Ալիք Շէրիքեան Կը Նշանակուի Հ.Օ.Մ.-ի Մ.Ա.Կ.-ի Աշխատանքներու Համադրիչ

Հայ Օգնութեան Միութեան Կեդրոնական Վարչութիւնը պաշտօնի հրաւիրած է Օրդ. Ալիք Շէրիքեանը՝ որպէս համադրիչ Նիւ Եորքի մէջ Միացեալ Ազգերու Կազմակերպութենէն ներս Հ.Օ.Մ.-ի այլազան աշխատանքներուն։ Համադրումի կողքին, Օրդ. Շէրիքեան պիտի ներկայացնէ Հ.Օ.Մ.-ը Միացեալ Ազգերու Կազմակերպութեան պաշտօնական հաւաքներուն եւ ծրագիրներու յղացման ու կատարման ընթացքին, միաժամանակ մասնակցելով Մ.Ա.Կ.-ի Հանրային Տեղեկատուութեանց Բաժանմունքի եւ Տնտեսական եւ Ընկերային Խորհուրդի ծիրերէն ներս գործադրուող ոչ-կառավարական կազմակերպութիւններու այլազան նախաձեռնութիւններուն։
Հարաւային Գալիֆորնիոյ Համալսարանի շրջանաւարտ, Օրդ. Շէրիքեան հետեւած է Համաշխարհային Յարաբերութիւններու դասընթացքներուն, շարունակելով ներկայիս իր բարձրագոյն ուսումը՝ Նիւ Եորքի Համալսարանէն ներս։
Այս առթիւ, Հ.Օ.Մ.-ի Կեդրոնական Վարչութեան ատենապետուհի Գարոլին Շմաւոնեան, ըսաւ, «Օրդ. Շէրիքեան որպէս Հ.Օ.Մ.-ի Կեդրոնական Վարչութեան Մ.Ա.Կ.-ի Յանձնախումբի ներկայացուցիչ, տեւական կապեր պիտի ստեղծէ Մ.Ա.Կ.-ի կառոյցին մէջ գործող յանձնախումբերու գրասենեակներուն ու զանազան ոչ-կառավարական կազմակերպութիւններու ներկայացուցչութիւններու հետ։ Հայ Օգնութեան Միութիւնը, վերջին տարիներու ընթացքին, Մ.Ա.Կ.-էն ներս տարաւ շատ կարեւոր աշխատանքներ՝ համագործակցելով զանազան կազմակերպութիւններու եւ ներկայացուցչութիւններու հետ, միաժամանակ շինիչ դեր ունենալով Նիւ Եորքի Մ.Ա.Կ.-ի Կանանց Իրավիճակի Յանձնաժողովի աշխատանքներուն մէջ։ Կեդրոնական Վարչութեան նպատակն է, շարունակել այդ աշխատանքը եւ Հ.Օ.Մ.-ի մակարդակը աւելի եւս բարձրացնել Մ.Ա.Կ.-էն ներս»:
Շէրիքեան պիտի հետապնդէ Մ.Ա.Կ.-ի ծիրէն ներս Հ.Օ.Մ.-ի Կեդրոնական Վարչութեան կողմէ առաջնահերթութիւն համարուած նպատակները, ինչպիսին են կանանց եւ երեխաներու իրաւունքները եւ ապահովութիւնը, անոնց առողջապահութիւնը, կրթութիւնը, ինչպէս նաեւ կնոջ նիւթական անկախութիւնը։ Հիմնական է Հ.Օ.Մ.-ի համագործակցութիւնը միջազգային համայնքին հետ, որուն հետեւանքով կարելիութեան դուռեր կը բացուին օժանդակելու համար հայրենի թէ սփիւռքեան համայնքներու ընկերային եւ տնտեսական կարիքներուն։
«Շատ հպարտ եւ ուրախ եմ մաս կազմելու միջազգային կազմակերպութեան մը, ինչպիսին է Հայ Օգնութեան Միութիւնը, որուն մարդասիրական, ընկերային եւ կրթական գետնի վրայ տարած աշխատանքները յարգանքի արժանացած են բոլորի՛ն կողմէ։ Խանդավառ եմ ստանձնելու իմ պաշտօնս՝ իբրեւ Մ.Ա.Կ.-ի մէջ Հ.Օ.Մ.-ի ներայացուցիչ եւ մօտէն գործակցելու Հ.Օ.Մ.-ի Կեդրոնական Վարչութեան հետ, աւելի ե՛ւս ամրապնդելու համար Միութեանս դերը Միացեալ Ազգերու Կազմակերպութենէն ներս», յայտնեց Օրդ. Շէրիքեան:

Be the first to comment

Leave a Reply

Your email address will not be published.


*