Հայոց Ցեղասպանութեան Վերապրողներէն՝ Քլարա Ռուսեանի Հրաժեշտը

p15-obit1

Քլարա Մովսիսեան-Ռուսեանը ծնած էր Հոկտեմբեր 28, 1914-ին, Խարբերդի Եղէգի գիւղին մէջ: Անոր մայրը՝ Հայկուհի Էքմալեանը փոխադրուած էր Հիւսէյնիկ եւ ծառայած էր կրթական բնագաւառէն ներս, իբրեւ ուսուցիչ: Իսկ հայրը՝ Միացեալ Նահանգներէն ժամանած Նշան Կէօչիւտեանն էր, որ վերադարձած էր Հայաստան, իր ապագայի կողակիցը ունենալու համար:
Կարճ տեւեց այս զոյգին երջանկութիւնը: Վրայ հասաւ Հայոց տեղահանութիւնն ու Ցեղասպանութիւնը: Բազմաթիւ այլ այր մարդոց նման, Նշանն ալ այդ օրուընէ ի վեր անգտանելի է:
Իսկ Հայկուհի եւ փոքրիկն Քլարա կ՛ապրին զարհուրելի ոդիսական մը: Եղեգիէն Ակն, ապա Հալէպ, Մարսէյ, Քուպա: Հայկուհիի քոյրը՝ Թերիզ Գալուստեանը, որ արդէն իսկ Միացեալ Նահանգներ հաստատուած էր, անհրաժեշտ դասաւորումները կը կատարէ որպէսզի իր քոյրը՝ Հայկուհին եւ զաւակը՝ Քլարան հասնին Նոր Աշխարհ 1925ին:
Մինչ այդ այդ ոդիսականի ժամանակ, Քլարա լուրջ հիւանդութիւնէ եւ սնունդի պակասէ կը տառապի: Իսկ Քուպայի մէջ, հազիւ տասնեակ մը գարուններ բոլորած Քլարա կը հանդիպի այլ խարբերդցիի մը՝ Յակոբ Ռուսեանին, որ կօշկակարութեամբ կը զբաղուի եւ ազատ ժամերուն կը զուարճացնէ գաղութի հայութիւնը:
Հետաքրքրական զուգադիպութիւն: 15 տարի ետք, ան Սամըրվիլի (Մասաչուսէց) մէջ կը ծանօթանայ յաջողակ առեւտրական՝ Ճէք Ռուսեանին (նոյնինքն Յակոբը), որ նոյնինքն Քուպայի այդ սրամիտ կօշկակարն էր, որ իր կարգին Խարբերդէն (Սուսուրի գիւղ) էր:
1940-ին ընտանիք կազմած, ամոլը կը փոխադրուի Արլինկթըն եւ կը զբաղուին նպարավաճառութեամբ: Այդ օրերուն Սամըրվիլի Տէյվիս կեդրոնի մօտակայքը, հանրածանօթ էր «Սիտըր Մարքէթ»ը, Սիտեր եւ Սամըր ճամբաներուն միջեւ: Նախապէս, Րոտ Այլընտի մէջ, Քլարա ուսանած էր եւ հաճելի մանկութիւն մը անցուցած էր:
Ամոլը, որ միշտ ալ կը մասնակցէր շրջանի հայ գաղութի աշխատանքներուն, բախտաւորուած էր երկու զաւակներով՝ Արսէն եւ Լինտա (ընտանիք կազմած Խոսրով Ատանալեանին հետ), որոնք իրենց կարգին նուիրուած էին գաղութին՝ Սուրբ Ստեփանոս եկեղեցւոյ, Հայ Երիտասարդաց Դաշնակցութեան եւ Հ.Յ. Դաշնակցութեան:
Սրամիտ էր Քլարան եւ ամէն գնով կ՛ուզէր ուրախացնել իր շրջապատը, սկսելով իր տարեկիցներէն մինչեւ իսկ իր թոռները՝ Քրիսչըն (Կարօ) եւ Սեւակ: Քլարա մահացաւ Հոկտեմբեր 5-ին, խոր ծերութեան մէջ:Թաղման արարողութիւնը տեղի ունեցաւ Ուաթըրթաունի Սուրբ Ստեփանոս եկեղեցւոյ մէջ, Հոկտեմբեր 11-ին, ապա հանգուցեալին մարմինը ամփոփուեցաւ Արլինկթընի գերեզմանատան մէջ:

Be the first to comment

Leave a Reply

Your email address will not be published.


*