«Նիւթեր Հ. Յ. Դաշնակցութեան Պատմութեան Համար» Գիրքի Շնորհահանդէս` Երեւանի Մէջ

ԵՐԵՒԱՆ (Հ.Յ.Դ. Մամլոյ Դիւան) – Հայաստանի Գիտութիւններու ազգային ակադեմիայի պատմութեան հիմնարկի «Մեսրոպ Աշճեան» գիտական կեդրոնին մէջ տեղի ունեցաւ պատմաբան Երուանդ Փամպուքեանի խմբագրութեամբ լոյս տեսած` «Նիւթեր Հ. Յ. Դաշնակցութեան պատմութեան համար» արխիւային փաստաթուղթերու բազմահատոր ժողովածուի 12-րդ հատորին շնորհահանդէսը:

Ներկայ էին սփիւռքի նախարար Հրանուշ Յակոբեան, Հ.Յ.Դ. Բիւրոյի անդամներ Կիրօ Մանոյեան եւ Արմէն Ռուստամեան, Հ.Յ.Դ. Հայաստանի Գերագոյն մարմինի ներկայացուցիչ Աղուան Վարդանեան, Ազգային ակադեմիայի նախագահ Ռադիկ Մարտիրոսեան, Ազգային ակադեմիայի պատմութեան հիմնարկի տնօրէն ակադեմիկոս Աշոտ Մելքոնեան, Ազգային ակադեմիայի արեւելագիտութեան հիմնարկի տնօրէն Ռուբէն Սաֆրաստեան, պատմաբաններ, կուսակցական եւ մշակոյթի գործիչներ:

Այս առիթով արտասանած իր  խօսքին մէջ Աշոտ Մելքոնեան նշեց, որ Երուանդ Փամպուքեան կատարած է հսկայական աշխատանք` պատմաբաններուն տրամադրելով պատմագիտական հարուստ նիւթ, ինչ որ իբրեւ անհերքելի սկզբնաղբիւր ունի նաեւ քաղաքական մեծ արժէք, յատկապէս Հայոց ցեղասպանութեան իրողութիւնը հաստատելու առումով:

Պատմական գիտութիւններու դոկտոր Գէորգ Խուդինեան ներկայացուց Դաշնակցութեան արխիւի կազմութիւնն ու անոր անցած ուղիին ոդիսականը` շեշտելով, որ կուսակցութեան առաջնորդներէն մէկուն` Ռոստոմի կատարած առաջին քայլերէն սկսեալ եւ անոր հետեւած միւս երախտաւորներուն ունեցած կարեւոր ներդրումէն ետք Երուանդ Փամպուքեան այս գործի արժանաւոր շարունակողն է: Ան նշեց, որ այդ արխիւները դժուար եղած է պահպանել, եւ Փամպուքեան հսկայական աշխատանք տարած է` զանոնք հաւաքելով եւ ընթերցողին ներկայացնելով: «Այս գիրքը կը կոչուի «Նիւթեր ՀՅ Դաշնակցութեան պատմութեան համար», բայց իսկութեան մէջ անիկա 1890-1915 թուականներու հայոց պատմութեան առաջնակարգ եւ կարեւոր սկզբնաղբիւրներու ժողովածուն է», շեշտեց ան: Այնուհետեւ ողջոյնի խօսք արտասանեցին, զեկուցումներով հանդէս եկան սփիւռքի նախարար Հրանուշ Յակոբեան, ակադեմիկոս Ռուբէն Սաֆրաստեան, Երեւանի պետական համալսարանի պատմութեան բաժանմունքի վարիչ, պատմական գիտութիւններու դոկտոր Էդիկ Մինասեան, ՀՅԴ պատմութեան թանգարանի տնօրէն Անուշ Ամսէեան, Գիտութիւններու ազգային ակադեմիայի Հայոց ցեղասպանութեան թանգարան-հիմնարկի փոխտնօրէն Սուրէն Մանուկեան: Վերջինս Երուանդ Փամպուքեանին յանձնեց Հայոց ցեղասպանութեան թանգարան-հիմնարկին սահմանած «Ճէյմս Պրայս»-ի անուան ոսկի յուշամետալը: Աւարտին խօսք առաւ խմբագիր Երուանդ Փամպուքեան:

Be the first to comment

Leave a Reply

Your email address will not be published.


*