Հ.Յ.Դ. Բիւրոյի Յայտարարութիւնը

 

Այսօր, ժամը 12։00-էն սկսեալ, ուժի մէջ մտած է մարդասիրական նպատակներով հրադադարը, Արցախ-Ատրպէյճան շփման գիծի երկայնքին։ Հրադադարի վարչակարգի յարաչափերը (parameters) դեռ պիտի ճշտուին։

Ռազմաճակատի երկայնքով այս արդէն խախտուող հրադադարը չի վերաբերիր, չի կրնար վերաբերիլ արտաքին ճակատի վրայ, միջազգային հանրութեան մօտ մեր աշխատանքներուն, որովհետեւ Ատրպէյճանի իշխանութիւնները կը շարունակեն իրենց ռազմական գործողութիւններն ու ռազմատենչ հռետորաբանութիւնը, Թուրքիան կը շարունակէ անվերապահ աջակցութիւն յայտնել Ատրպէյճանին՝ նաեւ ռազմաճակատին վրայ։

Աշխարհով մէկ պէտք է շարունակենք մեր բողոքի գործողութիւններն ու քաղաքական-յարաբերական աշխատանքները, շեշտելով՝

-Արցախի հարցի կարգաւորման ամենաճիշտ, ամենաարդար եւ ամենաազդու միջոցը՝ Արցախի Հանրապետութեան անկախութեան ճանաչումն է.

-Ատրպէյճան պէտք է իր կողմէ վերահկսուող տարածքներէն հեռացնէ միջազգային ահաբեկչութեան վարձկաններուն, որոնք այնտեղ հասած են Թուրքիոյ նախաձեռնութեամբ ու կարգադրութեամբ.

-Թուրքիան որպէս հակամարտութեան կողմ հանդէս գալու իր բոլոր ջանքերուն պատճառով պէտք է հեռացուի ԵԱՀԿ Մինսքի խումբէն. Թուրքիոյ նկատմամբ պէտք է պատժամիջոցներ սահմանուին՝ ամբողջ տարածաշրջանի կայունութեան հարուածող իր ոտնձգութիւններուն պատճառով.

Այս հրադադարը դեռ չի նշանակեր որ Ատրպէյճան-Թուրքիա դաշինքին կողմէ սանձազերծուած պատերազմը աւարտած է. պատերազմը կը շարունակուի, եթէ նոյնիսկ համեմատաբար մեղմացած են կրակոցները, ռմբակոծումներն ու հրետանակոծումները։

Քաղաքական-քարոզչական աշխատանքներուն զուգահեռ, ամբողջ հայութիւնը պէտք է շարունակէ նոյն թափով մասնակցիլ պատերազմի հետեւանքները դիմակայելու համար՝ համահայկական եւ Հայաստան-Արցախի համար անհրաժեշտ մարդասիրական օժանդակութեան առաքումներուն, որոնք կը համադրուին պետական համապատասխան կառոյցներուն հետ։

Այս պայքարը իր յաղթական աւարտին հասցնելու եւ յաղթանակը ամրագրելու պահը հիմա է։ Բոլորս՝ ի զէն, իւրաքանչիւրս՝ իր հնարաւորութիւններուն առաւելագոյնը տալով։

Հ.Յ.Դ. ԲԻՒՐՕ
10 Հոկտեմբեր 2020

 

Be the first to comment

Leave a Reply

Your email address will not be published.


*