քառօրեայ պատերազմէն ետք՝՝.- բանախօս՝ Մարի Մաթոսեան
Վարդանանց Ասպետներու մասին ծանօթացում եւ հիւրասիրութիւն
Հ.Օ.Մ.ի թէյասեղանը` հայ կանանց մեծագոյն կազմակերպութեան ծրագիրներու զեկուցում
՝՝Հայոց Ցեղասպանութիւնն ու Ա.Մ.Նահանգները՝ .- բանախօս՝ Ճոն Էվընզ
Հայ Առեւտրականներու հաւաք
Միջին Արեւելքի հայ գաղութներու ներկայ իրավիճակը.- բանախօս՝ Անուշաւան Եպս. Դանիէլեան
՝՝Արցախի ներկայ իրավիճակը՝՝.- բանախօս՝ Անդրանիկ Գասպարեան
Կլոր Սեղան՝ Հայաստան եւ Արցախ.- մասնակցութեամբ Տոքթ. Րաֆֆի Հովհաննիսեանի, Ճոն Էվընզի եւ Անդրանիկ Գասպարեանի
Առաջին երեկոն բարի գալուստի ընդունելութիւնը տեղի ունեցաւ Մարիա Դաւիթեանի եւ Մարկօ Քաֆթաճեանի ներկայութեամբ, որուն ընթացքին յանձնախումբի անդամները խօսեցան յառաջիկայ օրերու ձեռնարկներու մասին:
Առաջին երկու օրերը, մասնակցողներուն մնացին շքեղ զբօսանաւուն վրայ, վայելելով արդի սարքաւորումները, հիւրասիրութիւններն ու ձեռնարկները:
Չորեքշաբթի Յունուար 25-ին տեղի ունեցաւ յատուկ հայկական երեկոն եւ հիւրասիրութիւն, նաւապտոյտը կազմակերպող՝ Ամերիկայի Հայ Մշակութային Միութեան յանձնախումբին եւ ՝՝Թրավըլ Կրուփ Ինթըրնաշընըլ՝՝ ընկերութեան կողմէ:
Ուրբաթ, Յունուար 27-ի առաւօտեան, Պարպարա Յարութիւնեանի եւ իր յանձնախումբի ջանքերով փառատօն կազմակերպուած էր լողաւազանի շուրջը, ուր մրցանակներ շնորհուեցան եռագոյնով կարուած լաւագոյն հայկական տարազի համար եւ լաւագոյն հայ պարողին: Այս ամենամեայ մրցոյթին շատեր կը մասնակցին նախապէս պատրաստելով իրենց տարազներն ու տոհմիկ պարերը:
Լապատի կղզին Հայիթիի հիւսիսային շրջանին մէջ կը գտնուի եւ վերապահուած է յատուկ ՝՝Ռոյըլ Քարիպիըն՝՝ ընկերութեան, ուր մասնակցող հայորդիները վայելեցին բնութիւնը, արեւը, աւազն ու ծովը:
Արուպան պատմական կղզի մըն է, հռչակաւոր իր ծովափով:
Քուրասաօն կը գտնուի Վենեզուելայէն 35 մղոն հեռու եւ իր իւրայատուկ գեղեցկութեամբ կը ներգրաւէ զբօսաշրջիկը:
Իսկ Պոնէրը սուզողներու դրախտն է: Հասարակածինի մօտ, այս կղզին միշտ ալ տաք է եւ արեւը օրական 12 ժամ անդադար ներկայութիւն է:
Այսպէս հայորդիներ` 9 օրերու ընթացքին վերանորոգեցին հին բարեկամութիւններ, նոր բարեկամներու հանդիպեցան, ընտանեկան հաւաքոյթներ կազմակերպեցին, զանազան մշակութային ձեռնարկներուն ներկայ եղան, հայկական երաժշտութիւն ունկնդրեցին, պարեցին, համադամ ուտելիքներ վայելեցին եւ ուրախ օրեր անցուցին ջերմ արեւի ու հայկական տաքուկ մթնոլորտի ներքեւ:
21-րդ նաւապտոյտը պիտի կատարուի Յունուար 20-28, 2018-ին, ՝՝Ռոյըլ Քարիպիըն՝՝ ընկերութեան ՝՝Ֆրիտըմ աֆ տը Սիզ՝՝ զբօսանաւով: Այս անգամ նկատի առնուած են Սէյնթ Քիթս, Սէյնթ Մարթըն, Սան Խուան եւ Լապատի կղզիները:

ՄԱՍՆԱԿՑՈՂՆԵՐԸ Կ’ԸՍԵՆ
՝՝Միշտ ալ կը փափաքէի մասնակցիլ այս նաւապտոյտին: Ի վերջոյ երազս իրականացաւ: Առաջին օրէն իսկ, ամէն բան լաւ ընթացաւ: Շատ լաւ տպաւորուած եմ: Ամէն օր ձեռնարկներ կազմակերպուած էին՝՝, կը յայտնէ Շաքէ Թոքմաճեան (Կլենտէյլ – Քալիֆորնիա)
՝՝Երրորդ անգամն է որ կը մասնակցիմ այս նաւապտոյտին, հեռաւոր Լիբանանէն ժամանելով: Իսկապէս հաճոյքը ունեցայ մասնակցելու այս նաւապտոյտին: Կը շնորհաւորեմ յանձնախումբը, որ մեծ յաջողութեամբ կազմակերպած էր այս ժամանակ խլող հաւաքը՝՝, կը յայտնէ Ալին Գայանճեան-Օհանեան (Պէյրութ-Լիբանան)

՝՝1300 ուրախ ու զուարթ հայորդիներ քարայիպեաններու դրախտին մէջ: Ասկէ աւելի լաւ բա՞ն՝՝, կը յայտնեն Յակոբ եւ Այտա Տաքեսեան (Տիթրոյթ – Միշիկըն)

՝՝Ամուսինիս հետ հաճելի ու անմոռանալի օրեր անցուցի: Ծանօթացանք բազմատիւ հայերու: Յիշատակներս պիտի մնան անմոռանալի: Կը յանձնարարեմ ամէն մէկ հայորդիի, որպէսզի մասնակցի այս նաւապտոյտին: Կը վերադառնանք դէպի արմատներ: Վարձքերնիդ կատար՝՝, կը յայտնէ Թամար Քելեյեան (Սիտնի – Աւստրալիա)

՝՝Նաւուն մէջ, ամէն կողմ հայերէն կը լսուէր: Ինչ հաճելի երեւոյթ: Ներկայ եղանք բազմաթիւ ձեռնարկներու, հաւաքներու եւ հանդիսութիւններու: Հայերը կ՛ապրին եւ դեռ պիտի ապրին՝՝, կը յայտնեն Ռոզա Յարութիւնեան եւ Վարդգէս Պպեան (Եչեւան – Հայաստան)

՝՝Շարունակեցէք ձեր ժրաջան աշխատանքը: Պիտի տեսնուինք յառաջիկայ նաւապտոյտին: Այս նաւապտոյտը առիթ մը կը ստեղծէ, որ զանազան գաղթօճախներէ հայորդիներ ժամանեն եւ անմոռանալի ժամեր անցնեն: Ձեռնարկները յաւելեալ առիթ մը կը ստեղծեն, որ ազգային զանազան հարցերու մասին յաւելեալ տեղեկութիւններ ստանանք…՝՝, կը յայտնեն Ղարաքեաններ (Լոս Անճելըս Քալիֆորնիա)

Be the first to comment

Leave a Reply

Your email address will not be published.


*