ԿԵԴՐՈՆԱԿԱՆՑԻ ԱՐՄԵՆԱԿԻ ԴՐԱՑԻՆԵՐԸ ԾՈՎԸ ԳՏԱԾ ԵՆ՝ ՊԱՏՇԳԱՄԻ ՎՐԱՅ

0 0
Read Time:1 Minute, 50 Second

 

            Տնարգելութեան դատապարտուածներու մխիթարութիւն է գարնան արեւը: Խօսակիցի բացակայութեան, բուսաբանի պէս կը քննեմ վարդենիներու կոկոնները, կեռեսանիի սպիտակ ծաղիկները, որոնք թիթեռներու պէս կը սաւառնին, դրացի բակերը կ’երթան, կը տեսնեմ, թէ ինչպէս գնդասեղի գլխու չափ թուզերը արդէն գնդիկի չափ են:

            Միայն Արմենակն է, որ երբեմն կը յիշեցնէ թէ քաղաքները եւ գիւղերը մարդիկ կան, որոնք տիրող անհաճոյ վիճակին մէջ անգամ գիտեն զուարճութիւն գտնել, եթէ հիւանդանոց չեն փոխադրուած, պսակաձեւ ժահրով վարակուած ազգական եւ բարեկամ չունին, կամ դիմակաւորուած փողոց դուրս կու գան հաց գնելու, իրենց բակը կամ պատշգամը կը դարձնեն ամառնային զբօսավայր:

            Արդիականացած Արմենակ հիմա սքայփով կը խօսի:

            – Մակա՛ր, մեր բնակած, կողքի եւ դիմացի բազմայարկ շէնքերու պատուհաններուն առջեւ եւ պատշգամներուն վրայ գիշեր-ցերեկ մարդիկ կան, արեւ կը վայելեն, կ’աղմկնեն: Սովորական դարձաւ պատշգամներուն ծովազգեստով կին եւ աղջիկ տեսնել: Անոնք ծովափ գտնուելու պէս արեւ կ’ըմպեն, աւելի ճիշդ, իրենց մորթը կը սեւցնեն, յաճախ եւայի պէս պճնուած: Ուրիշներ ձանձրոյթի դէմ հեռադիտակով կը պայքարին դիտելով գեղուհիները:

            – Լաւ է, նուազ ծախսալից թխութիւն, կամ պարզապէս սեւութիւն:

            – Գիտես ինչ, զարմացայ, որ այնքա՜ն մեծ թիւով հեռադիտակ ունեցողներ կան: Մտածեցի, որ թատրոնները եւ շարժանկարի սրահները փակ են, ինչո՞ւ ձրի կենդանի արուեստի հանդիսատես չըլլան:

            – Անոնք թատրոն կը դիտեն, իսկ դուն ի՞նչ կ’ընես,- հարցուցի Արմենակին:

            – Ի՞նչ կ’ուզես, որ ընեմ, դիտողները կը դիտեմ, եւ կը խորհիմ, որ տնարգելութիւնը գէթ այր մարդիկը չէ դժբախտացուցած:

            – Էլպիս ի՞նչ կ’ընէ օրնիբուն:

            – Ան հեռատեսիլի բոլոր ալիքներուն, տեղական եւ Հայաստանեան անվճար աբոնեմենտ առած է, գիշեր-ցերեկ հոլովուող կորոնավիրուսի մասին կը լսէ, այնքան լսեց, որ մասնագէտ դարձաւ, իրեն պէս ուրիշներ ալ: Եթէ, Աստուած մի՛ արասցէ, բժիշկները վարակուին եւ չկարենան հիւանդ դարմանել, Էլպիս եւ ուրիշներ զիրենք կը փոխարինեն:

            – Արմենա՛կ, իսկ դուն ի՞նչ կ’ընես, դիտողները դիտելէ եւ Էլպիսի բժշկական յառաջդիմութեան հետեւելէ զատ:

            – Ի՞նչ կ’ուզես որ ընեմ, Հայաստանի թերթերը կը կարդամ, կը բարելաւեմ նորահայերէնս: Նոր Մեսրոպներու բառերէն փունջ մը կարդամ, որ տգէտ չմնամ:

            Եւ Արմենակ հատիկ հատիկ կարդաց, միշտ յիշեցնելով անոնց գրելաձեւը. ինդուլգենցիա, ռեպուտացիոն, դիլեմա, տուրբուլենտ, ֆուտորոլոգ, կատակլիզմ, կիբերանվտանգություն, ասիմպտոմատիկ, ինկուբացիոն, էքսպոնենցիալ, անոտացիա, ինտերնետ-պորտալ, ակտուալ, հեգեմոնիզմ, ֆլորիստ, աուդիո-վիզուալ, նյուզռում, կոռեկցիա, բավական մեծ լոտերով, ֆունդամենտալ, Սուվերենություն, ռեցեսիա, մեսիջ, դոնոր, կոնյուկտուրային, Աուդիտոր, դեպարտամետ, (դեպարտեմե՞նտ), ապարադուրա, կոնֆլիկտ, կմոտիվացվի, ակտիվ եւ պասիվ, դիլետանտության…

             – Մակա՛ր, ցտեսութիւն: Երթամ շէնքերու բնակիչներուն հետ ծափահարեմ հիւանդները բուժողները:

 

Մակար ի Գաղիա, 17 ապրիլ 2020

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %
Previous post Եղբայր Սթիւ Իսկէնտէրեանի Հրաժեշտը
Next post ԱՊԱԳԱՅԻ ԱՐՑԱԽԻ ՏԵՍԼԱԿԱՆՈՎ

Average Rating

5 Star
0%
4 Star
0%
3 Star
0%
2 Star
0%
1 Star
0%

One thought on “ԿԵԴՐՈՆԱԿԱՆՑԻ ԱՐՄԵՆԱԿԻ ԴՐԱՑԻՆԵՐԸ ԾՈՎԸ ԳՏԱԾ ԵՆ՝ ՊԱՏՇԳԱՄԻ ՎՐԱՅ

  1. Ֆանտաստիկ….հահահա 👍
    Ճիշտ տեղին դրեր է այս գրողը, սակայն պէտք է հսյաստանի թերթերուն մէջ գրուի այս։

Leave a Reply

Your email address will not be published. Required fields are marked *

Social profiles