ՆԻՒ ՃԸՐԶԻ.- ԶՐՈՅՑ-ԲԱՆԱՎԷՃ՝ «ԱՐՑԱԽԻ ՔԱՌՕՐԵԱՅ ՊԱՏԵՐԱԶՄՆ ՈՒ ՀԵՏԵՒԱՆՔՆԵՐԸ»

Ձախէն աջ.- Յակոբ Մելքոնեան (Հ.Յ.Դ. «Դրօ» կոմիտէութեան ներկայացուցիչ), Արցախի Հանրապետութեան ներկայացուցիչ՝ Ռոպերթ Աւետիսեան, Հայաստանի մօտ, Միացեալ Նահանգներու նախկին դեսպան՝ Ճոն Էվընզ, Նիւ Ճըրզիի հովիւ՝ Յովնան Պոզոյեան, մարդկային իրաւունքներու պաշտպան եւ քաղաքական միջնորդ՝ Ռուբէն Մելիքեան, Նիւ Եորք-Նիւ Ճըրզիի Ռ.Ա.Կ.-ի մասնաճիւղի ներկայացուցիչ՝ Նորայր Մկրտիչեան եւ Թիւֆենքեան հիմնարկի տնօրէն՝ Անդրանիկ Գասպարեան

ՆԻՒ ՃԸՐԶԻ.- Մարտ 17-ին, Րիճֆիլտ շրջանի Սուրբ Վարդանանց եկեղեցւոյ սրահին մէջ, տեղի ունեցաւ զրոյց-բանավէճ մը, կազմակերպութեամբ Նիւ Ճըրզիի Հ.Յ.Դ. «Դրօ» կոմիտէութեան եւ Նիւ Եորք-Նիւ Ճըրզիի Ռ.Ա.Կ.-ի մասնաճիւղին:
Աւելի քան երկու հարիւր հայորդիներ ժամանած էին սրահ, հետեւելու համար այս զրոյցին, որուն կը մասնակցէին Հայաստանի մօտ Միացեալ Նահանգներու նախկին դեսպան՝ Ճոն Էվընզ, մարդկային իրաւունքներու պաշտպան եւ քաղաքական միջնորդ՝ Ռուբէն Մելիքեան, Թիւֆենքեան հիմնարկի տնօրէն՝ Անդրանիկ Գասպարեան, եւ Հիւսիսային Ամերիկայի մօտ Արցախի Հանրապետութեան ներկայացուցիչ՝ Ռոպերթ Աւետիսեան: Զրուցավարն էր տեղւոյն ձայնասփիւռի կայանի ղեկավար՝ Վարդան Ապտօ:
Գաղութի ներկայացուցիչներէն՝ Ճէյմս Սահակեան կատարեց այս ձեռնարկին բացումը, բեմ հրաւիրելով զրոյցին մասնակցողները:
Առաջին խօսք առնողն էր Ֆլեչըր համալսարան յաճախած Ռուբէն Մելիքեան, որ յատկապէս անդրադարձաւ ատելութեամբ եւ երկիւղով նշուող Պաքուի կիրարկած վտանգաւոր քաղաքականութեան: Ան յիշեց 2004-ին Պուտափեշտի մէջ, ՆԱԹՕ-ի ժողովի մը ընթացքին հայոց բանակի ծառայող սպայ Գուրգէն Մարգարեանը կացինահարած ազերի սպայ Ռամիլ Սաֆարովի պարագան, որ իբրեւ ազգային հերոս կը ճանչցուի իր երկրէն ներս: Ան շեշտեց թէ, նիւթապէս գոհացնելով օրուան Հունգարիոյ ղեկակարութեան, Ալիեւ կրցաւ ազատ արձակել իր «հերոս» բանակայինը, որ հազիւ վերադարձած Պաքու, ստացաւ պաշտօնի բարձրացում եւ նիւթական օժանդակութիւն:
Մելիքեան նաեւ ցոյց տուաւ տեսարաններ, կարճ ժապաւէններ, ուր կը բացայայտուին թէ ազերիները որքա՜ն կ՛ատեն իրենց սահմանակից դրացին, միաժամանակ աւելցնելով թէ նմանօրինակ ատելութիւն կրնայ նոյնանման կացութիւններ ստեղծել հայորդիներու մօտ:
Հայաստանի մօտ, Միացեալ Նահանգներու նախկին դեսպան՝ Ճոն Էվընզ, իր կարգին յայտնեց թէ Ատրպէյճան հակառակ ԵԱՀԿ-ի Մինսքի խմբակին հետ գործակցութեան, բազմիցս կը խախտէ զինադադարը: Էվընզ շեշտեց թէ Մելիքեանի կատարած ուսումնասիրութիւնը դրական է եւ առաջնահերթ դեր կը կատարէ հիմնահարցի լուծման գործընթացին մէջ:
Անդրանիկ Գասպարեան իր խօսքին մէջ, անգամ մը եւս նշելով ազերի ղեկավարութեան ունեցած ատելութիւնը՝ հայերուն հանդէպ, շեշտեց թէ կարեւոր է Ռուսաստանի ունեցած ազդեցութիւնը շրջանէն ներս: Գասպարեանի համար, Արցախի պահպանման բանալի միջոցներէն մէկն է վերաբնակեցումը, յատկապէս Հայաստանի եւ Արցախի միջեւ գտնուող Լաչինի եւ Քելպաճարի տարածաշրջաններէն ներս:
Վերջին խօսք առնողն էր Հիւսիսային Ամերիկայի մօտ Արցախի Հանրապետութեան ներկայացուցիչ՝ Ռոպերթ Աւետիսեան, որ յատկապէս անդրադարձաւ սպառազինման մասին: Ան շեշտեց թէ, Պաքու աներեւակայելի գումարներ կը մսխէ արդիականացնելու համար իր բանակը: Աւետիսեան աւելցուց թէ, այս գծով աշխատանք պէտք է տարուի միջազգային բարձր մակարդակի վրայ, արգելք հանդիսանալու որպէսզի նմանօրինակ սպառազինումներ չկատարուին:
Աւարտին տեղի ունեցաւ հարց-պատասխան եւ ապա հիւրասիրութիւն:

 

Be the first to comment

Leave a Reply

Your email address will not be published.


*