ԱՏՐՊԷՅՃԱՆԱԿԱՆ ՀԱԿԱՀԱՅ ՔԱՐՈԶՉՈՒԹԵԱՆ ՆՈՐԱԳՈՅՆ ԱԼԻՔԸ

0 0
Read Time:2 Minute, 57 Second

Ա.Ա.

Ատրպէյճանական հայկական քարոզչութեան ծիրը կարելի չէ սահմանել, այն իմաստով, որ ոչինչ կարելի է նախատեսել, թէ Պաքուի իշխանութիւնները մինչեւ ուր կրնան հասնիլ, ինչպիսի կարմիր գիծեր կրնան հատել, պարզապէս ապատեղեկատուութեան եւ իրականութիւններու նենգափոխման միջոցով՝ միջազգային հանրային կարծիքը ապակողմնորոշելու իրենց նպատակին իրագործման մէջ։
Վերջին շաբաթներուն առաւելաբար նոր թափ եւ բովանդակութիւն ստացած՝ ատրպէյճանական հակահայ քարոզչութիւնը անառարկելիօրէն ունի նաեւ ապատեղեկատուութեան ծիծաղելի երանգ մը, որ յատկապէս երեւան եկաւ Միւնիխի մէջ, Հայաստանի վարչապետ Նիկոլ Փաշինեանի եւ Ատրպէյճանի նախագահ Իլհամ Ալիեւի միջեւ հրապարակային բանավէճին ընթացքին։
Զանց առնելով բանավէճին ընթացքին արտայայտուած տեսակէտներուն եւ փաստարկներուն տրամաբանական զարգացման բովանդակութիւնը, հարկ է ուշադրութիւն կեդրոնացնել Ալիեւեան կաֆին վրայ, որ բանավէճէն կարճ ժամանակ ետք ատրպէյճանական կայքէջերուն վրայ տեղադրուած բնագիրներուն մէջ «սրբագրուեցաւ» եւ այդպէս հրամցուեցաւ միջազգային հանրութեան, այն համոզմամբ, թէ մարդիկ ապուշ կամ յիմար են եւ պիտի չնկատեն կատարուած յարմարեցումը։ Բանավէճին ընթացքին Ալիեւ յայտարարեց, որ առնուազն տասը պետութիւններ ճանչցած են Լեռնային Ղարաբաղի պետութիւնը։ Ասիկա ահաւոր սխալ մըն էր, որ Ալիեւ կը գործէր։ Ոչ մէկ պետութիւն Լեռնային Ղարաբաղի պետութիւնը ճանչցած է։ Նոյնիսկ Հայաստանի պետութիւնը նման ճանաչում չէ շնորհած Արցախի, առաջնորդուելով ռազմավարական եւ մարտավարական խնդիրներէ։
Եւ ահա քանի մը ժամ ետք, «սրբագրուած» տարբերակը կը հրապարակուէր Azertac լրատու գործակալութեան կայքէջին վրայ, ուր Ալիեւ կը յայտարարէր, որ առնուազն տասը պետութիւններ Խոճալուի սպանդը իբրեւ ցեղասպանութիւն ճանչցած են։
Խոճալուի դէպքերուն խեղաթիւրման մէջ ախոյեան մըն է Ալիեւ, որ պարզապէս կը ստէ։ Ատրպէյճանի նախագահին թիրախը ռուսական «Նեզավիսիմայա Կազէթա»-ի հեղինակաւոր թղթակիցներէն՝ Տանա Մազալովան է, որ հարցազրոյց մը ունեցաւ Խոճալուի դէպքերուն պատճառով հրաժարած նախագահ Այազ Մութալիպովի հետ։ Հարցազրոյցը լոյս տեսաւ մէկ Ապրիլ 1992-ին ռուսական «Նեզավիսիմայա Կազէթա» օրաթերթին մէջ։ Մութալիպով յստակօրէն կը շեշտէր, որ ատրպէյճանական ընդդիմութեան զինեալներն էին, որոնք Խոճալուի բնակիչներուն վրայ կրակեցին, որպէսզի այս դէպքը շահագործեն զինք իշխանութենէն հեռացնելու համար։ Տանա Մազալովա բաւական հետաքրքրական տեղեկութիւններ ալ ունի Խոճալուի դէպքերուն մասին եւ կը յիշէ Ճենկիզ ՄուսթաՖայեւը, որ Փետրուար 28-ին եւ ապա Մարտ 2-ին նկարահանած է Խոճալուի զոհերուն դիակները։ Առաջին նկարահանման մէջ դիակները ամբողջական են, իսկ երկրորդին մէջ անոնք վայրագօրէն խեղուած են։ Տակաւին դիակները առաջին նկարահանման մէջ կը գտնուին Աղտամէն ոչ շատ հեռու՝ ընդդիմադիր Ատրպէյճանական Ճակատի զինեալներուն դիրքերուն դիմաց։ Այս ճակատն է, որ ապա խորհրդարանին մէջ պահանջեց Մութալիպովի հրաժարականը՝ Խոճալուի զոհերուն խեղուած դիակներուն նկարահանումները ցուցադրելով։
Խաղը յստակ էր եւ Տանա Մազալովա Միւնիխի բանավէճէն ետք, «Արմէնփրէս»-ին տուած իր հարցազրոյցին մէջ վերահաստատեց, որ ինք ամբողջ ճշմարտութիւնը գրած է՝ շեշտելով, որ Մութալիպով յստակօրէն ըսած է, որ ատրպէյճանական ընդդիմութեան գործն է Խոճալուի սպանդը։ Տեղին է նշել,որ Ճենկիզ ՄուսթաՖայեւ իր կատարած նկարահանումներէն երկու ամիս ետք սպաննուեցաւ անծանօթ զինեալներու կողմէ եւ պատկերահանումներու տեսերիզներն ալ անհետացան։ Մազալովա մինչեւ այսօր կ՛ափսոսայ, որ չէ կրցած ՄուսթաՖայեւի նկարահանումներէն օրինակ մը պահել իր մօտ։
Եւ ահա յանկարծ Խոճալուի դէպքերուն նշումէն երկու օր առաջ՝ Փետրուար 24-ին, նոյն «Նեզավիսիմայա Կազէթա»-ի սիւնակներուն մէջ ատրպէյճանցի լրագրող Լեւ Ասկերով արտառոցութիւններով լեցուն յօդուած մը կը հրապարակէր՝ «Սումկայիթեան ողբերգութիւն։Ինչպէ՞ս պատահեցաւ եւ ինչպէ՞ս եղաւ» խորագրով։ Յօդուածագիրը, որ Պաքուի իշխանութիւններուն հանրածանօթ արբանեակներէն է, «կը բանար» նախկին Ք․Կ․Պ․-ի արխիւները, դուրս կը հանէր անցեալ դարու վաթսունական թուականներուն Սումկայիթի մէջ հայկական գաղտնի կազմակերպութիւններու ստեղծման մասին «փաստաթուղթեր» եւ կը յայտնէր, որ հայերն են, որոնք Սումկայիթի մէջ իրենց հայրենակիցները ջարդեցին, եւ ոչ թէ……ատրպէյճանցիները։ Ի դէպ Մարտ 5-ին «Նեզավիսիմայա Կազէթա»-ի խմբագիր Կոնստանթին Ռեմչուկովի երկու տեղակալները պաշտօնազրկուեցան՝ այս յօդուածին սիւնակ տրամադրելու ահաւոր սխալին համար։
Եւ ատրպէյճանական ապատեղեկատուութեան շարքը կ՛երկարի ժապաւէնով մըն ալ, որ Ազրպէյճանի Պատկերասփիւռի եւ Ռատիոյի պետական գործակալութեան՝ «ԱԶ Թի Վի»-ի պատրաստութիւնն է՝ «KOD ADI. nalyotcik»  խորագրով եւ որ մինչեւ Մարտ 4, 2020 միայն 255 ակնդիր ունեցած է։ Այս ժապաւէնն ալ պատրաստուած է ըստ նախկին խորհրդային Ք․Կ․Պ․-ի «հաւաստի աղբիւրներուն», որոնց մէջ երջանկայիշատակ Վազգէն Ա․ Ամենայն Հայոց կաթողիկոսն ալ ահաբեկիչ մը կը ներկայացուի։ Ալ կրնաք երեւակայել սուտերու եւ ապատեղեկատուութեան տարողութիւնը։

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %
Previous post Հանդիպում`Փաշինեան – Տէր Խաչատուրեան – Սաղաթէլեան 
Next post Քաղաքական Զարգացման Հրամայականը

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published. Required fields are marked *

Social profiles